10 декември 2004

Зоолошката градина од Брукфилд, Илиноис, САД

[лекториран]

Брукфилд е гратче до Чикаго, а неговата пространа зоолошка градина е во надлежност на Чикашкото зоолошко друштво, кое, освен за неа, се грижи и за Шумскиот резерват во областа Кук. Покрај рекреативниот аспект, друштвото врши и интензивна научно-истражувачка дејност.

Зоолошката деновиве е актуелна по повод починувањето на горилката Бабс (1974-2004) чиј погреб, кој го спровеле членовите на нејзиното семејство, го привлече вниманието на светските агенции. За жал, ниедна од пролеаните крокодилски солзи не го отвора прашањето на оправданост на геноцидот и ропството што го применуваме како вид врз овие наши роднини, блиски и генетички (разликата во кодот е 2 отсто), и според интелигенцијата и способноста за емоционален живот.

Инаку, сајтот на зоолошката градина обезбедува обемни информации за потенцијалните посетители, со редовни вести за настаните во неа, како и општи информации за нејзината инфраструктура, како да се стигне до неа, цени, паркинг и слично. Штета што делот со вести е малку потешкодостапен - на насловната нема линк „најнови вести" туку во тој дел се влегува преку тикерче со наслови на вестите што се вртат.

За поправање е и дизајнот којшто е претежно рамковен (со „фрејмови“), некои линкови се отвораат во нов прозорец, а деловите изведени во Флеш (како интерактивната карта на зоолошката градина) изгледаат убаво, но се попогодни за широкопојасна врска.

Сајтот изобилува со ситни динамични елементи што додаваат шмек. На пример, сликичката со животно вградена во насловната страница од левата страна се менува при секое ново вчитување, кое го поттикнува впечатокот на свежина.


Дополнување: седмично
Брзина: средна
Функционалност: добра
Код: АСП, Флеш
Дизајн: рамковен
Пребарувач: има
Клучни зборови: има
Навигација: стандардна
Гугл-ранг: 7/10
Јавен бројач: нема
Јазик: англиски
Adresa: www.brookfieldzoo.org

29 ноември 2004

Спортски резултати во живо

Веб-сајтот „Лајв скор“ е неодминлива „лектира“ за локалните обложувачи на спортски настани кои истовремено се и добри сурфери. Во моментов застапени спортови се фудбалот, тенисот и хокејот на лед. Тајната на неговиот успех не е во сеопфатноста, туку во тоа што нуди навремени, сигурни резултати, достапни на лесен начин.

Информациите за промените на тековните резултати на него излегуваат во тек на натпреварите, што овозможува следење на неколку од нив едновремено. За секој натпревар се забележуваат сите релевантни настани (жолти и црвени картони, голови, итн..) со податок во која минута се случиле. Во кодот е вклучено и автоматско "освежување", така што се добива впечаток дека се следи директен пренос.

Маана на сајтов е што архивата на минати натпревари не е достапна, при што податоците за Европското првенство од 2004 година, кои се присутни на сајтот претставуваат исклучок што го потврдува правилото.

Посетителите што ги интересираат коефициенти за обложување, „Лајв скор“ ги пренасочува кон веб-сајтот на кладилницата Вил Хил. Кај нашата публика, главен конкурент на „Лајв скор“ е сајтот на словенечката обложувалница „ТБВ спорт“, којшто нуди еден куп други јазици и функции, како на пример споредба на коефициенти извлечени директно од други големи кладилници, а и резултати од други актуелни спортови, како кошарка и ракомет.

Превид на „Лајв скор“ е што имаат ставено линк за рубрика на тема формула еден, којшто зјае празен повеќе од година дена. Општопознато е дека ако дел на даден сајт е недоработен, подобро да не се најавува, оти така се зголемуваат очекувањата на посетителите, чие неисполнување што доведува до лошо чувство, според поговорката „ако ветиш и исполниш, си дал повеќе од ветеното – ако ветиш и не исполниш, си зел повеќе од недаденото“. А секој линк е едно ветување, ветување за водење кон најавената информација.

Дополнување: постојано
Брзина: ептен брзо
Функционалност: одлична
Код: интерни апликации, Јаваскрипт
Дизајн: текстуален
Интерно пребарување: нема
Клучни зборови: има
Навигација: стандардна
Гугл-ранг: 6/10
Јавен бројач: нема
Јазик: англиски
Адреса: www.livescore.com
Датум на пишување: 29.11.2004.

МММ - Македонска музичка мрежа

МММ е водечки веб-сајт со музичко-естрадна тематика кај нас, пред сè поради тоа што авторите, брачната двојка Беќковиќ - музички новинари, секојдневно и постојано го полнат со нови, често и оригинални информации.

На сајтот се присутни вести, интервјуа, фото-галерии и слично, но (иако се најавени во менито) нема аудио записи. Демек, според нивните „убедувања, музиката не се симнува од интернет, туку се продава во соодветни продавници“.

Оставајќи ја на страна можноста за објавување музика на мрежата во промотивни цели (песните што може да се чујат на МТВ или на К-15 ниту се крадени, ниту поттикнуваат пиратерија), ваквата определба е веројатно резултат на неможноста МММ да заработи од МП3ките. Овој став можеби ќе се смени кога и во Македонија ќе може да се врши електронска трговија.

Од технички аспект, сајтот е коректно изведен, освен што интерната апликација за пребарување не ги дава сите резултатити. Така на пример, веста за новиот сингл и имиџ на Елена Ристеска, присутна на насловната страница, не се појавува при пребарувањето.
Доколку клучните зборови во кодот би се поврзале соодветно со содржините на написите, МММ би имала шанси да го надмине подобриот пласман на Гугл што за внесени имиња на пеачи го има Музика.нет.

Маана на сајтов е што за термините за коишто сеуште нема официјални решенија користат варијанти што не ги почитуваат основните правописни правила. Така на пример, наместо „веб-сајт“ користат „web-страница“, со тоа веб напишано на англиски, што директно го крши фонетското правило за увоз на зборови „пишувај како што зборуваш“. А бидејќи веб-страниците се всушност составни делови на еден веб-сајтовите, вторито дел од оваа грешка е аналоген на користење на „лист хартија“ да се означи „весник“ или „книга“.
Но, сите замерки се „ситна боранија“, бидејќи МММ ја задоволува својата основна функција – да нуди свежи информации, па служи како доказ на максимата „содржината владее“ (анг. "content is king").

Дополнување: секојдневно
Брзина: средна
Функционалност: одлична
Код: АСП
Дизајн: текстуален
Интерно пребарување: има
Клучни зборови: има, ама латинични
Навигација: стандардна
Гугл-ранг: 4/10
Јавен бројач: нема
Јазик: македонски
Лекториран: не
Адреса: www.mmm.com.mk
Датум на пишување: 29.11.2004.

Кубанско министерство за туризам

На јазикот на домородните индијанци од племето Арвак, „куба“ значело „земја“... Многубројните текстуални и графички информации на сајтов се организирани на разни начини, што овозможува на посетителите поудобно да го дознаат она што им треба. Сајтот е уреден со прилично вкус и делува убедливо – овие луѓе сепак, се трудат да привлечат странски туристи и да им ги земат парите за доброто на напатениот народ.

Еквивалент на овој сајт кај нас би бил „Истражување на Македонија“ – до којшто води линк од Министерството за економија, а на којшто не пишува чиј е и кој го одржува. На „истражувањето“ има многу општи информации за тоа што сè има во земјата, а малку практични информации за тоа како да се видат тие знаменитости. Инаку, и македонскиот и кубанскиот сајт користат Флеш-анимации за банери и хедери, што ги успорува без да придонесе во функционалноста.

На сајтот за Куба има и пребарувач на хотели, којшто на посетителите им овозможува да ги изберат условите како локација, околина (плажа, град, природа, здравствен) и категорија (број на ѕвездички), по што добиваат список на објекти според зададените критериуми. Потоа за секој хотел може да се проверат услугите што ги нуди (само преку графички приказ, и нема цени) и да се видат фотографии, а поместени се и канали за директен контакт – броеви на телефон, факс и електронска пошта.

Иако кубанското министерствово има свои претставништва во разни земји, зачудува што Македонија ја нема на списокот на држави во формуларот за контакт. На оваа тема може љубезно да им пишете на webmaster@cubatravel.cu.

Дополнување: на неколку дена
Брзина: прилично брзо
Функционалност: многу добра
Код: ПХП, Флеш
Дизајн: стандарден
Интерно пребарување: има
Клучни зборови: нема
Навигација: стандардна
Гугл-ранг: 6/10
Јавен бројач: нема
Јазици: шпански, англиски, руски
Адреса: www.cubatravel.cu
Датум на пишување: 29.11.2004.

22 ноември 2004

МАРНет – македонски регистратор на интернет-поддомени

[лекториран]

МАРНет е кратенка за Македонска академска и истражувачка мрежа (Macedonian Academic and Research Network), организација што како дел од Ректоратот на Универзитетот „Св. Кирил и Методиј" во соработка со ФИООМ во 1995 година го почна поврзувањето на македонското високо образование на Интернет.

Улогата на МАРНет за развојот на Интернетот во Македонија е огромна. Во моментот ова тело е единствениот регистратор на интернет-поддомени, односно единственото место од каде што може да „купите" (односно, изнајмите) интернет-адреса што завршува на „mk“. Упатство за изведување таков потфат можете да најдете на нивниот сајт, од каде што можете да ги симнете и соодветни формулари (во ворд и пдф-формат, без означена големина).

Преку сајтот, МАРНет овозможува и пристап до базата на веќе регистрирани адреси (поддомени), од која може да дознаете кои поддомени се зафатени, а за дел и во чија сопственост се наоѓаат.

Мора да се напомене дека Управниот одбор на МАРНет неодамна ја отповика одлуката со која од 1 мај 2003 година цената за регистрирање македонски поддомени беше подигната на 30 евра по „парче". Со тоа, нашите домени се вброија меѓу најскапите во светот. Ова доведе до протест на неколку стручњаци, но без голем одглас. Документиран е и случајот на еден сајт (www.bagra.org), кој поради тоа се откажа од своето „точка-мк" и си купи американски за десетина долари, заменувајќи го македонскиот идентитет за разликата во цената.

Неодамнешната нова, пофална одлука на УО на МАРНет ја спушти цената на македонски домени на подносливите 10 евра за една година.

Инаку, интересно е дека ова мошне важно прашање предизвика многу мал интерес во јавноста, при што како единствена куќа што постојано го следеше се покажа Метаморфозис – еден од само трите македонски извори на вести, од кој преземаат и Гугл њуз и други сајтови во кои има простор за информации за Македонија.


Дополнување: непознато
Брзина: брзо
Функционалност: добра
Код: ХТМЛ, ПХП
Дизајн: текстуален
Клучни зборови: нема
Навигација: стандардна
Гугл-ранг: 0/10
Јавен бројач: нема
Јазик: македонски
Лекториран: не
Adresa: dns.marnet.net.mk

13 октомври 2004

Хрватски „академски" сајт за вратоврски

Academia Cravatica е непрофитна установа што работи на промоција на вратоврската во Хрватска и во светот и на ширење на свеста за нејзиното потекло. Нејзиниот веб-сајт ја обработува улогата на вратоврската како медиум, и тоа на повеќе нивоа: вратоврската во културата, во медиумите, историјата, на Интернет. Целта на сајтот е да обезбеди што посеопфатни информации за овој моден детаљ, што секојдневно го употребуваат од 600 до 700 милиони луѓе од целиот свет.

„Додека во Европа беснеела триесетгодишната војна (1618-1648), во оваа трагедија биле втурнати и Хрватите, кои под водство на своите банови стигнале дури до Париз.

Хрватските војници, како дел од својата традиционална носија, на своевиден начин околу вратот си врзувале сликовити шамии. Во времето на Луј XIV, овој убав 'хрватски стил' ги освоил пребирливите парижани, кои го усвоиле овој моден предмет, носејќи го 'a la Croate' (на хрватски начин). Од тој израз потекнува коренот на новиот француски термин 'cravate'", се вели во објаснувањето на поимот за кој во македонскиот јазик се користи зборот „вратоврска".

Со оглед на тоа што кај нас и секоја малку повеќе јавна личност може, колку да се каже, да биде прогласена за „метросексуалец", без разлика на честотата на небриченост или неусогласеност на облеклото пред камери, не е лошо да се обрне внимание на азбуката на модата и на добриот вкус. А тоа почнува со запознавање на трајните вредности од таа област, како и начините на кои луѓето што сметаат дека имаат да се гордеат со нешто, го промовираат тоа.

На сајтов е особено интересен написот за изработката и за врзувањето огромна вратоврска околу античката арена во Пула. Како што повеќето машки жители на Македонија може да посведочат, најтешко било да се врзе јазолот...

Дополнување: статички
Брзина: брзо
Функционалност: добра
Код: ХТМЛ
Дизајн: базиран на текст
Навигација: стандардна
Клучни зборови: има, по пропис
Гугл-ранг: 4/10
Бројач: нема
Јазик: хрватски и англиски
Адреса: www.academia-cravatica.hr

07 октомври 2004

Гизмодо - ѕрнѕурки и тракатанци

Англискиот збор „гаџет" (gadget) на македонски се преведува со ѕрнѕурка или тракатанец, а се однесува на сите нарави, изуми, и други механички, а особено електронски продукти, кои може, но не мора да носат директна полза во животот, но во секој случај мора да му прават кеф на сопственикот.

Синоним за „гаџет" е и „гизмо", па не е ни чудо што најпопуларниот веблог за гаџети авторите го нарекле Гизмодо. Преку овој веб-магазин може да најдете информации за следните главни категории: мобилни телефони, дигитални камери, домашни системи за забава, компјутери, преносно аудио, софтвер, безжични уреди...

Во кратките вести за појава на некој нов уред често има директен линк до соодветна страница на сајтот на производителот со техничките спецификации.

Во архивата може да ги најдете сите написи од јуни 2002 г. до денес, а се подредени и според датум, според категорија, а овозможено е и пребарување според клучни зборови.

Гизмодо, инаку, го користи независниот бројач Сајтмитер и не се срами да ги остави резултатите на увид на јавноста, оти просечно има по околу 118.000 посетители на ден. Цените на огласен простор, односно на банери се движат од 1.300 до 2.000 долари месечно.

Сајтот е стандардно организиран и го користи блоговскиот софтвер Мувабл тајп, кој доаѓа и во платена и во бесплатна верзија, а комбинира елементи на статички и на динамички веб-дизајн.


Дополнување: секојдневно
Брзина: брзо
Функционалност: добра
Код: ПХП
Дизајн: стандарден
Клучни зборови: нема
Навигација: стандардна
Гугл-ранг: 8/10
Јавен бројач: има
Јазик: англиски
Адреса: www.gizmodo.com

27 септември 2004

Човеколик вонземјанин

[лекториран]

Видеоиграта „Човеколик вонземјанин" ја продолжува традицијата на дводимензионални аркадни (пукачки) игри, која замре кон средината на деведесеттите како резултат на отворањето можности за 3-д графика (посилни компјутери, подобар софтвер, како оној од Вулфштајн и Дум). Арно ама, во последниве неколку години, дводимензионалната анимација, а со неа и таквите игри, полека се враќаат на сцената, пред се во веб-варијанта, благодарение на развојот на Флеш.

Играта ве става улога на симпатичен вонземјанин чијшто брод заринкал на земјава и треба да ги преживеете нападите на властите. Изведбата ја следи формулата што ја постави класичната игра „Зелена баретка" (Green Berret) - јунакот трча од лево кон десно и на секој екран треба да ги испотепа „лошите", а на крај на нивото и нивните „шефови". Стилот на цртање потсеќа на некои од поекспресионистичките италијанските верзии на Пајо Паторот, кои се појавуваа во Микијев Алманах – со малку позамачкани линии, но ефективни. Анимацијата е одлична, а геговите и буквално крвави.

„Вонземјанинот" има доживеано толкав успех (над 6 милиони играчи) што деновиве излегува купечка варијанта за конзоли. Денешниот сајт е посветен токму на неа, и преку него може да дознаете нешто повеќе за тимот што ја прави играта (http://www.thebehemoth.com/), да погледнете како изгледаат сцени од неа преку слики и видео (во Флеш), како и да купите производи на истата тема (играчки, скејтборди). Единствено што недостига на сајтот е информацијата каде може да ја најдете и да ја играте претходната (веб) верзија. Тоа може да го сторите тука: www.newgrounds.com/portal/view.php?id=59593.

Интересно трикче на сајтот е дека најгорната фотографија се менува по случаен редослед при секоја нова посета, но од аспект на употребливоста ова не е толку ефективно, бидејќи се троши процесорско време и брзина на пристап на вчитување на новата слика при повторна скорашна посета, а не е овозможен линк до галерија во која би можеле да се видат сите такви фотки.

Играта не е лесна, но е дефинитивно заразна, па може да се случи да ви треба многу време за поминување на нивоата. Затоа не се препорачува да ја испробувате од работно место.

Дополнување: често
Функционалност: добра
Код: ХТМЛ
Дизајн: базиран на текст
Клучни зборови: само на насловна
Навигација: стандардна
Гугл-ранг: 5/10
Јавен бројач: нема
Јазик: англиски
Адреса: http://www.alienhominid.com/

23 септември 2004

Видеоиграта „Рим: Тотална војна“ (ја признава македонската самобитност)

[лекториран]

„Рим“ е најновото продолжение од успешниот серијал на стратегиски видеоигри „Тотална војна“, којшто почна со „Шогун“ и продолжи со европското „Средновековие“, што ги издаваат фирмите „Криејтив асембли“ и „Активижн“. Како и многу пред и по него, и „Шогун“ се базира на комбинирање стратегија (што да се освои низ светот - врз база на популарната игра „Риск“ или „Ризико“) и тактика (како да се водат битките - врз база на напреден тродимензионален систем).

Типичен предвесник на овој пристап е играта за ДОС „Центурион“, што може да се симне од Абандонија, а истиот се обидува да го емулира најновото издание од овој тип на Мајкрософт, наречено „Подемот на нациите“. Арно ама, додека ваквите игри на Мајкрософт, стратегискиот партнер на Владата на Република Македонија, имаат традиција античките Македонци да ги претставуваат како Грци. „Тотална војна“ има потемелен и пообјективен пристап кон историјата. Веројатно поради тоа и техничката совршеност токму софтверот од оваа игра е користен за рекреирање на борбените сцени во серијата „Пресудни битки“ на познатиот „Хистори чанел“.

Имено, покрај информациите за игрите, преку описни написи, извадоци од печатот, галерии со слики, на сајтот за „Рим“ има и календар преку кој советник (во стил на играта „Цезар 2“) ве известува за битните настани и случки на даден ден.

Известувањето за 20 септември гласи:
„Денес е роденденот на Александар Велики. Иако Римјаните го сметале за ’Грк‘ (а тој, всушност, бил Македонец), Александар исто така бил возвишуван како скоро легендарен јунак – што треба да служи за пример, поради неговата храброст и постигнувања. При тоа, пригодно ги игнорирале неговите тешки пијанчења, психотичко насилство и кон блиските и кон непријателите, како и неговите сексуални вкусови.“
Сите горенаведени игри во Македонија може да се најдат само кај локалните пирати без фискални сметки, додека ако сакате да купите оригинал, најевтина варијанта е да пазарите на лице место во странство.


За веб-сајтот

Дополнување: на неколку дена
Брзина: средно брзо
Функционалност: добра
Код: ХТМЛ, Флеш
Дизајн: микс текст/графика
Клучни зборови: има, по пропис
Навигација: стандардна
Гугл-ранг: 5/10
Јавен бројач: нема
Јазици: англиски
Адреса: www.totalwar.com

13 септември 2004

Историја на Македонија

Веб-сајтот „Историја на Македонија“ е „посветен на 2.500 години долгата историја на Македонија и македонската нација“. Неговата цел е да ги продолжи вековните стремежи за спротивставување на странските соседски пропаганди, чија цел е бришење на посебниот македонски идентитет. Средствата со кои се служи се документирање и презентирање научни и други текстови, како и насочување каде може да се најдат уште слични материјали (книги, други сајтови).

Содржините се поделени во рубрики, според периоди (античка, римска, отоманска, поделена, независна Македонија) и отворени прашања (конфликтите со грчките и со албанските националисти, македонските малцинства и симболи), а некои од написите се во форма на одговори на често поставувани прашања.

Посебен оддел исполнет со извадоци од академски и антички извори е и посветен на посебната етничка припадност на античките Македонци.

Овој веб-сајт беше недостапен од Македонија поради тоа што хостинг-компанијата каде што беше поставен забранила пристап од македонски адреси до своите сервери по ставањето на нашата земја на квазикомерцијалните црните листи на ризични хакерски подрачја. Поради тоа, сопственикот на сајтот Даниел Велјановски решил да најде нов хост со малку поотворен поглед на Македонија, по што го реактивира сајтот во текот на минатата недела.

Она што може да се поправи на сајтот се уфрлување клучни зборови и опис во кодот на страниците, отворањето на некои страници во нови прозорци, неколкуте мртви линкови (особено оној за статистиките), ставање линкови на сите сликички од десно (конзистентност), и можеби приспособување на дизајнот (кој инаку е многу фино изведен од графички аспект) на НЗС за ширина на екранот – 800 пиксели, или овозможување да се растегне на 100 проценти.

Содржините главно се дадени во прегледна, лесно читлива форма, така што може да им бидат од голема полза на сите љубители на оваа област, кои дискусиите на вакви теми сакаат да ги дополнат со цитати од авторитети. Шанса за тоа на глобално ниво ќе се појави многу скоро, со излегувањето на филмовите за кралот Александар Трети Велики Македонски (одберете барем две од звањата). Љубителите на стратегиските видеоигри исто така би можеле да ги искористат овие знаења кога му се жалат на стратегискиот партнер на Владата на РМ, „Мајкрософт“, што во неговите производи („Ејџ оф емпајерс“, „Рајз оф нејшнз“) се застапува тврдиот грчки став за идентитетот на античките Македонци.


Дополнување: повремено
Брзина: брзо
Функционалност: добра
Код: ХТМЛ
Дизајн: текст/графика
Навигација: стандардна
Клучни зборови: нема
Бројач: нема
Гугл-ранг: 5/10
Јазик: англиски
Адреса: www.historyofmacedonia.org

26 август 2004

„Маседониа срч" - пребарувач на Македонија

[лекториран]

„Маседониа срч" (Macedonia Search) е еден од најстарите македонски портали, основан од Здравко Стафилов – Мунем и Зоран Глигоров – Цезар. Иако низата трансформации, и во однос на изгледот, функционалноста и уредувачката политика, низ кои помина сајтов имаа разновиден исход, тој сепак останува едно од позначајните места на нашиот интернет-простор.

Во минатото, овој сајт беше едно од местата каде што често првпат кај нас беа применувани и испробувани разни иновативни програмски и други технологии. На него своевремено беше поставен првиот вистински македонски пребарувач, сервис за електронска пошта, автоматизирани галерии, анкети, модул за вести, флеш-видеоиграта „УЧК инвејдерс" (пародија на „Спејс инвејдерс"што се уште може да се најде преку Гугл со клучните зборови „UCK Invaders"), имаше акробации со имиња на поддомени, промоција на позитивни трендови и иницијативи, интернет-радио (МИР) итн.

Дел од старите содржини се уште се активни, иако не се во прв план (достапни преку минијатурни линкови на дното на првата страница). Тоа се архивата на вести (последната од јануари), архивата на знаењето (подолги категоризирани написи), галериите на фотомодели „очни јаболка" (eyeballs) и „најсекси модели" во кои посетителите можеа да праќаат свои слики и да гласаат (некои се поприлично разголени и сочни). Како маана може да се забележи дека листата на линкови до медиуми (од десно) на македонски и особено на англиски јазик за и од Македонија не е баш освежена.

Во моментов, главни делови на сајтот се Директориумот со линкови (се внесуваат рачно) и скриптите што овозможуваат автоматско преземање содржини од други сајтови (курсни листи, временска прогноза) и нивно презентирање на едно место. Ова е особено полезно во однос на дневните вести: МС овозможува на едно место да ги добиете и споредите насловите (директни линкови) од А1, „Нова Македонија", „Утрински весник", „Дневник", „Време" и „Вест".


Дополнување: автоматско
Функционалност: добра
Брзина: брзо
Код: АСП
Дизајн: минималистички
Навигација: стандардна
Клучни зборови: има
Гугл-ранг: 6/10
Бројач: нема
Јазик: македонски
Лекториран: не
Адреса: www.org.mk

20 август 2004

Блогот на Јован

[лекториран]

Како што може да се дознае од сајтот на неговиот блог, Јован Петров е момче од Македонија што признава дека е „зависник" од Интернет, којшто почнал да го запознава во далечната 1992 година.

Добро за сите нас е што прилично добро го има запознаено, бидејќи неговиот блог се прочу по објавувањето на анализата „Провајдерска војна - во име на народот", којашто ја објави Метаморфозис, а потоа ја имаат пренесено и други веб-медиуми, како Риалити Маседониа.

Во анализата, г. Петров (инаку, стручњак за ИТ) има изнесено видување на тековните интерни проблеми со Интернетот во Македонија, од корисничка перспектива: разните можни опции, како и конкретни предлози што може да влијаат на подобрување на состојбите (воспоставување бекбоун, укинување на монополот на МАРНет според светските искуства, укинување на лихварската концесија од 15.000 евра годишно што државата ги бара од провајдерите, со што се оневозможува на помали фирми да нудат вакви услуги...).

Освен „Провајдерската војна", која би требало да биде лектира за секој што го интересира македонскиот Интернет, блогот содржи неколку други постови и има една голема мана: нема нови. Се надеваме дека оваа состојба ќе се подобри по враќањето од летните одмори.

Инаку, искористен е стандардниот шаблон (темплејт) на Блогер (www.blogger.com), што може да го користи секој што веќе користи електронска пошта преку мејл, оти интерфејсот му е многу сличен на Јаху или Хотмејл, само што наместо испратена порака, добивате напис објавен на сајт. Ова треба да претставува поттик и за луѓе со помала технолошка упатеност од Јован да си отворат свој блог и да почнат да ги изнесуваат своите размислувања од областите за кои се стручни и упатени.

Дополнување: засега прекинато
Функционалност: многу добра
Код: интерна апликација
Дизајн: стандарден блогерски
Навигација: стандардна
Клучни зборови: нема
Гугл-ранг: 0/10
Бројач: нема
Јазик: македонски и англиски
Лекториран: не
Адреса: jovans.blogspot.com

[Дополнение: блогот е префрлен на http://jovansblog.dobroutro.com/]

12 август 2004

Глупави закони

[лекториран]

Сајтов претставува база во која се сместени разни законски акти и извадоци од закони за кои уредниците мислат дека се глупави и смешни. На посетителите им се дава можност (ако се регистрираат) да ја изнесат својата оценка за истите.

Тоа што законите се сместени во база, овозможува нивно групирање по разни основи, па и можност за извлекување закон по случаен редослед или 25 врвни закони. Некои од прилозите биле сменети или укинати, па тоа е еден од наведените атрибути.

Некои од линковите на насловната страница не работат, меѓу кои и „закони во САД“. Но и тие се достапни доколку влезете преку линкот „интернационални закони“.

Засега во базата на сајтов нема сместени закони од Македонија. Доколку имаме кандидати според критериумите за сајтов, доволно е некој локален стручњак да се логира на сајтов и да ги испрати соодветните преводи.

Инаку, сајтов е дел од „глупавата мрежа“, којашто опфаќа и сајтови со глупави предупредувања, глупави етикети за автомобили, глупави злосторства и глупави факти.


Дополнување: еднаш месечно
Брзина: релативно брзо
Функционалност: доста добра
Код: ПХП
Дизајн: стандарден
Клучни зборови: нема
Бројач: нема
Гугл-ранг: 6/10
Јазик: англиски
Адреса: www.dumblaws.com

12 јули 2004

Лери Гоник - преобразованиот стрипаџија

[лекториран]


Лери Гоник е магистер по математика и еден од најинтересните американски цртачи на стрипови на оваа денешница. Тематиката на неговите стрипови е општообразовна и научно-популарна, продолжувајќи ја традицијата на Исак Асимов и Карл Саган. Гоник е добитник на „оскарот за стрип“, наградата „Харви“ за 2003 г.

На неговиот веб-сајт може да најдете информации за неговите публикации, линкови до цели стрипчиња („Кандид во Кина“ и „Муза“), репринти на интервјуа и рецензии, и „форум“, односно блог во којшто читателите може да дискутираат преку додавање на свои коментари.

Маана на сајтот е што некои од страниците се наместени да се отвораат во ново прозорче и што има премалку скенови од стриповите. Вметнатите цртежи создаваат одлична атмосфера.

Најпознато дело на Гоник е „Стриповска историја на универзумот“, од којашто досега се излезени три тома, од предисторијата до ренесансата. Во неа, Гоник ги комбинира податоците од (нему достапните, види подолу) историски записи (секогаш добро документирани, со библиографија) со урнебесно смешни измислени дијалози помеѓу ликовите. Инаку, и Плутарх го правел истото, само без дозата на хумор. Плус, Гоник става акцент на маргинализирани појави, како статусот на жените или ниските класи, за сметка на величање на освојувачите и сличните насилници.

За македонската публика е особено интересно дека делови на македонската историја Гоник споменува или благо неопределено (Александар) или во контекст на други народи (Самоил), што е последица на тоа што нашите историчари и архелози сеуште не успеале да ги промовираат нивните сознанија во светските научни кругови, па во библиотеките во САД се достапни само интерпретациите на нашите (јужни и источни) соседи.

Арно ама, во делот за османлиските освојувања и битката за Косово (книга 3, стр. 264), Гоник ги споменува Македонците и Албанците како посебни народи, на рамна нога со Србите, Бугарите, Грците, Италијанците и Франците...

Дополнување: на неколку недели
Брзина: брзо
Функционалност: добра
Код: ХТМЛ, ЦГИ
Дизајн: базиран на текст
Навигација: стандардна
Гугл-ранг: 5/6
Јавен бројач: нема
Јазик: англиски
Адреса: www.larrygonick.com

10 јули 2004

Психологија на влијанието

[лекториран]

Роберт Чијалдини е светски познат психолог од Аризона, чија книга „Влијание: наука и практика" е лектира не само за студентите по социјална психологија, туку и за сите оние што се интересираат за тоа како да остварат или спречат такви појави - од бизнисмени, преку потрошувачи, до политиколози и гласачи.

Своите сознанија овој истражувач ги темели на испитувања на тоа како луѓето си влијаат едни на други во реалноста, на пример, студии на случаи кои финти ги користат продавачите и келнерите за да извлечат повеќе пари од муштериите, а потоа ги комбинира со резултати добиени во лабораториски услови или преку статистички методи. Негов заклучок е дека основни принципи на влијание се: постојаноста, авторитетот, реципроцитетот, допаѓањето, консензусот и скудноста.

Заедно со теоријата, основа на привлечноста на делата на Чијалдини се практичните совети за тоа како да се снајдете или да бидете ефективни во разни ситуации. На пример, при презентации, доколку имате нова информација, најавете го тоа пред да почнете. Кога презентирате логични аргументи за нешто што ви е важно, зборувајте малку пополека од обично, итн.

Покрај академската дејност, Чијалдини води и компанија што им помага на фирми да станат повлијателни, на што е посветен и веб-сајтот „Инфлуенс ет ворк" (преносен превод: влијание во практика). Покрај презентации на производите и услугите (консултации, обуки, книги и касети), на сајтот има и бесплатни содржини од кои најзначајни се тестот за влијателност (линк: „What's Your iNfluence Quotient?") и месечниот билтен со новости и кратки написи базирани врз извадоци од литература или истражувања (линк: „Inside Influence"). За билтенот е достапна и архива со стари броеви.


Дополнување: еднаш месечно
Брзина: брзо
Функционалност: многу добра
Код: ХТМЛ
Дизајн: корпорациски
Навигација: стандардна
Гугл-ранг: 5/10
Јавен бројач: нема
Јазик: англиски
Адреса: www.influenceatwork.com

08 јули 2004

Сабрина Салерно

[лекториран]

Сабрина Салерно е италијанска пејачка, актерка и забавувачка, која во средината на осумдесеттите години од минатиот век се прослави со својата фотогеничност. Иако е отсутна од малите екрани на луѓето чии видеорикордери и стари касети фаќаат прав на заборавени полици, кариерата на Сабрина во меѓувреме продолжи, и за дел од неа може да се дознае преку нејзиниот веб-сајт.

Тековната верзија на веб-сајтот е направена некаде околу 1999 година и иако на првата страница е најавено обновување во 2004 година, од него нема ни трага (освен рекламната интроанимација на таа тема изведена флеш). Сепак, и таков каков што е, сајтот нуди доволно интересни содржини за да го задржи вниманието на нејзините обожаватели.

Сајтот на Сабрина спаѓа во класичниот жанр на лични сајтови, чија цел е да пренесе информации за сопственичката и да овозможи контакт преку и-мејл или писмо. Содржините се поделени на рубриките: биографија, интервјуа, музика, слики, видео, „XXX" и поздрави.

Галериите на фотографии се збогатени со фотографии снимени во разни контексти, а особено се занимливи фотографиите што се направени од познатиот италијански цртач на стрипови Мило Манара со кого Сабрина очигледно соработувала на некој проект. Некои од фотографиите се со висок квалитет (на компресија) и се одвоени како тапети и разгледници во рубриката „поздрави". Во рубриката „видео" се наоѓа спотот од песната „I love you", а во „икс-икс-икс" - класично изненадување за ваков вид сајтови.

Посетителите со понежна душа и литературен сензибилитет веројатно ќе ги заинтригира простодушниот и речиси интимен стил на пишување што Сабрина го употребила во текстовите.


Дополнување: статички
Брзина: брзо
Функционалност: добра
Код: ХТМЛ
Дизајн: застарено шарен
Навигација: употреблива
Бројач: нема
Гугл-ранг: 5/10
Јазик: италијански и англиски
Адреса: www.sabrinasalerno.com

02 јули 2004

Македонски екстремни спортови

[лекториран]

Иксот во името на сајтот „икс-мкд“ потекнува од англиското „екстрим“ (не групата со хитот „мор ден вордс“) и се однесува на екстремните спортови: возење скејтборд, ролери или сноуборд; нуркање и параглајдерство.

За секој од спортовите има посебна рубрика (на сајтов наречени се портали), а на првата страница се вчитуваат најновите информации за секој од нив и се појавуваат ако се помине со покажувачот од глувчето врз икона-линк (рол овер). Ова доведува до впечаток на пренатрупаност, иако содржините се релативно оптимизирани, па оваа страница не се вчитува премногу бавно.

Арно ама влегувањето во некоја од внатрешните рубрики може да значи подолго чекање ако сте поврзани со обична телефонска линија, а авторите и намерно ставаат видеоклипови и други содржини што не се погодни за брзо симнување. Користењето фрејмови и слични тракатанци веројатно е причина за нискиот ранг на „Гугл“.

Добра страна на сајтов е што го прават ентузијасти и што создава чувство на градење заедница. Неговите членови, кои се од Виена до Велес, испраќаат фотографии од своите доживувања и постигнувања, а освен за спортовите, има информации и за игри поврзани со нив и друго. Стилот на пишување е жаргонски и американизиран (странските зборови, како и на македонскиот сајт за „Линукс“, и на оној од „Мајкрософт-Македонија“, не се увезуваат според правописот, туку се напишани на оригиналното писмо).


Дополнување: често
Брзина: падни-стани
Функционалност: средна
Технологии: ХТМЛ
Дизајн: пренатрупан
Навигација: густа
Гугл-ранг: 0/10
Јазик: македонски и англиски
Лекториран: не
Адреса: xmkd.com

28 јуни 2004

Глупави апликации

[лекториран]

Адресата на веб-сајтот „Глупави апликации" стоеше некое време како топик на влијателниот ИРЦ канал сеир (#seir) на Андернет, а штом е таму, автоматски добива почетна оцена плус во категоријата функционалност. Како и обично, посетата на овој сајт ги оправда очекувањата: на него навистина се претставени неколку апликации (компјутерски програми чија цел е да завршат некоја работа) и тие се навистина глупави (што ви овозможува многу смеа).

Финтата на сајтов е што е направен следејќи го шаблонот на други сајтови преку кои програмери се обидуваат да продадат свои направи. За секоја од глупавите апликации има посебен оддел, во кој е поместена страница за симнување (download), снимки на екранот (screen shots), често поставувани прашања, форум, финти и трикови, изјава за печат и оддел „што е ново".

Апликациите се „лансирач на команден промпт", „одбројувач на време", „пронаоѓач на датотеки (фајлови)", „проверувач на статусот на логирање", „генератор на случаен број" и „гледач на време". Сите се заштитени марки (trade mark).

Така на пример, „пронаоѓачот на датотеки" функционира така што ако сакате да најдете некоја датотека, односно фајл, прво ви отвора прозорче од Виндоус експлорер за разгледување (browse) преку кое ја пронаоѓате, а потоа ве известува во кој директориум (folder) се наоѓа таа. „Одбројувачот на време" одбројува од десет до нула. „Кога ви треба да одброите што било за период од десет секунди, нема да најдете посоодветна апликација од оваа", вели воведот.

Без разлика што сајтов е статички, свежината на неговиот хумор ќе ве тера да му се враќате одвреме-навреме.


Дополнување: неопределено
Брзина: многу брзо
Функционалност: одлична
Технологии: HTML
Дизајн: сезона 1999
Навигација: стандардна
Гугл-ранг: 5/10
Бројач: нема
Јазик: англиски
Адреса: www.stupidapps.com

18 јуни 2004

Еко.нет

[лекториран]

Еко.нет е почетна точка за сите заинтересирани што бараат информации и податоци од сферата на животната средина. Целта е Еко.нет да стане ваш сајт, на кој ќе можете не само да прочитате, туку и да објавите ваши сопствени вести, информации или мислења", велат луѓето што го одржуваат.

Тимот на овој сајт тоа го овозможува не само преку отворање можност за еколошките граѓански организации да презентираат свои вести преку медиумите што и се на располагање (веб-сајт и мејлинг-листа), туку и преку зголемување на нивниот капацитет преку обуки за користење компјутери, Интернет и за сајтот.

Како резултат на нивните континуирани напори, на сајтот се зачленети 320 НВО-активисти од целата земја со право да го користат за внесување вести, а нивната фреквентна мејлинг-листа, преку која дистрибуираат и ековести пренесени од медиумите, има 945 члена.

Покрај вестите, на сајтот се присутни и виртуелна библиотека со текстови и упатства за (по)ефикасна работа, законите и прописите од оваа област, екокалендар, форум и збирка полезни линкови.

[продолжение]

Дополнување: речиси секој ден
Брзина: брзо
Функционалност: многу добра
Код: ХТМЛ, АСП
Дизајн: стандарден
Навигација: стандардна
Гугл-ранг: 4/10
Јазик: македонски
Лекториран: не
Адреса: www.eko.net.mk

12 јуни 2004

Макблог

[лекториран]

Веб-сајтот Макблог овозможува водење блогови (интернет-дневници) за лица што сакаат да го прават тоа со македонски интерфејс. Иако системот е е во фаза на изработка, од изминатата недела веќе се имаат пријавено десетина блогери, кои успеале да внесат две пораки (вкупно). Некои од нив се луѓе кои веќе имаат блогови на други сервери.

За споредба, погледнете го оригиналниот блогерски сајт Блогер или Блог.хр, еден од хрватските сајтови со таква намена.

Една од клучните работи што недостасуваат кај овој обезбедувач на услуги е можноста за избор на сопствена адреса со поддомен, бидејќи еден блог треба да може да функционира како независен веб-сајт, па затоа на пример, ако отворите блог на некој од горенаведените странски, добивате адреса од типот moeime.blogspot.com или mojprekar.blog.hr. Недостига и можност за промена на изгледот по своја желба, но тоа веројатно ќе биде додадено со развој или со надградба на софтверот.

За оние што ќе се решат да се обидат да создаваат блог (веб-дневник) еден совет од хрватските стручњаци:
„Не залажувајте се со илузијата дека блогот го пишувате за некоја голема публика. Публика, па што е тоа? Пишувајте за себе, а ако некој дојде... ќе дојде. Иако е убаво да се гледа како расте бројачот на статистика, не сфаќајте го пресериозно... Смирете го егото. Пишувањето опушта, а вие станувате човек на кого делењето му станува второ јас (башка, во секој момент може да престанете). И да, апсолутно игнорирајте ги уредничките листи (на квалитет)... Тие се патокази, но не се ниту совршени ниту конечни. Вашиот блог е само парченце во интернетскиот простор и, како и секој друг веб-сајт, не мора да биде забележан на никакви листи со субјективни наметнати критериуми. На блогот сте сами за себе“.

ЗА ВЕБ-САЈТОТ

Дополнување: непознато
Брзина: просечна
Функционалност: добра
Код: ХТМЛ, ПХП
Дизајн: минималистички/занемарен
Навигација: употреблива
Гугл-ранг: 0/10 (тазе)
Јазик: македонски
Лекториран: не
Адреса: www.makblog.org

27 мај 2004

Ирачка Басра

[лекториран]

„Полковникот Џон Бојд рече дека најголема слабост што една личност или нација може да ја има на морално ниво, кое е највисокото ниво на војната, е ако постои контрадикција помеѓу она што го кажува и она што го прави. Од тоа, сметам дека следува оти основната дефиниција за психолошки операции (амер. psyops) во современите војни од четврта генерација не го опфаќа она што го кажуваш, туку она што го правиш“, вели американскиот експерт за воена стратегија Вилијам С. Линд (www.antiwar.com).

Авторите на сајтот „Ал Басра" велат дека првобитно го основале (во април 2003 година) за да ги претстават историјата, културата, традициите и уметноста на градот Басра. Арно ама, војната и окупацијата ги натерале „да го сменат правецот за да обрнат внимание на тековната ситуација преку напори на посетителите да им се обезбедат факти и извештаи за империјалистичкиот терор против Ирак, на арапски и на англиски јазик и преку мултимедија. Најпосле (историски гледано) отпорот против сите окупатори почнувал во Басра.

На веб-сајтот има најразлични содржини: од фотогалерии (меѓу кои и оние со мачењето на затворениците во Абу Граиб), линкови со вести, преку видеа, флешови, до можност за симнување на ирачки патриотски песни и пауер-поинт презентација во која се измешани сцени од филмот за Исус „Страдание" со фотографии од војната.

Дилетантскиот дизајн изведен во ХТМЛ се одликува со грдост, ама на најголем дел од илјадниците посетители (според независниот бројач) и на машините за пребарување кои го имаат високо рангирано изгледа дека тоа не им пречи.

Мана на веб-сајтов е што линковите, дури кон сопствените страници, ги отвора во нов прозорец. Покрај тоа, во некои од страниците има вметнато и аудиофајлови кои „се полнат" во заднина и ако сте на модем може сосема да ви ја задушат линијата, а тој процес може да се прекине само ако го затворите целиот прозорец. Така, додека ја гледате страницата со фотографии на маскираните борци од Фалуџа, почнува да свири песна на арапски, при што ако ја оставите страницата отворена, ќе утврдите дека е комплетна ем-пе-тројка.


Дополнување: секојдневно
Брзина: релативно брзо
Функционалност: ефектно
Гугл-ранг: 5/10
Јазик: англиски и арапски
Адреса: www.albasrah.net

12 мај 2004

Унгарско забавување

[лекториран]

Ако се земат предвид фактите дека унгарска принцеза била снаа на царот Самуил, а и дека севкупниот развој на телекомуникациите во Македонија е под големо влијание на искуствата на унгарскиот капитал, зачудувачки е колку малку Македонците знаат за оваа пријателска земја.

Како убав вовед може да послужи веб-сајтот „Фотки од журови", направен по принципот „од млади за млади". Поделен на неколку рубрики тој нуди сликовити записи од јавни забави што се одржуваат по дискотеки во Будимпешта. Покрај фотографии (fotok), достапни ви се и видеоклипчиња (vodeok) и звучни записи во ем-пе-три формат (zenek).

Богатите фотогалерии се направени во класичен стил, со чист ХТМЛ, при што една страница може да содржи од неколку десетици до неколку стотици мали сликички, кои претставуваат линкови до големи верзии (димензии минимум 1.200х1.600 пиксели, или обратно).

Домашен еквивалент на овој сајт се галериите „eyeballs" и „модели" на www.org.mk и потсајтовите на www.tonight.com.mk.


Дополнување: речиси секој викенд
Брзина: брзо
Функционалност: одлична
Гугл-ранг: 0/10
Јазик: унгарски
Адреса: www.partyfotok.hu

11 мај 2004

Безжична Естонија

[лекториран]

Ах, овие Естонциве! Не само што нивниот парламент во 2000 година со закон го има вклучено правото за пристап на Интернет во корпусот на основни човекови права, туку и навистина работат на случајот.

Пред некој ден во написот за нивната Академија за електронско владеење споменавме некои статистики, па да се надоврземе со уште една: над 66 отсто од нивната територија е покриена со базни станици за безжичен пристап на нет.

Во моментов, околу две третини од вкупно 280 такви „жешки точки“ (hot spots) нудат бесплатни услуги. Ентузијастот Вељо Хамер (уредник на вај-фај.ее) ги убедил локалните нафтени компании да инсталираат базни станици во бензинските пумпи.

Зоната на дејство на секоја таква станица е одбележана со „сообраќаен“ знак, така што доколку имате лаптоп со безжична картичка може да се закачите на нет веднаш штом ќе стапнете во неа. На сајтот вај-фај.ее има и географска карта на која сите зони се прецизно и детално одбележани.

На истото место, Вељо и неговите соработници ги документираат вестите во врска со безжичноста и со нивната земја. На секоја од нив посетителите можат да оставаат коментари, на сајтот има и јавен форум што служи за дискусии и одговарање на прашања на посетителите.

Назад во нашата реалност: во Република Македонија рестриктивните монополски закони забрануваат јавна употреба на безжична технологија. Засега ваков вид врска е возможен само во рамките на една фирма. Официјалниот број „жешки точки“ е нула.


Дополнување: повремено
Брзина: брзо
Функционалност: одлична
Гугл-ранг: 5/10
Јазик: англиски и естонски
Адреса: www.wifi.ee

10 мај 2004

Отворете си блог

[лекториран]

Долго пред да „излезат" „реалните шоуа", главно млади ентузијасти ги искажуваа разните страни на својот карактер преку своите лични веб-страници [сајтови]. Во последните неколку години тој тренд главно се одвива преку блогови (веб-логови, односно дневници на веб). Иако блоговите прераснаа во посебен жанр, во кои освен лични случки и ставови се пренесуваат и вести и други типови информации (особено кај оние што се развиваат како дел од веќе етаблирани сајтови на тие теми), тие се уште остануваат извонредно достапно средство за индивидуално изразување.

Веб-страницата [сајтот] http://www.blogger.com/ овозможува бесплатно отворање блог на начин што му е близок на секој што има користено веб-пошта. Одбирате логин и лозинка, ги внесувате основните податоци и одбирате име на блогот, одбирате изглед (кој подоцна може да го менувате) и веднаш може да почнете да ставате написчиња. Пожелно е да знаете малку HTML, но не мора - покомплицираните функции, како вметнување слики, ќе ги научите во óд. Постои можност и да се приклучите на веќе постојни блогови на истиот сервер или да поканите пријатели да се вклучат во вашиот.

Со отворањето на блогот фактички добивате своја веб-страница, до кој може да пристапите преку адресата составена од името на блогот на кое се додава blogspot.com. Така на пример, најпознатиот македонски блог, блогот на Ана, има адреса macedoniania.blogspot.com. Постојат уште неколку други домашни блогови, меѓу кои razvigor.blogspot.com и seir.blogspot.com.

Дополнување: во зависност од корисниците
Брзина: брзо
Функционалност: одлична
Гугл-ранг: 10/10
Јазик: англиски
Адреса: www.blogger.com

05 мај 2004

Библиотеката на Конгресот на САД

[лекториран]

Мисијата на Конгресната библиотека е да ги направи своите ресурси достапни и полезни за Конгресот и за американскиот народ. Преку своите веб-сајтови (подсајтови) таа нуди широк пристап на јавноста до широк опсег на информации, особено историски материјали. Почетната адреса служи како портал од кој се разгрануваат разни области, според поле на интересирање (историја, право, светски култури...) или целна група (истражувачи, библиотекари/архивари, наставници, деца, издавачи, луѓе со специјални потреби, слепи, нови посетители).

Библиотеката содржи повеќе 128 милиони предмети (29 милиони книги, 2.7 милиони снимки, 12 милиони фотографии, 4.8 милиони мапи, 57 милиони ракописи), а должината на нејзините полици за книги изнесува околу 850 километри. Библиотеката е основана во 1800 година и има одиграно огромна улога во создавањето на САД како општество базирано на знаење, како и во успешноста на оваа држава.

Преку централниот портал може да се пребаруваат и сите каталози, а и да се следат вести за активностите на библиотеката, од тематски проекти (на пример повторна средба на ветерани од Втора светска војна овој месец), приредби на уметници, вебкасти, до прозаични апликации од типот „на денешен ден".

Дополнување: континуирано
Брзина: брзо
Функционалност: одлична
Гугл-ранг: 9/10
Јазик: англиски
Адреса: www.loc.gov

04 мај 2004

Академија за е-управување

[лекториран]

Академијата за е-управување се наоѓа во Талин, главниот град на Естонија. Таа претставува заедничка иницијатива на УНДП, Институтот отворено општество и Владата на Естонија, чија цел е трансфер на знаења за успешни реформи во другите земји во развој, како и истражување на искуствата собрани при изградба на информациско општество.

Веб-сајтот на Академијата има „чист“ ненападен дизајн, при што хоризонтално „горно“ мени овозможува брз пристап до рубриките (обуки, истражувања, вести за настани, галерија). Информациите се дадени прегледно, а одделните поткатегории во секоја рубрика се најавуваат во менито од левата страна при влегувањето.

Основна компонента на образовниот дел се петдневните курсеви, кои ги запознаваат учесниците со естонските состојби и искуства. Вкупните трошоци за курсот по учесник (сосе патот) изнесуваат до 2.000 долари.

Инаку, мултикултурна Естонија има 1.4 милиони жители, од кои 45 отсто се на Интернет. Училиштата и јавниот сектор се поврзани 100 отсто, а стопанството 71 отсто. За споредба, локални стручњаци имаат проценето дека максимум 5 отсто од 2 милиони жители на Македонија се на Интернет, а за другиве ставки одговорните владини служби не издаваат информации.

Истражувачкиот оддел на Академијата се занимава со макрополитики, со фокус на темите ИКТ и корупција, слободен софтвер, е-демократија, е-права и со употреба на безжична технологија во јавниот сектор.


Дополнување: речиси секоја недела
Брзина: брзо
Функционалност: одлична
Гугл-ранг: 5/10
Јазик: англиски, руски, естонски
Адреса: www.ega.ee

30 април 2004

Калифорниски музички награди

[лекториран]

Калифорнија е една од најголемите американски сојузни држави и, кога би се осамостоила, пак би била една од најбогатите земји во светот. На сајтот посветен на изборот на калифорниски музички награди (порано познати како „бами") и вам ви се дава можност да гласате за некој од номинираните естрадни уметници.

Во конкуренција се и светски познати имиња, чии кариери ги поддржуваат мегакорпорации и независни „локални херои", групи кои работат по принципот сами свој жур. Така, рамо до рамо се „Грин деј" (Green Day), „Каунтинг кроуз" (Counting Crows), „Но даут" (No Doubt), „Антракс" (Antrax), наспроти „Маргиналните пророци" (Marginal Prophets) - состав на стрипаџијата Кит Најт од www.kchronicles.com.

Главен спонзор на изборот е локалната самоуправа на градот Оукленд (до Сан Франциско). Како крунски настан на изборот е најавен бесплатен концерт (на 6 јуни) на кој се очекуваат десет илјади луѓе.

За да гласате треба да се регистрирате. Како и дизајнот на сајтот (чист ХТМЛ), процесот е едноставен, без малтретирање и барање податоци кои би ја загрозиле вашата приватност.


Дополнување: автоматско
Брзина: брзо
Функционалност: многу добра
Гугл-ранг: 5/10
Јазик: англиски
Адреса: www.californiamusicawards.com

29 април 2004

Руски фестивал на стрипови

[лекториран]

Словенските јазици кои се зборуваат надвор од просторите на бивша Југославија и кај кои стриповите не дошле во вид на „ремени" односно „ленти" (превод на „стрип") објавувани во дневните весници пред Втората светска војна, за стрип го употребуваат зборот „комикс" - директен увоз од тековниот англиски.

Рускиот веб-сајт „Ком-мисија" е посветен на фестивал на стрипот што се одржува помеѓу 23 април и 4 мај оваа година, а за кој пријавувањето се врши преку веб. Фестивалот е со меѓународно учество и поддржан од импресивен број спонзори.

Визуелно, сајтот оддава пријатен впечаток, комбинирајќи елементи својствени на советската традиција за дизајн на плакати и на светски стриповски сензибилитети (франкофонски, американски и јапонски). Технолошки гледано, сајтот одлично ги интегрира ХТМЛ и флеш, користејќи ги нивните предности соодветно, без пренатрупување.

Содржински сајтот е поделен на оддели во кои се дава лична карта на фестивалот (со програма), каталог на делата на учесниците (графички новели, фотострипови и стрипови во флеш), новости за настаните, дел за пријавување и форум.

Дополнување: на неколку дена
Брзина: релативно брзо
Функционалност: одлична
Гугл-ранг: 5/10
Јазик: руски
Адреса: www.kommissia.ru

27 април 2004

Кромидот

[лекториран]

„Кромидот" (The Onion) е сатиричен весник кој себеси се нарекува „најфиниот извор на вести во Америка". Покрај печатеното издание со долгогодишна традиција, тој одамна пали и жари и на Интернет, а од неодамна воведе и претплата на сајтот од 30 долари годишно, со која претплатниците ќе добијат пристап до нови содржини (како лични веб-сајтови на колумнистите) неоптоварени со реклами. Утеха за обичните посетители е дека основниот дел на сајтот ќе им биде достапен, како и досега.

Концептот на списанието се темели на карикирање на вестите за тековните политички состојби со огромна доза ведар сарказам и гледање сеир.

Особено се смешни написите и измислените интервјуа и анкети во кои се известува за настаните од животот на обичните луѓе (на пример, една жена се уште изгледа добро иако има 32 години) или, пак, за обични работи од животот на политичарите и на славните (тој и тој и жена му се задоволни од нивниот заеднички сексуален живот). Хуморот доаѓа и од стилот на пишување, со кој се оди или во очигледни генерализации, или во „најпрецизни" детали, исмејувајќи го преку имитирање стереотипизирањето присутно во обични муабети.

На сајтот има и рубрика „деновиве пред години" преку која може да видите за што пишувал весникот на насловната страница уште пред Втората светска војна - и се уште е смешно.


Дополнување: секоја среда
Брзина: брзо
Функционалност: одлична
Гугл-ранг: [8]/10
Јазик: англиски
Адреса: www. theonion. com

24 април 2004

Скопјанецот Дејвид Еверет

[лекториран ]

Дејвид Еверет е фотограф кој живее и работи во Скопје. Неговиот веб-сајт има едноставен и прегледен дизајн, без непотребни елементи кои правеле побавен. На некои места навигацијата е неконзистентна, но посетителот може лесно да се снајде со притискање на копчето за „назад" на својот пребарувач.

На сајтот има неколку секции во кои авторот изложува информации за своето американско-македонско семејство, патувања и за фотомоделите со кои работи и ги застапува.

Галериите со фотографии опфаќаат општи теми (мртви природи, пејзажи) и луѓе (претежно женски). За некои од фотомоделите (како Ана и Верица) има и посебни страници преку кои се доаѓа до нивното мини-портфолио со по десетина фотографии и информации за моделите, за тоа каков тип работа ги интересира (фотографски жанрови: модна фотографија, гламур, фитнес, костими за капење, портрети), дали би се согласиле да снимаат разголени фотографии или не, и слично.

Еверет е задоволен со учинокот на сајтот, бидејќи му овозможува да стапува во контакт со клиенти од странство и да користи Интернет за брз транспорт на нарачани фотографии. Добра практика што ја применува за промовирање на своето дело е што се зачленува на други сајтови за фотографија (на пример www.onemodelplace.com) преку кои привлекува потенцијални муштерии.

Дополнување: на две недели
Брзина: релативно брзо
Функционалност: задоволителна
Гугл-ранг: 0/10
Јазик: англиски
Адреса: http://www.deverette.com