Пронајдете ги боите кои ве инспирираат

„Колорсакр“ е веб-сајт кој ќе им биде од корист на графичките и веб-дизајнери, уметниците кои творат дигитално и воопшто на луѓето кои се занимаваат со визуелна и креативна работа, која подразбира употреба и комбинирање на бои.

Ако сте ваков профил на професионалец, не ви е непозната потрагата по инспирација за она што е пред вас и треба да биде сработено. Вебот е секогаш за вас да ви даде насока, идеја, инспирација. Многу важна, во овој тип на работа, е правилната употреба на боите. За помош од ваков вид, ви го препорачуваме колорсакр. Тоа е веб-сајт кој овозможува екстрахирање на боите од сликите со цел нивна употреба и комбинација за свои цели. Со прости зборови, тоа значи дека доколку најдете некоја фотографија на веб на која ви се допаѓаат боите и сакате да го доловите чувството што таа го има, истата можете да ја посочите и како резултат да ги добите посебно сите бои што се употребени. Секоја боја е претставена визуелно на мала површина која може да се влече до сликата, со цел да се пронајде местото на нејзината примена и нејзиниот однос со другите бои. Секако, под приказот на секоја боја, ќе ги најдете потребните информации за нивната примена во вашата работа, како и неколку палети со бои кои ја вклучуваат конкретната.

Пробајте да работите со колорсакр. Доколку ви се види корисен, обележете го во вашиот прелистувач или додадете го како проширување во мозила фајрфокс.

Дополнување: нема
Брзина: брзо
Функционалност: одлична
Дизајн: минималистички
Навигација: минимална
Пребарувач: има (за фликр)
Клучни зборови: нема
Јавен бројач: нема
РСС/Атом: нема
Гугл-ранг: 0/10
Политика за приватност: има
Јазик: англиски
Адреса: colorsuckr.com

Онлајн графичко студио

Без разлика дали сте професионален графички дизајнер, аматер за обработка на слики и фотографии или просечен корисник на програми за графика, „Ејвиери“ е вашата следна веб-дестинација каде треба да се преселите.

„Ејвиери“ постои за да го овозможи креирањето на содржини од секаде. Со апликации кои релативно брзо се вчитуваат во самиот прелистувач, повеќе нема потреба да зависите од скапите програми и долготрајните инсталации.

„Финикс“ е обработувач на слики кој располага со основни алатки за дотерување, како и посложени ефекти. „Тукен“ е онлајн апликација која ќе ви помогне при изборот на бои кои се добри за меѓусебно комбинирање. Апликацијата „пикок“, поинаку наречена визуелна лабораторија, овозможува бескрајно експериментирање со слики или создавање на сосема нови креации изведени со примена на ефекти базирани на пиксели. За да работите векторски, што е особено значајно при дизајнирање на логоа и дизајни за маички на пример, користете го „рејвен“ – една од единствените апликации од овој вид кои постојат на интернет. Конечно, „ејвиери“ во својот пакет од апликации вклучува и таква за фаќање слики и цели веб-страници од она што е моментално отворено во прелистувачот, нивно сечење, дотерување и прилагодување во димензии. Ова ќе ви го овозможи апликацијата „фалкон“, која е достапна и како додаток за фајрфокс под името талкон. Дополнително, опцијата за фаќање слики можете да ја користите и со директно внесување на „aviary.com/“ пред адресата на страницата која ви е моментално отворена. Ваквото користење на апликацијата може да биде значително побавно во однос на нејзиното директно повикување во прелистувачот.

За секоја од овие апликации постојат онлајн видео туторијали кои значително ќе ви помогнат да ги совладате техниките на работа, алатките и опциите. Сработените материјали можете да ги објавувате на веб, според условите за приватност кои ќе ги зададете или пак да ги преземате на вашиот компјутер. Бесплатните варијанти од апликациите од пакетот ејвиери се поскромни во однос на комерцијалните за чие користење се плаќа 25 долари годишно.

Во иднина од ејвиери можеме да очекуваме креирање на секаков тип на мултимедијални содржини со помош на апликации за обработка на аудио, видео, па дури и 3Д.

Дополнување: повремено
Брзина: брзо
Функционалност: одлична
Дизајн: веб 2.0
Навигација: минимална
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 6/10
Политика за приватност: има
Јазик: англиски
Адреса: aviary.com