30 април 2005

А9 – машината за пребарување во сопственост на Амазон

[нелекториран]

А9 е машина за пребарување чија организациона структура се базира на интегрирање податоци од разни извори, почнувајќи од резултатите за текстови и слики од Гугл, но и од базата со книги што се продаваат преку книжарницата Амазон, референци од Гурунет, филмови од ИМДБ и анализа на сурфањето на корисниците на нивната сопствена лента со алатки (toolbar).

А9 се издвојува од бројната конкуренција поради нивниот нагласок не само на пребарувањето, туку и на „организирањето и запомнувањето на информациите – сè на едно место“. Сите пребарувања се запишуваат и корисникот добива информација дали се работи за нови резултати или веќе има кликнато на нив, а може и да се разгледуваат по датум.

Особено полезно кај резултатите е што покрај вообичаените наслов, линк, кус опис и големина на страницата има можност да се видат и подетални информации за сајтот (site info) и тоа во две форми – концизно, преку стриповско облаче кое се појавува во слој над тековниот или опширно, преку посебна страница.

Концизните информации го опфаќаат рангот на сајтот (не е ист со рангот од Гугл) при што помала вредност укажува на популарен сајт, колку сајтови од базата линкуваат до него, неговата брзина и кога е првпат поставен. Подеталниот приказ укажува и на тоа кои сајтови се „слични“ со тековниот, презентирајќи линкови до оние кои ги посетувале неговите преостанати посетители.

Иако е тешко веројатно дека А9 ќе го преземе приматот на Гугл на глобално ниво, резултатите што ги дава може добро да послужат при правење на споредби на ефектот на повеќе сајтови кај популацијата што го користи неговиот софтвер, која претежно доаѓа од САД. Ова е особено важно за заинтересираните за е-трговија (e-commerce).

Дополнување: автоматски
Брзина: брзо
Функционалност: многу добра
Код: ДХТМЛ и др.
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
Гугл-ранг: 9/10
Јазик: англиски
Адреса: www.a9.com

29 април 2005

378

Во денешниот број на „Време“ не се појавува рубриката „Веб-сајт на денот“.

28 април 2005

377

Во денешниот број на „Време“ не се појавува рубриката „Веб-сајт на денот“.

27 април 2005

376

Во денешниот број на „Време“ не се појавува рубриката „Веб-сајт на денот“.

26 април 2005

Фондација „Електронска граница“

[нелекториран]

Целта на Фондацијата „Електронска граница“ - ЕФФ (Electronic Frontier Foundation) е бранење на слободата во дигиталниот свет. Неа ја сочинуваат „страствени луѓе: адвокати, технолози, волонтери и визионери, кои работат на заштита на вашите дигитални права“.

Оваа фондација е основана во јули 1990 година како одговор на заканите за слобода на говор на интернет, а нејзиниот веб-сајтот дава сè од себе да ја претстави минатата и тековната работа со што е можно повеќе податоци. Секако, голема улога во квалитетот на претставувањето игра и начинот на организирање, што исто така е на високо ниво. На пример, како рубрики во главното хоризонтално мени се појавуваат мапата на сајтот (погодна за слободно разгледување), тековните случаи на кои работат активистите, акцискиот центар (тековни кампањи), оддел за печатот и оддел со информации за фондацијата.

За посетителите на кои им требаат информации од определена област, а немаат потреба да дознаваат за организациската структура, во страничното мени на насловната страница дополнително стојат и темите на интерес, од анонимност и биометрија, до е-гласање, употреба на бежични технологии, РФИД и цензура.

Улогата на ЕФФ во регулирањето на законската рамка за дигитални комуникации е огромна во светски рамки, оти иако пред сè работат на американски терен. Импликациите од одлуките на владите на САД често наоѓаат пат до одлуките на владите во земјите кои, како нашата, се навлегуваат во глобалните текови и трендови.

Дополнување: често
Брзина: брзо
Функционалност: одлична
Код: ПХП, Флеш
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
Гугл-ранг: 9/10
Јазик: англиски
Адреса: www.eff.org

25 април 2005

Марија Клаудија Кортес – боја во движење

[нелекториран]

Веб-сајтов претставува „интерактивно искуство на комуникација и симболизам со употреба на бои“. Сајтов е корисен и за луѓето што се занимаваат со дизајн, а и за сите други граѓани - конзументи на нивната работа, чие зголемено разбирање бездруго би влијаело на подигање на квалитетот на оваа гранка кај нас.

Презентацијата е поделена во три дела – запознавање со „ѕвездите“, филмчиња и лабораторија.

Ѕвездите се боите (црвена, портокалова, жолта, зелена, сина и виолетова), а секоја од нив е претставена како личност, со информации за тоа дали е примарна или секундарна (крвна група), што претставува во светот на современиот дизајн, односно нејзините позитивни и негативни особини, како и што симболизира во разни култури низ светот.

Преку цртаните филмчиња „на дело“ се прикажани особините на секоја од боите, а во лабораторијата посетителите можат да експериментираат со бои, предефинирани елементи и цртање на лице место, како и да решаваат квизови во врска со употребата на боите. Особено е интересен делот „калеидоскоп“, каде што се добиваат анимирани прикази на комбинации на основните бои и геометриски форми.

Причината за користењето на непрепорачливата техника на отворање ново прозорче за секоја јазична верзија е обезбедување контрола врз димензиите на приказот.

Авторката го направила сајтов како дел од магистерската работа по ликовна уметност, односно компјутерски графички дизајн, на американскиот факултет Рочестерски институт за технологија во 2003 година.

Дополнување: еднократно
Брзина: споро
Функционалност: добра
Код: флеш
Дизајн: флешерски
Навигација: прилагодлива
Пребарувач: нема
Клучни зборови: нема
Јавен бројач: нема
Гугл-ранг: 6/10
Јазици: англиски и шпански
Адреса: mariaclaudiacortes.com

23 април 2005

Анонимно известување за сексуално преносливи болести

[нелекториран]

Доколку ви е незгодно на вашите партнер/(к)и во лице да им признаете дека сте откриле дека имате сексуално пренослива болест, тоа може да го сторите анонимно со испраќање електронска картичка преку сервисот „Ин спот“.

За корисниците лоцирани во Сан Франциско има и листа (карта) на клиники каде што може да се проверат (под итно), а во рубриката „ресурси“ има одличен избор на линкови до сајтови на оваа и сродни теми.

Сајтов го има изведено здружението на граѓани ИСИС, преку спонзорство од Одделот за здравство на локалната самоуправа на Сан Франциско, што е пример за партнерство помеѓу јавниот и невладиниот сектор.

Кражбата на идентитетот (неовластено користење на лични податоци) е еден од најактуелните злостори во САД, па јасната гаранција од ИСИС дека податоците кои поминуваат низ системот нема да бидат предадени на ниедна владина или приватна агенција го зајакнува кредибилитетот на сајтот. Со тоа, во услови кога нема експлицитна законска заштите (како во Македонија, на пример) тие се ставаат на располагање да бидат приватно тужени за измама, ако излажат.

Пријатната атмосфера ја поткрепуваат и техничките и уредничките решенија за борба против спам (испраќање недобредојдени пораки) – барањето да се внесе лозинка со пречукување на текст од сликичка неразбирлива за роботи и замолница која ја буди совеста.

Графичките елементи се добро вклопени во дизајнот, без разлика на тоа што асоцираат на само една од можните варијанти за размена на телесни течности и сексуален контакт. За главното мени можело да се употреби текст наместо многу потешките сликички, а пофално е што преку него се укажува и на моменталната позиција на сајтот.

Дополнување: неопределиво
Брзина: брзо
Функционалност: добра
Код: ХТМЛ, ЈС, ПХП
Дизајн: базиран на графика
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 5/10
Јазик: англиски
Адреса: www.inspot.org

22 април 2005

Вегетаријанското здружение

[нелекториран]

„Вегетаријанското здружение е образовна добротворна организацијашто промовира разбирање и почит кон вегетаријанскиот начин на живот,“ вели нивниот официјален опис. Тие нудат информации во врска со исхраната, образование на млади, дефиниции и историја на вегетаријанството… а за оние лоцирани во близина (Англија) и обука за готвачи.

Веб-сајтот е убава комбинација на ненападни, но сеприсутни елементи на визуелен дизајн и читлив текст. Вреди да се забелечи дека изведбата е целосно во ХТМЛ-формат, што во комбинација со вметнување на клучни зборови во внатрешните страници овозможува лесен пристап до нив од машини за пребарување.

Како најголем проблем за употребливост на сајтот се јавува тоа што мерките се предадени со британскиот систем (либри, фунти и слично), без да биде обезбедена метричка алтернативе (килограми, грамови и слично).

Покрај тоа, делот за историја на вегетаријанството е малку пристрасен и селективен, па не се споменува дека на пример, Хитлер и некои други непопуларни ликови биле вегетаријанци, покрај Питагора, Волтер и Поуп.

Најважна содржина претставена на него се рецептите со вегетаријански јадења, поделени според годишното време или други критериуми поврзани: со здравје/лечење, за млади, за самци, со специјални состојки. Особено импресивна е збирката на рецепти од целиот свет.
Во неа нема рецепти од Македонија, но веројатно ако локалните вегетаријанци им пратат, нема да бидат одбиени.

Дополнување: повремено
Брзина: средна
Функционалност: добра
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: нема
Гугл-ранг: 7/10
Јазик: англиски
Адреса: www.vegsoc.org

21 април 2005

„Геп“ – фирма за текстилни производи

[нелекториран]

Како што е нормално за фирма која што ја користи модата како средство за заработка, Геп пред сè вложува во маркетинг, преку изградба на кредибилитет на брендот. Нивниот веб-сајт го одразува имиџот на компанијата, презентирајќи ги визуелните дизајнерски решенија и тековните производи.

Каталошкиот дел е изработен одлично, при поделбата на соодветни категории според род и тип го олеснува разгледувањето. За секој производ се дадени детални информации за материјалот и за тоа во кои бои, дезени и големини е достапен, проследени со слики на истиот и упатство како муштеријата да се измери и спореди со моделот. Во испробаниот маркетиншки стил на Амазон.ком на ваквите страници преку странични линкови се нудат сродни или слични производи.

На овој начин, на муштериите им се овозможува да купуваат директно преку интернет, или едноставно да се подготват доколку планираат посетата на продавница на фирмата. Ваквиот приод е де факто стандарден во развиениот свет, што може да се види и од веб-сајтовите на други фирми за облека, како што е „Викториас сикрет“.

Арно ама, горенаведеното тешко може да се заклучи за македонските фирми од оваа бранша. На пример, веб-сајтот на Тетекс е сосем демоде, неоптимизиран и нуди минимум информации за асортиманот. Орка и нивната модна линија Кара, во чија реклама се вложува многу, во моментот на пишување на написов на веб-сајтовите немаат поставено содржини, туку најнепрепорачливата реченица на вебот – онаа што известува дека „сајтот е во изградба“.


Дополнување: постојано
Брзина: средна
Функционалност: одлична
Код: АСП, ЈС
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
Гугл-ранг: 3/10
Јазик: англиски
Адреса: www.gap.com

20 април 2005

Што навистина се случило

[нелекториран]

Објавата на насловната страница на „Што навистина се случило“ вели дека овој „веб-сајт е непартиски, антивоен и против лажењето. Неговата цел е да ги разоткрие измамите со кои владите и медиумите ја прелажуваат јавноста да прифати влегување во војни и откажување од сопствените пари.“

Авторот директно ги поттикнува читателите и она што го дознале на сајтот да го споделат со оние кои немаат пристап на интернет, што е редок пример за свеста за постоење на дигиталниот јаз (digital divide) кај луѓето кои секојдневно работат на интернет, па го сметаат тоа за нешто вообичаено и сеприсутно.

Главен тип на содржини на сајтов се линкови до други сајтови, со вести, анализи и колумни, од кои голем дел се поврзани со катастрофалните настани од нашето блиско минато и современост, како трагедијата од 11 септември, контроверзите околу војната во Ирак и нејзините последици, особено паднатите жртви, но и теми од научно-здравствена природа, како што е клонирањето – кое исто така влече морални контроверзи.

За секој од линковите на насловната страница има и коментар во блоговски стил, кои за жал се недостапни во архивите.

На сајтот има неколку страници што не се отвораат, а такви грешки се нормални кога се применува технологија на чист ХТМЛ за работа со толкав обем, за која би било подобро да се употреби динамички пристап до база на податоци (АСП или ПХП).

Дополнување: секојдневно
Брзина: брзо
Функционалност: добра
Код: ХТМЛ, ЈС
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 6/10
Јазик: англиски
Адреса: www.whatreallyhappened.com

19 април 2005

Оригамито на Роберт Џ. Ланг

[лекториран]

Овој сајт содржи галерии на фотографии и написи за оригиналните оригами направени од уметникот Роберт Џ. Ланг. Оригамито е модерна реинкарнација на старовремската јапонска уметност на правење скулптури со виткање хартија. Овој веб-сајт содржи линкови до книги на оваа тема, упатства за правење оригами, како и написи за врските помеѓу оригамито, математиката и инженерингот.

Галериите на направени форми со оригами се навистина прекрасни, а уште попрекрасна е можноста да ги направат и самите посетители ако ги следат упатствата и шаблоните. Шаблоните се слични на шивачките „мостри“ и се дадени во ПДФ-формат (за жал, без наведување на нивната големина до линкот). Овозможуваат прецизно одредување на тоа кои делови од почетното четириаголно парче хартија да се превиткаат и како.

На сајтот е претставена и програмата за симулација на оригами на компјутер, изработена врз основа на математичките принципи објаснети во посебна рубрика. Програмата била изработена пред 13 години за Мекинтош, а дадена е како слободен софтвер – достапен е и изворниот код и кој сака може да го користи, модификува и надградува, секако, без гаранција дека ќе работи како што треба.

Според зборовите на авторот, оригамито е уметничка форма слична на музиката, оти се состои од компонирање (дизајн) и изведба. Правењето на овие прекрасни минискулптури претставува и духовно и техничко задоволство, па е одлично како форма на ангажман и на децата и на возрасните – особено во друштво.

Авторот дел од оригамите ги има излеано и во бронза и ги нуди на продажба.


Дополнување: повремено
Брзина: брзо
Функционалност: одлична
Код: ХТМЛ/ПХП
Дизајн: комбиниран
Навигација: стандардна
Пребарувач: нема
Клучни зборови: има
Јавен бројач: нема
Гугл-ранг: 7/10
Јазик: англиски
Адреса: www.langorigami.com

18 април 2005

368

Во денешниот број на „Време“ не се појавува рубриката „Веб-сајт на денот“.

16 април 2005

367

Во денешниот број на „Време“ не се појавува рубриката „Веб-сајт на денот“.

15 април 2005

„Секоја видео-игра“

[нелекториран]

Веб-сајтот „Секоја видео-игра“ овозможува играње на игрите „од на времето“ без употреба на емулатор. Емулатор е програма која на „посилен“ компјутер ја имитира работата на „послаб“, овозможувајќи да се пуштаат програми од вториот. Недостатокот на ваквиот пристап е тоа што емулаторот мора да се инсталира (со сите ризици на таа операција), а и тоа дека постојат многу емулатори за различни платформи.

Авторите на сајтов игрите ги имаат преработено во Јава, па може да се играат во разгледувач (browser), со што ја анулирале потребата од дополнителни инсталации. Досега имаат поставено над 2300 игри за аркадни автомати (од флиперниците), гејмбој, како и конзолите на Сега и Нинтендо, со што овозможуваат избор на кој може да му позавиди било кој одделен емулатор. Секако, насловот е преамбициозен, како и во случајот со сајтот „Сè за Брус Ли“.

Изборот е инклузивен и недикриминаторски, па може да играте игри како „1942“, „Златната секира“ (Golden Axe), но и "Шизичките игри на Барби" (Barbie Groovy Games). За секоја од нив има кусо упатство за тоа кои копчиња на тастатурата одговараат на командите од џојстикот.

Интеракцијата со посетителите се постигнува преку работата на форум за прашања, одговори и општи играчки дискусии, како и преку разновидните форми на статистика и гласање вградени во кодот на сајтот.

Исклучително добра страна на дизајнот на сајтов е директниот пристап, при кој не се губи време на воведни екрани или текстови, упатства и слично. Списоците на игри со нивните рејтинзи се веднаш достапни и сè што треба да стори играчот е да одбере и почека да се вчита аплетот.

Дополнување: неопределиво
Брзина: брзо
Функционалност: добра
Код: ПХП, Јава
Дизајн: текстуален
Навигација: минимална
Пребарувач: има
Клучни зборови: има
Јавен бројач: нема
Гугл-ранг: 6/10
Јазик: англиски
Адреса: www.everyvideogame.com

14 април 2005

[Писателот на научна фантастика] Спајдер Робинсон

[нелекториран]

Она што прво упаѓа в очи при посетата на официјалниот веб-сајт на авторот на научна фантастика Спајдер Робинсон е колажот на насловната страница што го поврзува со некои ликови и сцени од неговите дела. Иако изгледа убаво, сликата е претешка: има над 223 килобајти, додека и само со "средна" компресија во Фотошоп може да се сведе на само 63, со што ќе се вчитува 3.5 пати побрзо. Уште подобро би било кога ликовите од колажот би биле подесени да служат како линкови до соодветните дела.

Заинтересираните за Робинсон преку сајтот може да дознаат повеќе за неговите дела (книжевни и музички), јавни настапи, како и да прочитаат други информации: фотографии, интервјуа (МП3), рецензии, дневник и колумни.

Од особена полза за читателите е што преку сајтот може да ги добијат страниците што недостасуваат во некои изданија на неговите книги што биле испечатени со грешка.
Дел од сајтот е посветен на односот на Спајдер со неговата сопруга и партнер Џин, танчерка, кореограф и писателка.

Спајдер Робинсон е автор на приказната „Меланхолични слонови“, која е одличен пример за уметничка интерпретација на тековните, а особено на идните проблеми со авторските права (copyright). Целата приказна може да ја најдете како прво поглавје (Chapter 1) од истоимената збирка преку Гугл со внесување на зборовите "Spider Robinson Melancholy Elephants".


Дополнување: повремено
Брзина: средна
Функционалност: добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
Гугл-ранг: 6/10
Јазик: англиски
Адреса: www.spiderrobinson.com

13 април 2005

„Сè за Брус Ли“

[нелекториран]

Иако се разновидни, содржините на сајтов сепак не го оправдуваат претерано амбициозниот наслов. Сепак, тие на концизен и пристапен начин обезбедуваат основни информации за животот и делото на легендарниот Брус Ли, мајстор на боречки вештини и омилен глумец.
Достапни се и куса и хронолошка биографија, филмографија, библиографија со рецензии на неговите книги (кои беа издадени и во СФРЈ), како и написи на контроверзни теми за човекот што ги искомбинирал неколку кинески боречки вештини за да создаде свој стил наречен „Џит кун до“. Една од тие теми е и сеуште нерасчистената причина за неговата прерана смрт.

За жал, сајтов е преоптеретен со огласи и поп-ап прозорчиња, кои се одраз на настојувањата на авторот да заработи. Галериите со слики се неоптимизирани, малите сликички се базиракај кои големите верзии се отвораат во нов прозорец.
Меѓу галериите особено се истакнува збирката на поштенски марки со ликот на „Малиот змеј“. Не е чудно што најголем дел од нив потекнуваат од земјите на „третиот свет“, бидејќи Брус Ли, кој својата деминутивна става преку напорна работа и талент ја претворил во атлетски идеал, има прераснато во глобален симбол на успехот на оние кои, почнувајќи од мизерни услови, се трудат да живеат подобро и подостоинствено.

Мултимедијалноста на сајтот ја покачуваат анимираните стрипчиња (неколку делови, со текст на кинески), направени во Флеш со техника на колаж и неколку инсерти од филмови.
За почитувачите, на сајтот е поместено и упатство како да се стигне до вечниот дом на Брус Ли (1940-1973), кој се наоѓа на скромни гробишта со поглед на Тихиот Океан, во американскиот град Сиетл.

Дополнување: еднократно
Брзина: средна
Функционалност: средна
Код: ХТМЛ, Флеш
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 6/10
Јазик: англиски
Адреса: www.allbrucelee.com

12 април 2005

Министерство за транспорт и врски [2]

[нелекториран]

Клучниот параграф од рецензијата на сајтот на Министерството за транспорт и врски, објавена во оваа рубрика на 2 февруари 2005 (Време, бр. 304) вели дека сајтот „има солидна структура, која би можела да биде функционална доколку е пополнета“.

Пофално е што скоро сите недостатоци на кои е укажано во рецензијата се исправени, од информирањето за тоа кој го раководи министерството, преку поставување информации и од сферата на односи со јавноста и од сферата на легислатива, до комплетно воведување фонт со кирилична поддршка во македонскиот дел и назначување на големината на записите во нестандардни формати како ПДФ покрај линковите што водат до нив.

Иако воведниот екран е излишен, а англискиот превод е неконзистентен и сеуште не се вметнати клучни зборови и опис во кодот на страниците, ова е сепак голем чекор напред и веројатно доказ дека сепак постојат владини тела или службеници способни позитивно да реагираат на конструктивна критика.

Интересно е дека на официјалниот сајт на Владата во делот посветен на ова министерство, линкот до ова министерство не постои, туку го заменува линк до Управата за телекомуникации (УТК), која е составен дел на министерството. Уште поинтересно е и тоа што на сајтот на УТК нема линк до сајтот на министерството, а има до други официјални тела.


Дополнување: повремено
Брзина: средна
Функционалност: добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 4/10
Јазици: македонски, албански и англиски
Адреса: www.mtc.gov.mk

11 април 2005

Марфиеви закони

[лекториран]

Цел на сајтов е да ги собере сите Марфиеви закони на едно место, почнувајќи од основниот, „ако нешто може да тргне наопаку, ќе тргне наопаку".

На сајтот законите се поделени по категории, а посебна категорија му е посветена на настанокот на Марфиевите закони. Категориите се разновидни - од љубов, технологија, трговија, недвижнини… до војна, шиење, фотографија и лотарија.

Дел од законите се испратени од посетители на сајтот, кои потоа се наведени како контрибутори преку публикување на нивното име и адреса за електронска пошта. Некои од нив праќаат и анегдоти од вистинскиот живот во врска со законите.

Недостаток на сајтов е што во одделот за „вести", наменет за линкови до написи на други сајтови во кои се споменуваат Марфиевите закони, некои од линковите не работат.

Сопственик и администратор на сајтот е „просечниот компјутерџија" Раанан Авидор (женет, со две деца). Одржливоста ја обезбедува преку поставување огласи од Гугл, како и посредување во продажба на книги од Амазон и постери од Арт.ком.


Дополнување: неопределиво
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
Гугл-ранг: 6/10
Јазик: англиски
Адреса: www.murphys-laws.com

09 април 2005

361

Во денешниот број на „Време“ не се појавува рубриката „Веб-сајт на денот“.

08 април 2005

Асоцијација за компјутерска машинерија

[лекториран]

Асоцијацијата за компјутерска машинерија (АЦМ) е првото светско образовно и научно компјутерско здружение, основано во 1947 година. Денес има повеќе од 80.000 члена низ целиот свет (професионалци и студенти) и служи како извор за јавноста за авторитативни публикации, иновативни конференции и визионерско лидерство во областа на ИКТ (информациско-комуникациски технологии).

Асортиманот на дејности на АЦМ е навистина широк, и за сите нив може да се дознае преку официјалниот веб-сајт. Важен дел од нив е следење на развојот и на постигнувањата и доделување годишни награди, меѓу кои и престижната Турингова награда, наречена според еден од основачите на модерната информатика, британскиот криптограф Ален Туринг.

Друг аспект е споделувањето знаења преку конференции, пред се оние што ги организира АЦМ, како што е, но и настани на други организации, кои може да се вметнат во содржајниот календар на сајтот. Настаните на АЦМ се „објективна арена за дискусија на најновите идеи, кои често меѓусебно се спротивставени", а нареден таков е „Паноптикон", петнаесетта годишна конференцијата на тема „Компјутери, слобода и приватност" (www.cfp2005.org), кој ќе се одржува од понеделник во Сиетл.

На веб-сајтот има и дигитална библиотека со огромен број научни публикации, собрани во текот на повеќедецениското постоење и „Водич за компјутерска литература" – библиографска збирка со повеќе од 750 илјади наслови, кои директно ги пријавуваат големите издавачи. Овие ресурси се делумно достапни јавно, а додека членовите на АЦМ (за професионалци годишната членарина е 99 долари, а за студенти 42) имаат целосен пристап и до нив и до другите публикации и форми на комуникација на здружението.

Употребливоста на сајтов ја нарушува повремената употреба на фрејмови.


Дополнување: често
Брзина: брзо
Функционалност: добра
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
Гугл-ранг: 9/10
Јазик: англиски
Адреса: www.acm.org

07 април 2005

Лулу – за тековните и за идните писатели

[лекториран]

Лулу е веб-сајт што им овозможува на креативните луѓе да ги продадат производите на својот труд.

Слично како веќе рецензираниот Кафе-прес, преку Лулу може да објавите книги, постери, календари и други содржини преку системот печатење по порачка (print on demand). Доколку имате напишано дело, го испраќате во дигитална форма до Лулу, а потоа, кога некој ќе сака да ја купи книгата, на пример, луѓето од Лулу му печатат онолку примероци колку што е подготвен да плати.

Освен печатени материјали, Лулу овозможува и продавање софтвер, а и е-книги и други видови дигитални записи. Тука спаѓаат и фотографии, кои се дистрибуираат исклучиво во дигитална форма, како и музика (достапна за симнување од сајтот по плаќањето).

И додека Кафе-прес има предност што вашите дела може да ги залепи на чаши за кафе, подлоги за глушец и маички (по тоа се најпознати), Лулу се фокусира на создавање заедница, со интеракција меѓу авторите и купувачите (ако сакаат), преку посебни авторски веб-страници (потсајтови) и блогови, дискусиони форуми, засилени со добра инфраструктура за е-трговија, како пребарување по типови продукти и сл.

Во рамките на САД, Лулу испорачува преку „Федекс" и редовна пошта, а во странство само преку редовна пошта, така што нарачките може да се очекуваат во рок од 2 до 8 работни дена (зависно од одбраните и соодветно доплатените опции).

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: само на насловна
Јавен бројач: нема
Гугл-ранг: 7/10
Јазик: англиски
Адреса: www.lulu.com

06 април 2005

Американско-англиски идиоми

[лекториран]

Целта на овој веб-сајт е да пружи објасненија за најчесто користените идиоми во англискиот јазик, особено неговата американска варијанта. Иако овој јазик е „светски", постојат голем број културно поврзани изрази, кои често не им се јасни ни на родените говорители, а камоли на оние што го учат како странски јазик.

За илустрација, истражувањето на фондацијата Метаморфозис од 2004 година откри дека 68.6 отсто од населението во Македонија недоволното познавање на англискиот јазик го чувствува како хендикеп во однос на користењето компјутери.

Особена предност на „сајтот за идиоми" се прегледноста и изборот. Иако не е сеопфатен, на него може да се најдат објасненија на низа чести, но мистериозни идиоми, кои често ги слушаме по филмовите.

Таков е на пример „финтата 22" (catch-22), „измислен во роман на Џозеф Хелер од 1961 година, во којшто едно бирократско правило зависи од друго, кое пак се повикува на првото". На концизен начин се дадени и главните приказни за настанокот на популарните „ОК" и „квиз".

Администраторот е отворен за забелешки од посетителите (по електронска пошта), кои потоа стануваат дел од објасненијата на термините и фразите. Во дизајнот се вметнати едноставни, но ефектни илустрации, кои го зголемуваат пријатниот впечаток, а новите прилози во списокот се соодветно обележани.

Овој веб-сајт е дел од „Мрежата на здодевноста,“ која нуди „забавни занимливости за кога ви е здодевно".


Дополнување: неопределиво
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: само на насловна
Јавен бројач: нема
Гугл-ранг: 6/10
Јазик: англиски
Адреса: www.idiomsite.com

05 април 2005

Официјалниот веб-сајт на градот Сиетл

[лекториран]

Сиетл првобитно било име на индијански поглавар познат по својот еколошки говор (внесете „Chief Seattle" на Гугл). Потоа името го добило едно приморско гратче на Тихи Океан, кое се развило преку обезбедување услуги за китоловци и други морнари, особено „женско друштво" (според Курт Кобејн). Потоа Сиетл прераснал во важен индустриски, уметнички и туристички центар, познат по среденоста, достапноста на природни убавини и како родно место на гранџот.

Градскиот сајт им е пред се наменет на граѓаните на Сиетл и информира за услугите што ги нудат локалната самоуправа и нејзината организациска структура (сосе адресар за контакти со службениците), работата на градоначалникот и Советот (со видеозаписи од заседанијата), овозможува плаќање сметки за комуналии и јавни услуги и сл.

Цел на градот е „да стане национален водач во користењето технологија за драматично проширување на граѓанското учество и јавната расправа". Посветеноста на локалната самоуправа, која се огледа и од документите достапни на сајтот, во комбинација со тоа што 75 отсто од граѓаните имаат пристап на Интернет од дома (50 отсто од нив широкопојасна врска), овозможила забележителни резултати на полето на е-демократија.

Градскиот веб-сајт им е посветен и на туристите, за кои се обезбедени информации за знаменитостите (гробот на Брус Ли, куќата на Бил Гејтс) во посебен оддел, кој нуди „виртуелни тури" и е преполн со релевантни линкови, како оние до Зоолошката градина и Аквариумот. Преку поврзаниот сајт (www.seeseattle.org) може да побарате на домашна адреса по пошта да ви испратат информативен пакет.

За сите горенаведени на градскиот сајт е поставен и календар на настани, кој може да се пребарува и сортира според датум и вид на случувања.

Веројатно како последица на историскиот развој, до овој веб-сајт водат уште неколку адреси (cityofseattle.net, www.seattle.gov).


Дополнување: еднократно
Брзина: средна
Функционалност: одлична
Код: ХТМЛ и други
Дизајн: текстуален
Навигација: стандардна
Пребарувач: има
Клучни зборови: минимално
Јавен бројач: нема
Гугл-ранг: 7/10
Јазик: англиски
Адреса: www.ci.seattle.wa.us

04 април 2005

Десетте години на „Јаху“

[лекториран]

Неодамна порталот „Јаху" прослави десет години постоење. По тој повод, тие објавија посебен потсајт посветен на стоте „моменти" (и во скопскиот младешки сленг овој збор се користи како синоним за „случувања") што, според нив, го одбележале овој период. Тие се однесуваат и на настани од историјата на компанијата, но и на нешта коишто влијаеле на вкупниот развој на Интернет и на вебот, своевидна ретроспектива на „нетот" (мрежата), односно „нетроспектива".

Иако како примарно средство за создавање на веб-сајтот е избран „Флеш", правилата на употребливост се запазени со подготвување верзија на сајтот во „обичен" ХТМЛ-формат, кој ги покрива сличните функционалности во комбинација со Јаваскрипт и користење слоеви.

Секој „момент" е всушност посебен напис, опремен и со можност за посетителите да остават свои коментари. Во нив содржината е дадена преку концизен текст, карактеристична фотографија/илустрација и линкови до споменатите личности, ентитети или веб-сајтови.

За оние поупатените во развојот на Интернет, кои „беа таму на времето", овој сајт може да послужи како носталгичен споменар, од којшто сепак ќе научат дополнителни работи. Сите оние кои допрва се запознаваат со новите технологии би било добро да го прифатат како задолжителна лектира и од стручен аспект, но и како средство за развивање на нивната „општа култура".

Јаху неодамна отвори и сервис за блогирање, а според најновиот Плагин, и мрежа за развој на слободен софтвер, како начин за стекнување нови идеи и решенија.


Дополнување: еднократно
Брзина: брзо
Функционалност: одлична
Код: Флеш, ХТМЛ, ЈС
Дизајн: графички
Навигација: приспособлива
Пребарувач: нема
Клучни зборови: има
Јавен бројач: нема
Гугл-ранг: 0/10 (тазе сајт)
Јазик: англиски
Адреса: birthday.yahoo.com

02 април 2005

355

Во денешниот број на „Време“ не се појавува рубриката „Веб-сајт на денот“.

01 април 2005

354

Во денешниот број на „Време“ не се појавува рубриката „Веб-сајт на денот“.