30 ноември 2006

Научнофантастичен агол

[лекториран]

„Научнофантастичниот агол“ го води Франческа Блек, која е уредничка и авторка на написите на веб-сајтот. Цел на веб-сајтот е промовирање на научната фантастика, која таа ја дефинира како „форма на шпекулативна белетристика, која во принцип го разгледува влијанието на замислена наука и технологија на општествено и индивидуално ниво“.

Најголем дел содржини на „Аголот“ се реклами за производи произлезени од познати научнофантастични серијали („Војна на ѕвездите“, „Ѕвездени патеки“, „Екс-фајл“, „Зона на самракот“, „Галактика“ и други), но има и написи за влијанието на жанрот во општеството, потеклото и вредноста на одредени дела. Покрај тоа, присутни се и вести поврзани со тие клучни зборови што ги презема од Диг преку иксемел.

Основен недостиг на веб-сајтов од аспект на употребливост е отворањето нови прозорци без експлицитно барање на корисникот. Оние што користат нови верзии на Фајерфокс може да си приспособат ваквите прозорци да им се отвораат во нови јазичиња, но за другите тоа значи дополнително трошење мемориски и процесорски ресурси, најчесто непотребно.

ЗА ВЕБ-САЈТОТ

Дополнување: често
Брзина: брзо
Функционалност: средна
Код: ХТМЛ
Дизајн: текстуален
Навигација: променлива
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 2/10
Јазик: англиски
Адреса: www.science-fiction-corner.com

14 ноември 2006

Одбери еден, сите се исти и онака

[лекториран]

„Одбери еден, сите се исти и онака“ е блог што го основале „неколку девојчиња“ оти, наводно, морало „нешто да се преземе по сите настани“ што и се случуваат „на една просечна сингл грл во оваа наша средина“ и пошироко. Примарната активност е катарзично споделување вицкасти анегдоти.

Уредувачката политика на анонимните авторки на блогов се карактеризира со проактивност, која се огледа во пријавување по агрегатори, сервиси за следење блогови и поттикнување размена на линкови со други блогови.

Низ постовите провејува тенденција на воспоставување визуелен идентитет преку користење илустрации за дополнувања на впечатокот, претежно карикатури или фотографии што ја одразуваат содржината или создаваат асоцијации.

Предолгото и тешко за прецизно помнење име на доменот, исклучивата употреба на здебелен (болд) текст и пишувањето на македонски со транслитерација на англиска латиница ја намалуваат употребливоста на блогов. Отстранувањето на овие недостатоци во раната фаза на неговото постоење ќе придонесе за намалување на потребата за кореспонденција со оние што ќе го линкуваат во иднина, имање алтернативи кога нешто ќе треба да се нагласи во постовите, како и за овозможување повеќе луѓе што пребаруваат на македонски (со кирилица) да го пронајдат блогот според содржините.

Дополнување: често
Брзина: брзо
Функционалност: мн. добра
Код: ХТМЛ (блогер)
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 0/10 (нов сајт)
Јазик: македонски
Адреса: odberiedensiteseistiionaka.blogspot.com

11 ноември 2006

Омниглот: јазиците и азбуките од цел свет

[лекториран]

„Омниглот“ е веб-сајт што нуди ресурси во врска со јазиците и системите за пишување од целиот свет. Особено е практичен одделот за корисни фрази и чести изрази на разни јазици од целиот свет, но тоа е само дел од широкиот дијапазон на речиси енциклопедиското знаење што се содржи на сајтов.

Претставени се речиси сите азбуки и системи за пишување што се моментално во употреба, како и некои старовремски и „вештачки“ - направени за потреби на измислени јазици и слично. Присутни се и информации за некои од јазиците поврзани со тие системи, како и написи на разни јазици, особено од областа на социолингвистиката, совети за учење јазици и книжарница.

Особено се полезни страниците со линкови што овозможуваат пристап до други сајтови на сродни теми, или по теми. На пример, на прашањето како се пишува вашето име со најразлични азбуки од светот се одговара преку линкови до специфични страници од веб-сајтови за кинески, арапски, јапонски..., кои го нудат одговорот во рамките на нивната област. Дополнително и логично, „Омниглот“ има и блог на кој ги забележуваат активностите или ставаат понеформални написи.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски и други
Адреса: www.omniglot.com

07 ноември 2006

Претседателот на Киргистан

[лекториран]

Веројатно не е коинциденција што еден од ретките веб-сајтови од Киргистан што е достапен деновиве преку Интернет е веб-сајтот на нивниот претседател.

За жал, ниту сајтовите за вести на руски или на англиски, како ни оние на повидните невладини организации не се достапни за посетители од странство од почетокот на антивладините демонстрации минатата недела.

Од уредувачки аспект, содржината на веб-сајтов е очекувана, а се состои претежно од протоколарни информации, изјави на претседателот по разни прашања и позитивни вести.
Сајтот е изграден на платформа од слободен софтвер и користи Фри БСД-оперативен систем.

Единствено што на прв поглед паѓа в очи е што сликите се неоптимизирани за веб, односно поради нискиот степен на компресија го забавуваат вчитувањето на страниците.


ЗА ВЕБ-САЈТОТ

Дополнување: секојдневно
Брзина: средна
Функционалност: средна
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: киргиски, руски, англиски
Адреса: www.president.kg

19 октомври 2006

Блогот на Рибаро

[лекториран]

Блогот на Рибаро е еден од македонските блогови од сервисот Блогерај, со растечко влијание, што се одразува и на неговата посетеност. Во однос на содржините, авторот Јане Ѓорѓиоски има еклектичен пристап, презентирајќи мислења и творби на најразлични теми, од блогот како медиум до презентирање сопствена и поезија од други автори.

Карактеристично за блогот на Рибаро е што за линкови до други блогови во блогролот користи банери-сликички што сам ги изработува, а истата практика ја применува и за други видови линкови. Ова го забавува вчитувањето на блогот, но му дава карактеристичен шмек. Некои од таквите банерчиња се појавуваат двојно: и во десната и во левата колона, за што нема преголема потреба.

Употребливоста на постовите од овој блог може да се подобри со користење поуедначена големина на фонтови и употреба на празниот простор меѓу редовите и графичките елементи.

Авторот го уредува и блогот „Јас Јуриј Г.“, кој своите содржини ги црпи од истоимената книга на починатиот поет Горан Иванов Крстевски (1971-2003), обезбедувајќи нова форма на достапност на поезијата.


ЗА ВЕБ-САЈТОТ

Дополнување: често
Брзина: брзо
Функционалност: добра
Код: друпал
Дизајн: комбиниран
Навигација: графичка
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 3/10
Јазик: македонски
Адреса: ribaro.blog.com.mk

13 октомври 2006

Долгата опашка

[лекториран]

Долгата Oпашка е термин со кој се опишуваат деловните и економски модели на компании како Амазон или Нетфликс. Потекнува од статистиката и се однесува на дистрибуции кај кои прво има популација со висока амплитуда, по која следува „долга опашка“ од настани со ниска амплитуда, кои кумулативно може да бидат повеќе или потешки од оние „високите“.

Во однос на Интернет, Долгата Oпашка (The Long Tail) првпат е употребена од уредникот на списанието „Вајерд“ Крис Андерсон во 2004 година, врз база на есеј од Клеј Ширки, кој забележал дека релативно мал број блогови имаат многу линкови кон нив, додека до долгата опашка од милиони други поединечни блогови водат релативно малку линкови.

Андерсон, кој во меѓувреме има напишано и книга на темата, тврди дека иднината на продажбата е на производи за кои има мала побарувачка или обем, но кои колективно може да се продадат во поголемо количество од некои хит-производи. Во основа, се работи за премин од масовен пазар кон милиони ниши. Овој пристап, во комбинација со каналите за дистрибуција што ги отвора користењето Интернет, отвора огромен потенцијален пазар во сите стопански гранки.

Покрај издавањето на книгата, Андерсон има отворено блог на кој ги следи темите изложени во неа, презентирајќи нови примери за примена на концептот во реалниот живот. На блогот се достапни и написи и извадоци од книгата, полезни за вовед во концептот.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: тајппад
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: има
Гугл-ранг: 7/10
Јазици: англиски
Адреса: longtail.typepad.com

06 октомври 2006

Стрипот „Слободен пад“

[лекториран]

„Слободен пад“ (Freefall) е популарен стрип што излегува на Интернет [веб-стрип], чиј автор е Марк Стенли. Во него е изложена хумористична научнофантастична сторија за неволјите на вселенскиот брод „Дивата кокошка“ чиј екипаж го сочинуваат Сем Старфол - симпатичен вонземски трчилаж, Хеликс - детинест робот и Флоренс Емброуз - припадник на генетички модификуваниот вид „Боуменов волк“ (т.е. антропоморфно суштество од родот кучиња).

Стенли го објавува стрипот од 1998 година и досега се објавени над 1.300 ремени. Стрипот оригинално бил црно-бел, но првите 388 стрипа се достапни и во верзии обоени од неговите читатели. Од 21.4.2006 година стриповите официјално ги бои Џорџ Патерсон.

Сторијата го опишува животот на Флоренс, чесен и работлив технички инженер, која е грабната да работи за не-баш-етичкиот Сем. Од почетокот на стрипот, Флоренс се обидува да го поправи вселенскиот брод на Сем, истовремено трудејќи се да не полуди поради глупостите што ги прават Сем и Хеликс. Лошата репутација на Сем на планетата Џин на која се заринкани е толкава што властите го обвинуваат за каква било лоша случка појава во нивното општество. Тој носи скафандер со нацртан смешен лик, но наводно неговото вистинско тело личи на сипа.

„Слободен пад“ одржува доба репутација во однос на научната основа, која авторот се труди да ја одржи на реалистично ниво, без употреба на уреди од типот deus ex machina (односно „магични“), како што е „ворп погон“, „вештачка гравитација“ или „зраци за транспортирање“. Стрипот содржи и интерни шеги на сметка на „Ѕвездени патеки“. На пример, регистарскиот број на бродот е 1071-CCN, што е обратно од оној на „Ентерпрајз“ NCC-1701.

ЗА ВЕБ-САЈТОТ

Дополнување: трипати неделно
Брзина: брзо
Функционалност: одлична
Код: ХТМЛ
Дизајн: стриповски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазици: англиски
Адреса: freefall.purrsia.com

26 септември 2006

Писателот на научна фантастика Роберт Џ. Сојер

Роберт Џ. Сојер е еден од најинтересните современи писатели на научна фантастика. Тоа што е Канаѓанец и во своите текстови често ја вградува канадската перспектива не му пречело да освои најпрестижните награди за жанровски дела - Хуго и Небула. Тие се доделуваат во САД и во недостаток на меѓународни структури се сметаат за признанија на светско ниво.

Врз база на веб-сајтов може да се направи студија на случај за добри практики за промоција на еден уметник-автор: идните читатели имаат можност да се запознаат подобро со неговото дело преку извадоци, а тековните читатели да ги надградат своите сознанија и да дознаат што е наредно во сериите романи кои ги привлекле кон него (како на пример, „неандерталската паралакса“).

Особено импресионира делот кој е наменет за контакт со медиумите. Покрај вообичаените фотографија со голема резолуција, работни и биографии (CV) во куси и долги форми, достапни се и линкови до веќе направени интервјуа, цитати, па дури и листа на контроверзни теми со основни информации за кои Сојер е спремен да зборува јавно - фактички синопсиси на интервјуа.

Стилот на пишување на Сојер најмногу наликува на оној на Карл Саган, а во неговите дела соодветната научна основа (физика, палеонтологија, социологија) се комбинира со горливи прашања како сексуалноста, отуѓеноста, улогата на религијата и атеизмот, комбинирани со солиден развој на ликови.


Дополнување: повремено
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.sfwriter.com
Датум нa пишување: 26.09.2006.

14 септември 2006

Мерач на општествена поврзаност

[лекториран]

„Соушал митер“ (социјален метар) е алатка која ја мери општествената поврзаност на даден веб-сајт, преку пресметување на бројот на линкови (врски) што водат кон него од социјални веб-сајтови - чија основна функција е линкување, било автоматски, било со човечко учество.
Со внесување на адресата на веб-сајтот се добива бројка што потоа може да служи за споредба со други слични веб-сајтови, од што се може да се добие прилично јасна претстава за нивната влијателност на интернет.

Така на пример, веб-сајтот на Белата куќа има ранг од 177594, додека веб-сајтот на Владата и претседателот на Република Македонија имаат ранг 326, односно 54.

Овој веб-сајт е одличен пример за користењето на новата технологија за развој на вебот Ајакс (Ajax, Asynchronous JavaScript and XML), која овозможува подобра интеракција помеѓу корисникот и веб-страниците преку интелигентна размена на мали количества информации „зад сцената“.


ЗА ВЕБ-САЈТОТ

Дополнување: автоматски
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 0/10
Јазик: англиски
Адреса: www.socialmeter.com

31 август 2006

Терапија-точка-нет

Терапија е хрватско е-списание „за звук и слика“ основано во 2001 година, кое пренесува редовни вести и информации од светот на индустријата за забава. Концепцијата му е слична со македонското е-списание „Плагиј.ат“, со кое имаат разменето и банерчиња.

Голем дел од написите се авторски текстови, особено извештаи од настани исполнети со оригинални фотографии, кои овозможуваат интимна, а напати и објективно информирање.
Покрај вестите, на веб-сајтов се поместени неколку интересни функционалности, како на пример листа на последните пребарувани поими по нивната база, сродни написи на тековниот, цитат на неделата, најави и конкурси и слично.

Она што би ја зголемило употребливоста и видливоста кај машини за пребарување е поставување на линковите и на насловите на написите кои се најавуваат на насловните или страниците со содржини. Би помогнало и прилагодување на клучните зборови и описите на страниците за секој напис посебно.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: АСП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: хрватски и англиски
Адреса: www.terapija.net
Датум на пишување: 31.08.2006.

Махатма, е-списание за антиглобализам и геополитика

НВО „Магна карта“ од Велес го објавува електронското списание за антиглобализам и геополитика „Махатма“. Декларираната цел на списанието е обогатување на духовниот капитал на младата популација.

На веб-сајтот пишува дека се работи за втор број на списанието, но за жал никаде не е поставен линк до првиот број, односно до архива на стари написи. Ставањето на огромна слика на насловната страница можеби би имало ефект кај печатено списание, но вака само го оддложува патот до содржините, и за посетителите, а особено за машините за пребарување кои и покрај повеќемесечното постоење не го покриваат многу сајтов, делумно и поради пренасочување од официјалната адреса на друг сервер.

Од аспект на употребливост, повеќето дизајнерски решенија би можело да се подобрат, особено со воедначување на стилот на пишување, некористење на црна позадина и бели букви, прошарани со разни бои за истакнување на некои содржини. Ако веќе мора да се користи црна позадина, подобро е буквите да бидат сивкасти, оти вака јакиот контраст дополнително го отежнува читањето.

Прегледот на содржините го отежнува и расплинетоста на линковите до рубриките, како и нивното мешање со разнобојните изјави со статистички податоци без референциран извор со кои се исполнети страничните колони. Можна цел на нивното поставување е сублиминална индоктринација, или иронично претставување на ’вистини‘ кои кружат во кафеанските муабети, како колку „петоколонашки и шпионски“ НВО-и има во Македонија или колку народи без своја држава има во светот.

ЗА ВЕБ-САЈТОТ

Дополнување: неопределиво
Брзина: средна
Функционалност: средна
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 0/10
Јазик: македонски
Адреса: www.mahatma.ecarta.info
Датум на пишување: 31.08.2006.

Механичкиот Турчин – вештачка вештачка интелигенција

Оригиналниот „Механички Турчин“ бил лажен робот со лик на Турчин кој играл шах, направен во 1769 година од измамникот Волфганг фон Кемпелен. „Роботот“ всушност криел џуџе кое бил одличен шахист, кој ги победил дури и Бенџамин Франклин и Наполеон.

Увидувајќи дека има некои задачи кои луѓето ги вршат подобро од компјутерите, „Амазон.ком“ има разработено систем за интегрирање на природната човечка и вештачката интелигенција на компјутерите, со користење на методите на „краудсорсинг“ (crowdsourcing). Такви задачи се е препознавање на облици на фотографии, давање оценки врз база на вкус и естетски критериуми, а и преведување на текст.

Системот на „Механичкиот Турчин“ од една страна вклучува автори или оператори на апликации кои се нарекуваат „побарувачи“, кои поставуваат прашања, а буквално секој може да стане дел од тимот на оние кои ги одговараат. За секоја добро извршена задача се добиваат пари директно на нивната сметка на „Амазон.ком“, од каде што може да ги искористат за купување од најголемата продавница на интернет, или пак да ги префрлат на своите банковни сметки.


ЗА ВЕБ-САЈТОТ

Дополнување: автоматско
Брзина: брзо
Функционалност: одлична
Код: ХТМЛ, Флеш
Дизајн: комбиниран
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: www.mturk.com
Датум на пишување: 31.08.2006.

29 август 2006

Слободен нуркач

[лекториран]

„Слободно нуркање“ (free-diving) е англиски термин, кој покрива низа активности во вода, кои ги поврзува тоа што не се користи опрема за дишење, туку се нурка со задржување на здивот.

Филмот „Слободен нуркач“ раскажува топла приказна за млада девојка, која учи како да стане врвна спортистка во длабинско нуркање на прекрасниот грчки остров Спетсес, а е направен врз основа на вистински трагичен настан. Авторот (актер, сценарист и режисер) Алки Давид и неговиот тим имаат вложено огромна енергија и љубов при снимањето.

Инаку, освен на нуркање и на снимање филмови, Давид и неговите истомисленици се посветени и на зачувување на природната околина и организираат еколошки активности за заштита на морето и негово чистење од штетните човекови влијанија.

Со концизноста и директноста, веб-сајтов може да послужи како пример за македонските филмаџии, од кои повеќето имаат покажано минимално разбирање на моќта на Иинтернет и како средство за промоција и како средство за дистрибуција на нивните дела.

Од аспект на употребливост, недостаток на веб-сајтов е отворањето на нови прозорци кај некои надворешни линкови. Иако употребата на рамки за прикажување на содржините исто така не е препорачлива оти попречуваат пристап за машините за пребарување при индексирањето, сепак страниците што ги содржат се структурирани да овозможуваат длабинско линкување.


ЗА ВЕБ-САЈТОТ

Дополнување: ретко
Брзина: брзо
Функционалност: добра
Код: ХТМЛ
Дизајн: комбиниран
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.thefreediver.org

15 август 2006

Енергетски крмак и намалување на сметката за електрична енергија

[лекториран]

„Енергетски крмак“ пренесува знаења за тоа како да се заштеди на потрошувачката на енергија во домовите, преку активности што може да доведат до намалување на сметките од 10 до 50 отсто.

Веб-сајтот има две целни групи - возрасни и деца, па е поделен на два дела наменети за секоја од нив. Делот за возрасни е базиран на текст и убедување преку изнесување факти. Делот за деца е „свет за себе“, основна намена му е усвојување на основните поими и прифаќање ставови, што се изведува преку играње одлично изработени едукативни видеоигри и интерактивен прирачник.

Притоа, се користи метафората на „енергетски крмак“, израз што се однесува на сите елементи на потрошувачката што ја поттикнуваат нерентабилноста - од користењето обични наместо флуоресцентни светилки (кои се поскапи, но траат подолго и не трошат толку струја), преку проверката и дополнувањето на изолацијата на бојлерите, ѕидовите и прозорците, до практики за ефикасно користење на компјутерите и придружните уреди.

Сите препораки се поддржани и со емпириски и научни податоци, достапни во форма на е-книги во ПДФ-формат. Во истата форма се дадени и дополнителни материјали, како учебници, водичи, квизови и други материјали за едукативни активности наменети за наставници и за деца.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ХТМЛ, Флеш
Дизајн: комбиниран
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: www.energyhog.org

14 август 2006

Лудница – уште еден „македонски забавен портал“

Името „Лудница“ оди рака под рака со степенот на ирационалност на одлуката да се вложат напори во отворање на уште еден „македонски забавен портал“, вагон во возот чија локомотива е Он.нет. Можеби популарноста на овој сајт буди надежи кај имитаторите за повторување на неговиот успех, но не е секој уредник Трендо, ниту по дух, ниту по способност за стратегија, ниту по расположиви ресурси.

Содржините на „Лудница“ се вообичаени за веб-сајтовите од овој тип: „занимливости“, видео и аудио клипови и слично, без поставени линкови до изворите на информациите. Доколку авторите, инаку велешани, продолжат со ваквата уредувачка политика, наспроти пронаоѓање на нешто оригинално или фокусирање на одредена област непокриена од друг сајт кај нас, би било добро да ги исправат барем следните пропусти:
  • Клучните зборови и описите во мета-таговите треба да ја рефлектираат содржината на страниците. Особено неискористен е делот за наслов (title), во кој може покрај името на сајтот да оди и заглавието на тековниот напис.
  • На насловната страница, линк (врска) до целото тело на веста би требало да биде насловот, за Гугл да ги регистрира зборовите во него, а не фразата „Прочитај повеќе...“. Би било добро со секој напис да стои и датумот на објавување.
  • Малите „рандом слики“ што се вртат во левата колона по случаен избор, би требало да бидат линкови до поголеми верзии. Преку изложената навигација е невозможно да се влезе во дел со фото-галерии.
ЗА ВЕБ-САЈТОТ

Дополнување: често
Брзина: брзо
Функционалност: средна
Код: ПХП (Џумла)
Дизајн: текстуален
Навигација: стандардна
Пребарувач: има
Клучни зборови: минимално
Јавен бројач: нема
РСС/Атом: има
Гугл-ранг: 3/10
Јазик: македонски
Адреса: www.ludnica.com.mk
Датум на пишување: 14.08.2006.

27 јули 2006

Култура плус

„Култура плус“ е локален сервис за купување билети за културни настани кој го покрива подрачјето на северна Далмација, со градовите Ријека, Опатија и Пула. Опфатени се концерти, театарски и кино претстави, изложби и слично.

Плаќањето може да се изврши преку неколку видови кредитни или дебитни картички. Корисничката добива ваучер кој може да го испечати, или само да го запомни бројот, кој го покажува на билетарата на местото каде што се одржува настанот, при што го добива нејзиниот билет.

„Култура плус“ игра улога и на современ културен информатор, кој известува за самите настани и идната програма од оваа област, преку практичен календар на настани. Репертоарот е проширен и со известувања за нови книги и дивидија од локалните книжарници, односно дивидитеки, како и со можноста за коментирање од страна на посетителите.

Сличен македонски сервис, кој го покрива подрачјето на Скопје, нуди веб-сајтот „Веб култура“. За жал, непостоечката инфраструктура за електронско плаќање му оневозможува соодветно да ја обавува својата функција, па како и другите слични сајтови мора да комбинира и аналогни методи, наплата „на рака“ при самата достава на билетите.

ЗА ВЕБ-САЈТОТ

Дополнување: често
Брзина: средна
Функционалност: добра
Код: АСП, Флеш
Дизајн: комбиниран
Навигација: стандардна
Пребарувач: има
Клучни зборови: делумно
Јавен бројач: нема
РСС/Атом: нема
Гугл-ранг: 5/10
Јазик: хрватски
Адреса: www.kulturaplus.com
Датум на пишување: 27.07.2006.

Девојки заглавени со коли

„Девојки заглавени со коли“ е германски веб-сајт основан 2003 година, кој нуди фотографии и видео-клипови од жени кои се обидуваат да ги ослободат нивните коли од низа ситуации, како заглавување во кал. Комбинацијата на автомобилски фетишизам и факторот „дама во неволја“ воглавно ги заинтересирува или привлекува посетителите.

Во 2004 година, овој веб-сајт ја има добиено наградата „Веби“ – „оскарот на вебот“ - во категоријата „чудно“, како и Наградата избор на народот. Иако во наредните години го нема повторено истиот успех, сепак привлекува и позитивно и негативно внимание од блогови до влијателни магазини како “Вајерд“, а особено од веб-сајтови кои нудат линкови до галерии поврзани со хумор, еротика и популарна култура.

Од аспект на употребливост, основен недостаток на веб-сајтов е користењето на рамки (фрејмови), кои оневозможуваат добар пристап на пребарувачите. Кај врските за симнување на филмчиња се следи добра пракса и нивната големина во мегабајти е експлицитно наведена.

ЗА ВЕБ-САЈТОТ

Дополнување: повремено
Брзина: средна
Функционалност: средна
Код: комбиниран
Дизајн: рамковен
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.carstuckgirls.com
Датум на пишување: 27.07.2006.

20 јули 2006

Мај спејс - мојот простор

[лекториран]

„Мај спејс“ е веб-сајт за социјално вмрежување (social networking) од Калифорнија, кој нуди интерактивна мрежа од блогови, кориснички профили, фотографии, групи и интерен систем за пораки.

Оваа виртуелна заедница, која има 300 вработени и се смета за најпопуларен веб-сајт во САД, на корисниците им нуди можност за прикажување најразлични нивни содржини (дури и видео), што делумно довело до култен статус во современата култура. Подемот на сервисот беше комбиниран со активности за вмрежување надвор од Интернет, како организирање журки за корисниците или промоција преку фотографии на некои од нив во „Плејбој“.

Низа уметници успеале да се промовираат преку овој сервис, а низа веќе афирмирани уметници имаат отворено профил на „Мај спејс“ за да ја искористат „плимата“. Наводно, меѓу нив се и Селма Хајек, Хеле Бери, Лаетиција Каста, Нели Фортадо, и Аврил Левињ.

Пред некое време 14-годишно девојче, кое се жали дека било сексуално нападнато од 19-годишник, го тужело „Мај спејс“ за 30 милиони долари, кривејќи го дека нема систем за заштита на малолетниците. Како чекор во таа насока, „Мај спејс“ не пропушта да ги потсети корисниците дека
  • „страниците и форумите се јавно место,
  • луѓето не се секогаш она што тврдат дека се - не додавајте непознати во листите на пријатели,
  • пријавете ги сите видови малтретирање, несоодветни содржини и говор на омраза,
  • не објавувајте ништо од што подоцна би се срамеле,
  • не лажете дека сте постари или помлади од тоа што сте“.
Дополнение: поопширно за феноменот „Мај спејс“.

ЗА ВЕБ-САЈТОТ

Дополнување: постојано
Брзина: брзо
Функционалност: одлична
Код: АСПХ
Дизајн: комбиниран
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 7/10
Јазик: англиски
Адреса: www.myspace.com

17 јули 2006

Како софтвер со отворен код, ама со пари!

[лекториран]

Камбриум е геолошки период од развојот на нашата планета во кој настанала најголема диверсификација на живиот свет. „Кембриан хаус“ (камбриумската куќа) работи на предизвикување слична „експлозија“ во светот на информатички решенија.
За да го постигнат тоа, оваа канадска компанија ги користи законитостите на еволуцијата и краудсорсингот (crowdsourcing) – потпирање на знаењето и вештините што ги нуди широка заедница на корисници што соработуваат преку Интернет и може да се наоѓаат каде било во светот.

Членовите може да придонесат преку изнесување идеи или преку вклучување во изработката на кодот на програмите.

За секоја извршена задача се добиваат поени, кои доколку производот почне да се продава, означуваат процент од дивидендата.

Дури и оние што не се официјално дел од заедницата може да придонесат во „војните на идеи“, каде што две идеи се ставаат една наспроти друга и читателите гласаат која им се допаѓа повеќе.

Духот на сајтов е необврзан и ентузијастички, но поддржан и со многу рационални аргументи поврзани со претприемаштвото и генерирањето профит. Дел од филозофијата е објаснета и преку блогот што го одржуваат вработените.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП/Флеш
Дизајн: текстуален
Навигација: стандардна
Пребарувач: има
Клучни зборови:
минимално
Јавен бројач: нема
РСС/Атом: има
Гугл-ранг: 3/10
Јазик: англиски
Адреса: www.cambrianhouse.com

13 јули 2006

Глобални гласови на Интернет

[лекториран]

„Глобални гласови на Интернет“ е непрофитен проект за граѓански медиуми на Правниот факултет на универзитетот Харвард. Негова цел е собирање и агрегација на разговорите на глобално ниво, користејќи ги „блогерите-премостувачи“ (bridge bloggers).

Премостувачи се блогери што зборуваат за нивната земја или регион, но се насочени кон глобалната публика. Таквите блогери може да пишуваат на својот мајчин јазик, но барем дел од нивните постови треба да е на англиски. Токму врз база на таквите содржини тие може да го заслужат вклучувањето во „Глобалните гласови“, преку репринти на постовите или директно вшмукување преку фидови.

Најинтересните постови од регионите се презентирани во прегледот на денот (daily roundups), покрај редовните секојдневни написи до кои може да се дојде преку кликнување на богатата збирка клучни зборови.

Овој веб-сајт е интересен и за новинарите и за уредниците од покласичните медиуми, особено за добивање идеи за написи, како и за добивање претстава за она што се зборува во светот. Креаторите на сајтов исто така работат на создавање глобален индекс на блогови.

Она по што се истакнува сајтов е вкусното користење мали сликички како графички линкови, од банерчињата што ги нудат за вклучување на туѓи блогови, до сликите на авторите на блогови вклучени во проектот што се менуваат во заглавието на страниците.

ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 6/10
Јазик: англиски
Адреса: www.globalvoicesonline.org

03 јули 2006

Зинедин Зидан

[лекториран]

Зинедин Зидан е француски фудбалер со берберско алжирско потекло, кого стручњаците го сметаат за еден од најдобрите фудбалери на неговата генерација. Тој епитет го има заслужено со елегантниот дриблинг, рамнотежата, способноста за поминување и прецизноста на шутот.

Веб-сајтот на Зидан
, од друга страна, не може да се пофали со вишок на употребливост. Целосно направен во Флеш, тој е речиси непробоен за машините за пребарување, што е индиректна причина за нискиот ранг на Гугл. Интензивно е набиен со мултимедијални содржини, како што е целосното видео што се вчитува автоматски, така што е погоден за посета само преку широкопојасна врска.

Информациите на сајтот се претежно биографски, како и фотографии и клипови од важни настани во кариерата на Зидан. Очигледно, како примарна публика на сајтов, авторите ги имале на ум обожавателите на Зизу, кои би се задоволиле со горенаведеното, плус со можноста да купат сувенири со негов брендинг.

ЗА ВЕБ-САЈТОТ

Дополнување: често
Брзина: бавно
Функционалност: добра
Код: Флеш
Дизајн: флешерски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 0/10
Јазици: француски и шпански
Адреса: www.zidane.fr

29 јуни 2006

Јотофото

[лекториран]

Јотофото е пребарувач за фотографии што бесплатно може да се користат. Се работи за снимки лиценцирани под некоја од таканаречените „копилефт“-лиценци, како Криејтив комонс или ГНУ ФДЛ, што ги прави особено погодни за употреба на блогови или други видови веб-сајтови.

Особено е полезен за графички дизајнери, веб-дизајнери, наставници и студенти. Меѓу другите, го препорачува и еден од највлијателните македонски блогери, Гудбајтс.

Јотофото ги има сите функционалности потребни за пребарување, приказ и преземање фотографии, особено можностите за пребарување според тип на лиценца и големина, како и логички операции со клучните зборови.

Дополнителна функционалност на сајтов му ги овозможува користењето нови технологии, како блог за бележење на техничките надградби, и правењето додавка (екстензија) за разгледувачот Фајерфокс со која се овозможува подиректно пребарување на нивната архива.

ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: yotophoto.com

15 јуни 2006

Отворена употребливост за подобар слободен софтвер

[лекториран]

„Отворена употребливост“ овозможува поврзување на програмерите што развиваат софтвер со отворен код и експертите за употребливост. Со тоа, обете гранки на софтверската индустрија имаат можност да си помогнат меѓусебе.

Веб-сајтот служи како платформа за заедничко работење, преку која може од една страна да се пријавуваат проекти чиј софтвер е со отворен код, а од друга страна да се пријавуваат стручњаци за употребливост што би сакале да придонесат со своите експертски мислења и примена на стандардите, како ИСО 13407. Целокупната активност е стриктно на доброволна база, за доброто на заедницата.

И во светски рамки, оние што развиваат софтвер најчесто не се свесни за значењето на употребливоста, сметајќи ја како „уште еден фичр“ што може да се додаде на проектот. Правилната перцепција е дека употребливоста мора да стане интегрален дел од развојот на софтверот, преку вклучување соодветни стручни лица во тимот на долгорочна база.

Во рамките на проектот се влезени 136 проекти, меѓу кои и значајни претставници на слободниот софтвер, како графичката околина КДЕ и програмата за обработка на слики ГИМП.


ЗА ВЕБ-САЈТОТ

Дополнување: често
Брзина: брзо
Функционалност: мн. добра
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 6/10
Јазик: англиски
Адреса: www.openusability.org

31 мај 2006

ЕСА - Европска вселенска агенција

[лекториран]

И во овој број „Време“ продолжува со акцијата за објавување на рецензиите на студентите на Институтот за информатика од Скопје.

ЕСА - европскиот пандан на НАСА поседува убаво уреден официјален веб-сајт пребогат со текстуални и со мултимедијални информации за постојните и за идните програми. Специјалниот мултимедијален дел е и најпосетениот дел од сајтот.

Дури и покрај огромниот број страници, навигацијата е релативно лесна и непроблематична. Сепак, на моменти останува впечатокот дека можете лесно да залутате доколку не знаете што точно барате.

Големиот број слики, звуци и снимки од вселената го прават прелистувањето низ страниците вистинско уживање.

Сајтот постојано се дополнува со најнови научни и технолошки новости поврзани со астрономијата. Содржи и голем број научни статии од светски истакнати автори. За најмладите има посебно уреден дел од сајтот преку кој на шарен и сликовит начин им се приближуваат одредени тематики од вселената.

Со други зборови, сајтот на ЕСА претставува огромна база информации и знаење, рај за секој љубител на оваа научна област, но и за обичните корисници, кои сакаат само да уживаат во убавите содржини.

Како единствена негативност може да се истакне малата пренатрупаност бидејќи целата содржина може да се подели на неколку различни сајта. Сепак, тоа е само мал минус во однос на сите плусови на овој сајт.

Рецензент:
Игор Стојановски
, Институт за информатика


ЗА ВЕБ - САЈТОТ

Дополнување: секојдневно
Брзина: средна
Функционалност: добра
Код: ХТМЛ
Навигација: стандардна
Пребарувач: има
Клучни зборови: има
РСС/Атом: нема
Гугл ранг: 8/10
Јазик: сите јазици на земјите од ЕУ
Адреса: www.esa.int

30 мај 2006

Музејот „Лувр“ во Париз

[лекториран]

Во овој број и во наредните седум објавуваме рецензии од студентите на Институтот за информатика од Скопје, напишани како семинарски трудови по предметот Интернет, во рамките на заеднички проект на ИИ, „Време“ и на фондацијата „Метаморфозис“.

Музејот „Лувр“ има прекрасен сајт од кој ќе бидат задоволни сите посетители, а особено љубителите на уметноста. Самиот музеј е нешто што не смее да се пропушти при посета во Париз, но и посетата на сајтов дава можност да се добие вистинска слика за тоа што претставува тој.

Според информации достапни на сајтот, во периодот од 2002 до 2004 г. тој имал приближно 6 милиони посетители - речиси исто колку што имал и самиот музеј, а посетителите се грубо поделени во четири категории: луѓе што планираат да го посетат музејот па бараат конкретни информации, потоа луѓе што се интересираат за колекциите во музејот, а не планираат да го посетат, луѓе што ги интересира уметност и случајни посетители.

Сајтот има способност да го задржи вниманието, навигацијата е прегледна, но обемна, решена преку паѓачки и странични менија, кои опфаќаат општ опис, историја и опис на колекциите, фино поделени по групи со кратки описи преку кои може да се стигне до подетални информации. Следуваат описи на тековните, минатите и на идните изложби, како и другите настани во музејот.

Исто така, се нуди добра визуелна претстава преку панорами, виртуелни прошетки и голем број слики низ сајтот.

Ако сте можеби иден посетител на „Лувр“ можете да најдете информации за работното време, мапи на музејот, распоред, препораки за тоа што би требало да се види и можност за купување билети преку Интернет. Исто така, преку сајтот имате можност за купување сувенири, книги, цедиња...

Рецензент:
Моника Митревска, Институт за информатика


ЗА ВЕБ-САЈТОТ

Дополнување: многу често
Брзина: брзо
Функционалност: одлична
Код: јсп (Java server pages - динамички)
Дизајн: комбиниран
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 4/10
Јазици: француски и англиски
Адреса: www.louvre.fr

29 мај 2006

Таратур, уште еден македонски „забавен портал“

[лекториран]

Има ли смисла на пазар што е веќе заситен со понудата од еден доминантен ентитет (Он.нет) и негови имитатори, да се додава уште еден играч од ист тип, само затоа што доминантниот фактор е пример за успех? Од тој аспект, авторите на ‘порталот со забавни содржини наменети за разведрување и подобрување на расположението‘ Таратур заслужуваат пофалба поради нивото на нивниот оптимизам.

Како и другите слични проекти, кај содржините се главно вести за бизарни настани без линк до изворот на информацијата, како и видеоклипови и фотографии со слична тематика. Маркетиншкиот елемент што го брендира сајтов се алузиите на елементи од локалната култура, од името до отворање рубрика за историја наменета за ‘борба со странските пропаганди‘.

Од аспект на употребливост, добро е што до секој линк за видеоклипче стои неговата големина и претставувањето на членовите на тимот преку фотографии. Она што може да се поправи е нападноста на банерите за реклами и тоа што линкот на форумот се отвора во скокачки прозорец што освен што непотребно троши ресурси, отвора и можност за компромитирање на безбедноста кај понеискусните сурфери, кои може [несакајќи] да ја исклучат заштитата на општо ниво.


ЗА ВЕБ-САЈТОТ

Дополнување: често
Брзина: брзо
Функционалност: добра
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 2/10
Јазици: македонски
Адреса: http://www.taratur.com

Дополнение: Реакција на рецензијава од Таратур.

26 мај 2006

Археолошки дневник

[лекториран]

Археолошкиот дневник за кратко време се избори за место меѓу водечките македонски блогови, преку презентирање информации за областа што, наспроти тоа што е од огромно значење за една култура, во македонската и општа и академска јавност со децении тоне во занемареност.

Изобилството вести од земјата и од светот, но и аналитички написи, дополнети со објаснување поими, го прават овој веб-сајт интересен за поширока публика. Ведрата и шармантна „газдарица на блогот“ го дополнува добриот впечаток со елоквентност и со јасен стил на пишување, непренатрупан со стручни термини, без мистифицирање, како и со критичката настроеност кон темите што ги обработува.

Видливо позитивно влијание има и зголемувањето на употребливоста преку оптимизирање елементи на дизајнот и примена на позитивни искуства во практиката на работење.

Овој блог неодамна беше посочен и поради наглиот пораст на линкови кон него, измерен со алатката Технорати мак топ. Иако ова сè уште се нема одразено на рангот на Гугл, многу е веројатно дека ефектот во таа насока ќе се појави во почетокот на јуни.


ЗА ВЕБ-САЈТОТ

Дополнување:
секојдневно
Брзина: брзо
Функционалност: одлична
Код: ПХП (друпал)
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 0/10
Јазици: македонски
Адреса: arheo.blog.com.mk

16 мај 2006

Ала Сеиф ал-Ислам, Египќанец што блогира од затвор

[лекториран]

Манал и Ала се египетски блогери, кои истовремено нудат информатички услуги како хостирање и одржување на веб-сајтови. На 7 мај, Ала бил уапсен поради протестирање на темата слобода на говорот и независно судство во неговата земја, во рамките на чистка во која биле собрани и десетици други активисти.

Иако затворен, Ала има испратено неколку текста што се појавиле на неговиот блог, на кој тој веќе подолго време користи хумор за да ги критикува ограничувањата на слободата на изразување и забраните на политичко блогирање.

Во знак на солидарност, отворен е блог за петиција за ослободување на Ала (freealaa.blogspot.com), проследен со акција за „бомбардирање на Гугл“. Бомбардирањето се состои во тоа што се бара од корисниците на Интернет низ светот да постават линкови до блогот, при што текстот на линкот треба да биде англискиот збор за Египет (Egypt). Целта е кога некој ќе бара информации за Египет на Гугл, линкот со информацијата за Ала да се појави што повисоко на списокот на резултати. Ова е директна примена на сознанијата од областа на развој на веб-решенија наречена оптимизација за пребарувачи (search engine optimization).

Блогот на Манал и Ала се базира на платформата Друпал, која се користи и во Македонија како подлога за сервисот Блогерај.


ЗА ВЕБ-САЈТОТ

Дополнување: често
Брзина: брзо
Функционалност: добра
Код: ПХП (Друпал)
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 5/10
Јазици: англиски и арапски
Адреса: www.manalaa.net

09 мај 2006

МаФест - Макарски фестивал на стрипот

[лекториран]

Макарска е област во Далмација позната по туристичката понуда, а Макарскиот фестивал на стрипот е настан што првпат се одржува годинава, од 19 до 21 мај. Иако е прв, Фестивалот не е „од вчера“, туку доаѓа како продолжение на долга низа понеформални собирања на стрип-ентузијасти, почнати од 2002.

Опитните Хрвати не пропуштаат во се што прават да вметнат и евроинтеграциска компонента, па на Фестивалот специјален гостин ќе биде еден од најголемите живи стрип-цртачи, Белгиецот Херман Хупен. Херман е автор на легендарните серијали „Бернар Принс“, „Команча“, „Џеремаја“, „Боа Мори“… и еден од носителите на француско-белгиската школа на стрипот.

Организатор на фестивалот е НВО „Мозаик на стрипот“, а тој се одвива со поддршка на локалната самоуправа на Макарска и на низа локални фирми.

Дизајнот на веб-сајтот е компактен, без непотребни елементи што би го оптоварувале вчитувањето или би го одвлекувале вниманието од содржините, визуелно заморувајќи ги посетителите. Целта на дизајнерот била да ја заврши работата на најефикасен начин, а не да се размавтува со анимации и слични несуштински тракатанци, кои се карактеристични за македонските сајтови од ваков тип.

Информациската архитектура е јасно поставена, овозможувајќи им лесно снаоѓање на посетителите и брзо пронаоѓање на информациите што ги интересираат. Покрај самиот фестивал, се промовира и Макарска, а и Хрватска, што е додадена вредност за сите партнери во проектот.


ЗА ВЕБ-САЈТОТ

Дополнување: наменски
Брзина: брзо
Функционалност: добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: хрватски
Адреса: www.mastripfest.com

05 мај 2006

Луди клонови

[лекториран]

Блогот „Луди клонови“ му е посветен на фотографското клонирање, односно, правење фотографии на кои еден лик се појавува повеќе пати.

Додека во минатото за вакво нешто беше потребно да се има расипан механизам на фотоапаратот што не го преклопува филмот како што треба, во денешно време доволна е употреба на програма за обработка на фотографии. На сајтот дури има и упатство за клонирање во Фотошоп.

Фотографиите се поделени по категории: луѓе, домашни галеничиња и се друго. Повеќето се со висок квалитет, а се прават така што делови од повеќе слики снимени од едно исто место се комбинираат во една. За некои од фотографиите, кои не се направени со стандардна постапка, авторите даваат објасненија на марифетите и методите со кои го постигнале клонирањето.

Освен што е забавно да се прават и споделуваат, веб-сајтов имал објавено и конкурс за најуспешно клонирање, со награди од по 50 долари за одбраните фотографии. Ова е одлична шанса за промовирање на македонските уметници од оваа сфера, оти се бараат фотоси од целиот свет - колку поразновидни, толку подобро.


ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: текстуален
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: има
РСС/Атом: нема
Гугл-ранг: 5/10
Јазик: англиски
Адреса: crazyclones.com

04 мај 2006

Диг

[лекториран]

Диг (анг. откопување, откривање, сфаќање) е веб-сајт за технолошки вести, кој комбинира неколку модерни технологии (социјално букмаркирање, блогирање, РСС) со нехиерархиска уредничка контрола. Корисниците сами ги објавуваат и самите одлучуваат за тоа кои стории ќе бидат промовирани.

По внесувањето дадена сторија (линк), корисниците може да и доделат гласови („дигови“) и, ако собере доволно, таа се појавува на насловната страница, овозможувајќи посетеност и популарност за содржината. Преку делот „Диг спај“ може да се „шпионира“ каква е тековната состојба во врска со статусот на сториите, вкусно дополнето со соодветни дизајнерски решенија, како промена на бојата и транспарентноста на приказот.

Овозможено е и директно вклучување на сториите во блогови поставени на главните светски сервиси, меѓу кои и Блогер. Освен тоа, корисниците може да ги додадат линковите од Диг на своите веб-сајтови, со целосна контрола врз видот: од насловна, само оние за кои гласале или оние за кои гласале некои други одбрани корисници на системот.

Овој веб-сајт може да им биде од голема полза на сите оние што би сакале да промовираат информации за напредокот на технологијата во Македонија, а со тоа и да го издигнат угледот на земјата кај оние што го водат развојот на светско ниво.


ЗА ВЕБ-САЈТОТ

Дополнување: постојано
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 7/10
Јазик: англиски
Адреса: www.digg.com

03 мај 2006

Легендата за Вилхелм Тел, стрелец со самострел

[лекториран]

Легендата за Вилхелм (Вилијам) Тел е дел од швајцарскиот национален идентитет, а освен славењето на децентрализацијата, независноста и слободата, веб-сајтот служи и за поттикнување на туризмот во земјата.

Во 1307 година селанецот Тел му се спротивставил на високиот претставник на хабсбуршката монархија со тоа што не се поклонил на неговата шапка закачена на стап. Администраторот Геслер ги заробил Тел и син му, наредувајќи му да погоди јаболко поставено на главата на детето, инаку обајцата ќе ги погуби.

Тел успеал, но поради одбивањето да ја признае власта на окупаторот бил осуден на робија, успеал да избега, да му приреди заседа на Геслер и да поттикне успешно општонародно востание.

Во 1804 година романтичарската драма на Фридрих фон Шилер оваа приказна ја направила дел од светското културно наследство, со исклучок на некои македонски квизови во кои и составувачите на прашањата и играчите имаат покажано недоволно познавање на легендата, иако ја споменуваат.

Мудрите Швајцарци на својот херој му имаат изградено низа споменици на местата на кои се смета дека се смета дека се случиле настани од легендата, а сега ги користат како магнет за туристите.

Веб-сајтот за Вилхелм Тел може да се подобри, особено со некористење рамки и со поставување линкови до изворите на разните верзии на легендата, како и до е-верзија на делото на Шилер.


ЗА ВЕБ-САЈТОТ

Дополнување: неопределиво
Брзина: брзо
Функционалност: средна
Код: ХТМЛ
Дизајн: рамковен
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 4/10
Јазик: англиски и германски
Адреса: www.tell.ch

01 мај 2006

Хрчак – хрватски портал за научни списанија

[лекториран]

Хрватскиот и српски збор хрчак во македонската драматургија е преведен како (кутра мала) хрчка, додека неговиот англиски еквивалент (hampster) Англиско-македонскиот речник на О. Мишеска-Томиќ и др. го преведува со ‘рчка. Арно ама, предизвиците за македонската лингвистика кои ги предизвикува овој питом глодач и немаат врска со „Хрчак“, порталот што овозможува отворен пристап за хрватските научници.

Намена на порталот е да овозможи полесен пристап до содржините на стручните научни списанија од Хрватска, кои ги има вкупно околу 230 и главно немаат електронски изданија. Од една страна на редакциите бесплатно им е овозможено да ги објават своите материјали во дигитална форма, а од друга страна публиката има можност да ги пребарува и да ги чита написите.

Вклучувањето во проектот е полезно и за списанијата што имаат свое е-издание, бидејќи на тој начин се олеснува промоцијата и видливоста од страна на потенцијалните корисници, како и вклучувањето пребарувачи и други мрежни сервиси.

Покрај пребарливите библиографски податоци и апстрактот, кога се достапни, индивидуалните трудови се поместени во ПДФ-формат, следејќи ги сите правила за употребливост (назначување на големина на датотеката до линкот).

Со овој проект хрватската научна заедница уште еднаш ја покажува својата европска припадност, на дело спроведувајќи ги одредбите на Будимпештанската иницијатива за отворен пристап (Budapest Open Access Initiative - BOAI) од 2002. Ова покрај практичната вредност за самите научни работници, има големо влијание и на зголемување на угледот на земјата, особено полезна карактеристика и во другите процеси на евроинтегрирање.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: нема
РСС/Атом: нема
Гугл-ранг: 3/10
Јазик: хрватски и англиски
Адреса: hrcak.srce.hr

05 април 2006

Урсула К. Ле Гвин

[лекториран]

Урсула К. Ле Гвин (р. 1929) е една од најзначајните современи писателки на научна и епска фантастика, а како романсиерка и поетеса е едно од големите имиња на американската литература воопшто.

Визуелно, нејзиниот веб-сајт ја одразува атмосферата на нејзините дела, особено на серијалот „Земјоморје“ (Earthsea), кој во последно време е актуелен поради филмски адаптации како ТВ-серија и анимиран филм од познатото јапонско студио „Гибли“ на Хијао Мијазаки.

Во истиот дух, информациската архитектура ги следи принципите на ненападност и оставање можности за избор на посетителот, на пример преку нудење различни верзии на исти содржини - во форма погодна за печатење, со чист текст, или со линкови и со слики.
Веб-сајтот на Ле Гвин нуди биографски и библиографски информации, најави на јавни настапи, како и увид во процесот на пишување преку артефакти како скици, коментари, забелешки, мапи и слично, но и преку есеи на темата. Исто така, достапни се и делови од нејзиното творештво - извадоци од романи, раскази и песни.

Како и некои други познати автори, Ле Гвин има ставено ембарго на комуникација преку електронска пошта и експлицитно нагласува да не и се испраќаат ракописи на увид - оти „рецензирањето дела во развој е во надлежност на платени, обучени професионалци како консултанти за пишување и агенти-застапници на писатели“. Но, обожавателите што ќе и испратат пликови со соодветно количество поштенски марки од неа може да побараат автограм во форма на Ex Libris (лист или налепница што се вметнува во почетокот од книга).


ЗА ВЕБ САЈТОТ

Дополнување: повремено
Брзина: брзо
Функционалност: добра
Код: ХТМЛ
Дизајн: текстуален
Навигација: минимална
Пребарувач: нема
Клучни зборови: има
Јавен бројач: има
РСС/Атом: нема
Гугл-ранг: 6/10
Јазик: англиски
Адреса: www.ursulakleguin.com

04 април 2006

Репортери без граници

[лекториран]

Мисијата на меѓународната организација „Репортери без граници“ е одбрана на слободата на печатот, односно слободата на изразувањето во целиот свет. На нивниот веб-сајт тие ги евидентираат нападите врз слободата на печатот низ целиот свет, функционирајќи како „новинска агенција за слобода на печатот“.

Друга функција на веб-сајтот е спротивставување на цензурата, преку објавување написи чие објавување било забрането во нивните матични земји. Преку веб-сајтот се одвиваат и активности за обезбедување спонзорства и за организирање на Денот на слободата на печатот - 3 мај.

Покрај написите за настаните, има линкови што овозможуваат подобро запознавање со претходните настани во дадената земја, годишни извештаи и известувања за медиумите. Исто така, застапени се линкови до материјали од околината, на пример ако се работи за настан во Уганда, леснодостапни се и материјали за други делови од Африка.

Преку веб-сајтов се потпишуваат и петиции, во посебни рубрики се претставени новинарите што се водат како исчезнати (да не се заборават), како и властодршците што ја загрозуваат слободата на медиумите, наречени грабливци на слободата на печатот (predators of press freedom).

Една исклучително интересна содржина достапна на веб-сајтов во ПДФ-формат е целата книга „Прирачник на блогери и сајбер-дисиденти“ (Handbook for Bloggers and Cyber-Dissidents), која нуди и технички и политички знаења од оваа област.


ЗА ВЕБ-САЈТОТ

Дополнување: секојдневно
Брзина: брзо
Функционалност: добра
Код: ПХП
Дизајн: текстуален
Навигација: приспособлива
Пребарувач: има
Клучни зборови: само на насловни
Јавен бројач: нема
РСС/Атом: нема
Гугл-ранг: 7/10
Јазик: француски, англиски, шпански
Адреса: www.rsf.org

03 април 2006

Станување човек

[лекториран]

„Станување човек“ е одличен пример за пренос на содржини од еден медиум во друг. На него со употреба на Флеш е адаптиран цел документарен филм за постанокот на човекот, во кој водител е познатиот палеонтолог Дон Џохансон. Притоа, не се работи за „просто“ ставање видеозаписи на веб, туку за целосна преработка со користење на предностите на новиот медиум.

Задржана е звучната подлога, која зафаќа помалку простор, додека видеоелементите се заменети со фотографии на кои се додадени анимирани ефекти што го создаваат впечатокот на движење. Користејќи ги можностите за интеракција, во текот на филмот дејството може да се паузира за да се добијат информации на ниво на енциклопедија за темата за која станува збор во моментот.

Од тие причини веб-сајтов е исклучително интересен не само за заинтересираните за палеонтологијата и за љубителите на аустралопитекусите и неандерталците (најпопуларните пралуѓе во Македонија), туку и за специјалистите за графички и веб-дизајн, анимација и интерактивни апликации, како и културна применета политика.

Убавината на дизајнот и богатството на знаења што го нуди веб-сајтов, чиј сеопфатен ефект е нарушен од аспект на употребливост, со користењето рамки и отворањето на повеќето странични линкови за вести и центарот за учење, во нови прозорци.
Авторите, кои го изработиле во 2001 година, препорачуваат користење широкопојасна врска за пристап, но употреблив е дури и на модемска врска од 56К.


ЗА ВЕБ-САЈТОТ

Дополнување: баталено
Брзина: средна
Функционалност: одлична
Код: Флеш/ХТМЛ
Дизајн: комбиниран
Навигација: променлива
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.becominghuman.org

01 април 2006

Агол – електронско списание за култура и уметност

[лекториран]

Електронското списание „Агол“ за свој издавач го има здружението „Неготински круг“, чија мисија е „промоција на принципите на децентрализација и демократизација во сферата на културата и културната политика, преку едукација, промоција и дистрибуција на културно-уметнички вредности“.

„Агол“ неодамна го објави своето шесто издание. Со редовниот месечен ритам и интересните теми (литература, музика, стрип и филм) постепено ја гради репутацијата на македонската интернет-сцена.

Освен за промовирање и подигање на нивото на општа култура кај публиката, ваквите иницијативи се важни и од аспект на задоволување на приоритетната потреба наведена во Националната стратегија за развој на информатичко општество - зголемување на количеството содржини на локални јазици.

Од аспект на употребливост, кај дизајнот на веб-сајтов би требало да се отфрли употребата на рамки, кои спречуваат директно линкување и цитирање конкретни содржини (на пример, од страна на блогерите). Линковите што се отвораат во нови прозорци би требало да се отвораат во истиот, а добро би дошол и лекторски ангажман. Дизајнот изгледа поинаку во „Интернет експлорер“ и во „Фајерфокс“, што исто така укажува на потреба за ревизија.

Меѓу другите оригинални е-списанија на македонскиот интернет, кои не се копија на печатено издание и обработуваат поширок круг на теми од областа на културата и уметноста, се влијателниот ветеран „Блесок“ основан во 1998 година, подзаспаната „Агора“ од 2002 година, како и „Плагијат“ од 2005.


ЗА ВЕБ-САЈТОТ

Дополнување:
неопределиво
Брзина: брзо
Функционалност: добра
Код: ХТМЛ
Дизајн: рамковен
Навигација: променлива
Пребарувач: нема
Клучни зборови: нема
Јавен бројач: затворен
РСС/Атом: нема
Гугл-ранг: 3/10
Јазик: македонски
Адреса: agol.negotinskikrug.net

31 март 2006

Хумористот Том Велер

[лекториран]

Веб-сајтот на хумористот Том Велер е пример за тоа како со едноставен дизајн и добри содржини може да се постигне одличен ефект.

Веб-сајтот се состои од насловна страница и интернет-верзии на неговите две книги: „Миними“ (1982) со афоризми и карикатури, како и линк до содржината на „Глупава наука“ (1985), која на Интернет ја поставил некој негов обожавател.

Во своите книги, кои може да се сфатат и како пародија на „Кусата историја на времето“ на Стивен Хокинг или „Космос“ на Карл Саган, Велер го објаснува „животот, универзумот и се друго“ во стил со којшто Даглас Адамс ја има обработено научната фантастика, а Лери Гоник историјата. За „Глупавата наука“ Велер ја добил највисоката награда од жанрот научна фантастика „Хуго“.

На веб-сајтот има и неколку рецепти и откачени линкови, кои го дополнуваат хумористичниот впечаток.

Сите содржини се безбедни за гледање од работа, со исклучок на тоа што при првото вчитување во некои прелистувачи може да се чуе гласно квакање, оти во кодот е вметнат таков звучен запис - но со релативно застарен метод. Шатката, која е и симбол/лого на веб-сајтот, е вметната и како омилена икона (favicon).


ЗА ВЕБ-САЈТОТ

Дополнување: неопределиво
Брзина: брзо
Функционалност: добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.tweller.com

29 март 2006

Фабрика 1019

[лекториран]

„Фабриката“ на калифорнискиот фотограф Џефри Скот го има насочено своето производство на комбинирање на реалноста, односно работа со живи фотомоделки, со фантазијата - пренесување во имагинарен свет преку употреба на декор и дополнително ретуширање.

Дизајнот на веб-сајтов има многу недостатоци, од употребата на рамки што го попречуваат пристапот од машини за пребарување, предолгите страници исполнети со неуедначен текст, отворањето на некои од надворешните линкови во нови прозорци, нападни рекламчиња за купување на сликите во галеријата… во основа, прекршување на некои од основните правила на употребливост.

Арно ама фотографиите се одлично изработени, а во голем број случаи може да послужат како коментар за современи општествени појави на глобално ниво, не само во земјата на нивниот настанок. Дополнително, според древното и непишано правило на веб-дизајнот, на уметничките веб-сајтови им се дозволува употреба на темна (црна) заднина.

Она што плени на веб-сајтов е хуманиот однос на фотографот кон моделките за кои тој пишува како за рамноправни соработнички при изработката на делата: „Луѓето се толку многустрани што ми дозволуваат да ја илустрирам нивната вистинска природа, а над се, да ги одведам на визуелно емотивни места за кои тие не знаеле дека постојат во нив. Кога го пронаоѓам тоа… тоа ја прави сликата. Мала мисла. Моментна емоција. Одредено чувство. Заробено, сè во една слика, засекогаш“.

Ова е потврдено и со тоа што Скот има ставено и линкови до веб-сајтовите на моделките, односно портфолија преку кои и други фотографи може да ги пронајдат и да им понудат ангажмани.


ЗА ВЕБ-САЈТОТ

Дополнување: неопределиво
Брзина: средна
Функционалност: средна
Код: ХТМЛ
Дизајн: рамковен
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.factory1019.com

28 март 2006

„Најдобрите“ веб-сајтови

[лекториран]

Меѓу многуте веб-сајта што презентираат ранг-листи со други веб-сајтови, „Веб 100“ се истакнува со тоа што ако на Гугл се напише „ best sites“, линкот до него се појавува на првото место. Постигнувањето на оваа авторитетна позиција е резултат на примената на оптимизација за машини за пребарување и на угледот на двајцата автори со комбинирани работни искуства од информатика, новинарство и од претприемништво.

Овој водич нуди прегледен и концизен список на сто „најдобри“ веб-сајта, поделени по категории: десет најдобри, уметност и забава, бизнис и трговија, компјутери и Интернет, образование и референци, влада и политика, здравје и медицина, вести, спорт и рекреација, наука и технологија, како и „друго“. За секој од сајтовите има кратка описна рецензија и линк.

Основни недостатоци на вака направената топ-листа се неколкуте вида пристрасност. Таа е амероцентрична - речиси сите веб-сајтови се од САД. Едновремено, во погледот на јазик таа е англоцентрична - авторите се „слепи“ за веб-сајтови на други јазици, освен на англиски.
Да се тврди дека во светот нема добри веб-сајтови надвор од овие две множества би било премногу арогантно, но истата тема се провлекува и на другите слични листи на веб-сајтови, како што е „Најдобрите веб-сајтови на светот“, која функционира на сличен принцип.

Иако авторите на „Веб 100“ велат дека не примаат предлози за дополнување на листата, не би било лошо читателите да им укажат на „конфликтот на интереси“, кој ниту го споменуваат и за кој можеби не се ни свесни.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: има
Јавен бројач: има
РСС/Атом: нема
Гугл-ранг: 6/10
Јазик: англиски
Адреса: www.web100.com

27 март 2006

„Девијантна“ уметност

[лекториран]

Веб-сајтот „Девиант арт“ претставува стожер на виртуелна заедница на луѓе што сакаат да се изразуваат и преку текстуални медиуми (колумни, коментари, форуми), но пред се визуелно, преку објавување дигитални фотографии, цртежи, слики и колажи.

Секој од членовите добива сопствен пот-сајт, идентификуван со терцијарен домен, направен од спојување на корисничкото име со .deviantart.com. Така на пример, се направени и адресите на веб-сајтовите на младите уметници од Македонија: royalgirl.deviantart.com, endeneu.deviantart.com, silik.deviantart.com, she0ne.deviantart.com, flavrsavr.deviantart.com, ivan-bliznak.deviantart.com и многу други…

За корисниците се собираат најразлични податоци што тие доброволно ги даваат, кои потоа се обработуваат и презентираат во вид на листи и статистики.

На насловната страница и официјалниот блог се презентираат и особено квалитетни дела, што е уште еден начин за јакнење на репутацијата на уметникот во рамките на заедницата. Можноста за поставување линкови кон надвор овозможува одложена комуникација и со други веб-сајтови и блогови.

Пренатрупаноста со содржини и нивното комбинирање на разни начини малку го отежнува снаоѓањето од почетокот, но откако ќе му се фати редот, Девиантарт може да стане постојан извор на интересни искуства.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: www.deviantart.com

25 март 2006

Чандра - рендгенска опсерваторија

[лекториран]

Чандра, рендгенската опсерваторија на НАСА, сместена на универзитетот „Харвард“, го добила името според покојниот индиско-американски нобеловец Субрамонјон Чандрасајкар (1910-1995).

„Чандра“ е всушност вселенско летало поставено на сателитска орбита околу Земјата, во кое е сместен телескоп со рендгенски зраци (Џ-раѕ). Благодарение на телескопот овозможено е попрецизно снимање далечни вселенски појави, како супернови, маглини, пулсари и слично.

Целиот веб-сајт е изведен во основен ХТМЛ-код, што го прави многу брз и компатибилен со сите системи. Покрај тоа, се нуди и верзија што е „само текст“, односно без графички или други дизајнерски елементи, која е уште побрза, а и згодна доколку се сурфува преку мобилни уреди или со ептен бавна врска.

Веб-сајтов претставува одличен образовен ресурс, и поради обемните информации што ги презентира (за самата опсерваторија, но и општо од астрономијата), но и поради едноставните интерактивни елементи како користењето обичен квиз како алатка за проверка на знаење - посетителите се канат да гласаат за некој од одговорите, а кога ќе го дадат гласот покрај тоа колку за што гласале, им се укажува и на точниот одговор.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 9/10
Јазик: англиски
Адреса: chandra.harvard.edu

24 март 2006

Блогот Фаједоглејк

[лекториран]

Колективниот блог „Фаједоглејк“ (буквално „оган-куче-езеро“) е едно од упориштата на американската левица. Негови членови се претежно писатели и други уметнички наклонети личности, кои ги искажуваат своите мислења и ставови за најразлични теми, а особено за политика и општество.

Меѓу нив е и Џејн Хашмер, која освен што е писателка е и продуцентка - нејзин најпознат филм е „Родени убијци“. Зборувајќи за културната енергија, таа ги споредува блоговите со панк-сцената од 1970-тите:
„Музичката индустрија во тоа време беше надуена, на крајот на силите и неповрзана со публиката. Директорите на издавачките куќи беа зафатени со купување часовници ‘ролекс’ за РЕО Спидвагон... Нив сосема ги ужасна кога слушнаа дека децата плаќаат по 3 долари за билет за добротворен концерт на ‘Клеш‘ во полза на марксистичката младина во 1978..., но дури и за децата беше очигледно каде е енергијата, во која насока се поместува духот на времето. Панкот стана светилник за креативните луѓе од сите видови, а и по толку години неговата сенка се уште е поголема од она што можеа да го предвидат трговците на корпорациската култура.

Мислевме дека панкот и енергетската контракултура, која тој ја произведуваше ќе траат вечно, но не беше така. Набргу беа готови. Уживајте во блоговите додека можете“.
Рангот на Гугл на блогот моментално е од 2 од 10, што е добар пример, кој го илустрира правилото на гуруто на употребливоста Јакоб Нилсен за потребата од регистрирање сопствени адреси што порано. Имено, блогов првобитно бил воден преку Блогер, користејќи ја адресата firedoglake.blogspot.com. Таму сега е сместена архива на текстови, која сè уште има ранг 6 од 10.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: вордпрес (ХТМЛ)
Дизајн: блогерски
Навигација: стандардна
Пребарувач: има
Клучни зборови: има
Јавен бројач: има
РСС/Атом: има
Гугл-ранг: 2/10
Јазик: англиски
Адреса: www.firedoglake.com

23 март 2006

Кутија со темплејти

[лекториран]

„Кутијата со темплејти“, односно шаблони, овозможува пристап до однапред подготвени дизајнерски решенија за изглед на веб-сајтови. Некои од нив може да се добијат без директна финансиска компензација („бесплатно“), а другите може да се добијат по уплатата на едногодишна претплата.

Основните темплејти доаѓаат во вид на зип-архива, слика во изворниот формат на „Фотошоп“ (со слоеви итн.), заедно со ХТМЛ и ЦСС-датотеки што може да послужат како урнек/основа за вградување динамички или други елементи на веб-сајтот. За темплејтите во „Флеш“ е вклучена слика во „Фотошоп“, датотеката во „Флеш“ и потребните фонтови. Со оглед на тоа што обата типа темплејти може да тежат по неколку мегабајти, употребливоста е намалена со тоа што на страниците за симнување
не е наведена нивната големина.

Покрај горенаведените, достапни се и темплејти за логоа, банери, билтени по е-пошта и други графички елементи за веб. Одделот за упатства (туторијали) добро ги дополнува содржините, овозможувајќи запознавање со принципите на работа со самите темплејти во „Фотошоп“, „Дримвивер“ и во „Флеш“.

Правилото дека ништо не е бесплатно го потврдува и овој веб-сајт. Оние непретплатници што ќе се решат да искористат некои од понудените елементи се обврзани на така изработениот веб-сајт да стават линкови или банери што ќе насочуваат кон „Кутијата со темплејти“, овозможувајќи издигање на нејзиниот ранг на пребарувачите, а со тоа и на угледот и на влијанието.


ЗА ВЕБ-САЈТОТ

Дополнување: месечно
Брзина: брзо
Функционалност: одлична
Код: ХТМЛ, Флеш
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.templatesbox.com

22 март 2006

Веб-камери од целиот свет - обединете се

[лекториран]

Веб-сајтот „Ерт-кам“ има цел да ги обедини веб-камерите од целиот свет и да овозможи лесен пристап до содржините што ги нудат. Тие исто така нудат технологија и услуги за оние што сакаат да постават веб-камери.

Изборот на местата во кои може да видите какво е времето и што има ново е навистина богат - од аргентинска база на Антарктикот, преку гнездо на белоглави орли во САД, до плоштадите на градовите како Москва, Киев, Њујорк, Лондон, Прага, Доџ Сити…, како и главните летувалишта каде што американските студенти го минуваат пролетниот одмор.

Може да се пребаруваат по клучен збор, земја, временска зона..., а сликите, освен преку веб-сајтот, може да се гледаат и преку мобилен телефон.

Особено интересно од аспект на промоцијата на Македонија како туристичка дестинација низ светот е што внесувањето нов член во базата е многу едноставно. Сопствениците на веб-камери само треба да го следат линкот „Адд а Цам!“ и да ги внесат податоците за својот веб-сајт.

Наспроти тоа што неколку македонски града се имаат пофалено дека поставиле вакви камери, ниедна од нив не е сместена во списоците на овој сеопфатен веб-сајт.
Со оглед на големото количество графички материјали што се пренесуваат при гледањето на веб-камери, заинтересираните по дефиниција треба да имаат широкопојасен пристап на Интернет за да може да уживаат во искуството.


ЗА ВЕБ-САЈТОТ

Дополнување: континуирано
Брзина: средна
Функционалност: одлична
Код: ПХП, Флеш
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 8/10
Јазик: англиски
Адреса: www.earthcam.com

21 март 2006

Бихејвиористичка мрежа

[лекториран]

Бихејвиоризмот е материјалистичка гранка на психологијата, која се темели на претпоставката дека однесувањето може научно да се истражува без да се земат предвид внатрешните ментални состојби. Бихејвиористите го отфрлаат концептот на слободна волја и сметаат дека однесувањето е определено од комбинација на сили како генетички фактори и влијанија на околината.

Бихејвиористичката мрежа е еден од најстарите веб-сајтови што нуди огромен број податоци од областа на психологијата. Од една страна тоа се податоци од директориуми на професионални организации или организации за поддршка на луѓе со психолошки проблеми, но и владини тела и академски институции што имаат допир со оваа област.

Од друга страна, веб-сајтот ги прави достапни информациите од стручната литература, од кои најважни се извадоците од Дијагностичкиот и статистички прирачник (Diagnostic and Statistical Manual - DSM) на Американската психолошка организација, кои ги определуваат критериумите за дијагностицирање определени нарушувања. Покрај тоа, достапни се списоци и на поими (поделени по области), познати личности што придонеле за развојот на психологијата и на психијатријата, списоци на лекарства, како и списоци на препорачани книги од разни психолошки области.

Дизајнот на веб-сајтов е доста старомоден, со користење рамки. Иако се поставени линкови за верзија без рамки, таа изгледа доста осакатено бидејќи нема усогласени навигациски елементи. Недостатоците на дизајнот оневозможуваат целосен пристап до обемните содржини од страна на машините за пребарување, што би довело до повисок ранг на сајтов.


ЗА ВЕБ-САЈТОТ

Дополнување: неопределиво
Брзина: брзо
Функционалност: средна
Код: хтмл
Дизајн: рамковен
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.behavenet.com

20 март 2006

Веб-сајт на Владата на Ирска за партнерство меѓу јавниот и приватниот сектор

[лекториран]

Развојот на партнерства помеѓу јавниот и приватниот сектор (Public Private Partnerships – ППП, П3) се наметнува како императив во развојниот сектор на светско ниво во последно време. Во овој систем владини услуги се спроведуваат во партнерство или преку алокација на трудот со приватни компании, често преку обезбедување и капитални инвестиции од приватниот сектор.

Веб-сајтот за ППП на Владата на Ирска
има цел обезбедување оптимум поддршка за развојот на овој процес, како алатка на посебен оддел основан во рамките на Министерството за финансии.

Веб-сајтот нуди информации за активностите од оваа област, од најави на конференции до извештаи за изведени проекти и вклучените компании.

Вклучувањето во процесот на нови учесници, пред се, им е обезбедено преку обезбедување детална документација (брифинзи, водичи, законски рамки, изјави за јавност и говори), како и терминолошки речник и одговори на често поставувани прашања.

Од аспект на употребливост, веб-сајтов има очигледни недостатоци и добри страни. Основен недостиг е што повеќето документи не се во форма на веб-страници (ХТМЛ), туку се снимени само во затворени формати на документи во сопственост на определени компании, при што до линкот за симнување не е наведен форматот, ниту големината на документите. Добра страна е исклучително добро изведеното мени.


ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: ХТМЛ, ЈС
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 5/10
Јазик: англиски
Адреса: www.ppp.gov.ie

15 март 2006

Скопска безжична мрежа

[лекториран]

Скопската безжична мрежа („Skopje Wireless Network“ или „Skopje WiFi“) претставува релативно нова збирна мрежа од повеќе мали мрежи во Скопје, на која може да се приклучат сите што поседуваат соодветен хардвер и добра волја. Според веб-сајтот, во моментов покрива околу 40 отсто од површината на Скопје и поврзува околу 100 луѓе.

За членување во мрежата не се плаќа надомест, а нејзиниот развој го финансираат доброволно самите членови. Тие најчесто ја користат за меѓусебна комуникација во вид на мрежни игри, размена на податоци и телефонија преку интернет-протокол (ВОИП). За да се поттикне ширењето на оваа непрофитна мрежа, активните членови нудат и бесплатна обука и пробно користење на опремата за сите заинтересирани.

За написите и за фотогалериите, веб-сајтот го користи системот за раководење со содржини Џумла, претходно познат како Мамбо, а за форумот - ПХПББ. Двете решенија се лиценцирани како слободен софтвер и нудат исклучително солидни стандардизирани технички можности.

Би било добро кога, покрај постојните основни, содржините би се дополниле со подетални информации, особено мапи и студии на случаи, па дури и изјави на корисници и слично, што би ја зајакнало човечката димензија на проектот. Исто така, пожелно би било и усогласувањето на преводот на англиски.

Ентузијастите од оваа мрежа имаат намера за ширење и надвор од рамките на Скопје, па затоа најавуваат соработка со слични проекти и мрежи од други градови, како и меѓународни движења од типот на ФОН.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: неактивиран
Гугл-ранг: 0/10 (нов сајт)
Јазици: македонски и англиски
Адреса: www.skopjewifi.com

14 март 2006

Блогот на готвачот Џејми Оливер

[лекториран]

Џејми Оливер е познат готвач и омилена личност на жените со вкус. Како и многу други познати личности на светско ниво, и тој има свој блог во кој ги забележува настаните што му се случуваат нему и на неговите блиски. Написите на блогот се разновидни и опфаќаат дури и огласи од пријатели на Џејми што бараат работници за своите ресторани.

Блогот е дел од веб-сајт на којшто има и други прикладни лични информации, како биографија со фотографии од детството, тинејџерството и од семејството (женет и родител на две деца).

Веб-сајтов има и неколку други дела што го прават многу интересен. Моблогот - блог со фотографии од мобилниот телефон на Џејми, поделени по месеци, дава можност да го гледате светот низ неговите очи. Архивата со рецепти, категоризирани и исцрпно објаснети, нуди многубројни кулинарски искушенија. Тоа е дополнето со форумот за посетители, организиран многу пристојно и со јасни правила на однесување.

Дизајнот на веб-сајтот е направен според принципите по кои се прават и рецептите - минимален број на добро одбрани елементи, вклопени во совршена целина.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 5/10
Јазик: англиски
Адреса: www.jamieoliver.com

13 март 2006

Агата Кристи - кралицата на криминалот

[лекториран]

Официјалниот веб-сајт на Агата Кристи е под раководство на нејзиниот единствен внук, Метју Причард. Наменет е за одржување на брендот Агата Кристи и за промовирање на нејзиното дело во најразлични форми, од оригиналните романи и приказни, до нивните адаптации како играни филмови, ТВ-серии и театарски претстави.

Чудно е што недостигаат информациите за адаптациите во вид на видеоигри, како новата „Десет мали морнари“, направена врз база на еден од нејзините најпознати романи. Арно ама, на веб-сајтот се поставени друштвени игри во хартиена форма – како ПДФ-записи. Некои од нив личат на играта „Мафија“, која во разни форми е популарна по транзициските земји.

Посебен оддел на веб-сајтот им е посветен на ликовите создадени од Агата Кристи, меѓу кои се истакнуваат детективите г-цата Џејн Марпл и г. Херкул Поаро со „неговите мали сиви клетки“.

Презентацијата е зачинета со интерактивни и графички елементи што додаваат шмек без да ја нарушуваат пристапноста од машини за пребарување. Имено, тие се сместени како дел од ХТМЛ-страници чии имиња ги содржат главните клучни зборови (hercule_poirot.phpпхп), што овозможува и кревање на рејтингот за нив, а и директно линкување.

Текстот е разбиен со цитати по случаен избор од самата писателка или од нејзините ликови, кои додаваат свежина на страниците, заедно со анкети и транспарентни реклами.
Регистрираните посетители може да играат и видеоигри, праќаат е-картички, симнуваат скрин-сејвери и учествуваат во форумот.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ПХП/Флеш
Дизајн: комбиниран
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазици: англиски
Адреса: www.agathachristie.com

11 март 2006

Подводните фотографии на Дејвид Дублие

[лекториран]


Веб-сајтот на Дејвид Дублие може да послужи како одличен урнек за фотографско портфолио. Единствен забележлив недостаток е што на насловната страница е сместено автоматско слајд-шоу што драстично го забавува нејзиното вчитување. Остатокот на сајтот е изработен со големо внимание и ускладеност на елементите.

Содржината е стандардна, со кратки биографски информации, портфолио/галерии, архива на слики за продажба (со влез кој се наплаќа), информации за тоа во кои поважни списанија се појавуваат делата на авторот, како и вести и распоред на идни експедиции.

Во рамките на галериите, фотографиите се поделени на разни категории, од типовите на средина до видовите животни. Галериите стандардно користат мали сликички како линкови до поголеми, а обете верзии се оптимизирани исклучително квалитетно.
Меѓу другите, фотографиите на Дублие го красат „Нејшнел џиографик“, веројатно највлијателното популарно светско списание кое се занимава со набљудување на природата.

Нуркањето само по себе е вештина која бара големи физички и ментални способности, а Дублие ја дефинира подводната фотографија преку неговата страст да ја опфати прекрасната подморска игра на светлината.


ЗА ВЕБ-САЈТОТ

Дополнување: често
Брзина: среда
Функционалност: одлична
Код: АСП
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.daviddoubilet.com

10 март 2006

ЕУРЕС - европски портал за вработување

[лекториран]

ЕУРЕС (EURES) е портал што овозможува поврзување помеѓу луѓето што бараат работа и работодавци од ЕУ.

Името е кратенка од Европски сервиси за вработување - мрежа за соработка чија цел е да поттикне слободно движење во рамките на економската зона на ЕУ + Швајцарија.
Партнери во мрежата, која ја координира Европската комисија, се јавни заводи за вработување, синдикати и здруженија на работодавци.

Основните услуги што им ги нуди ЕУРЕС на луѓето што бараат работа се овозможување да си состават работна биографија (ЦВ) преку веб-сајтот, овозможување пристап до податоците од неа на работодавци што пребаруваат за одредени квалификации, како и информирање за правните и за логистичките информации поврзани со пазарот на работен труд во сите земји на ЕУ.

ЕУРЕС исто така нуди помош преку мрежа од 500 советници од цела Европа, кои помагаат преку директни контакти.

Сајтов е дел од порталот на Европската Унија, чија основна верзија е поставена на сите 25 официјални јазици на ЕУ. Сите информации на ЕУРЕС се достапни на англиски, но одредени детали, на пример, условите за живот во Данска се достапни само уште на француски, холандски и на дански.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: нема
РСС/Атом: нема
Гугл-ранг: недостапен
Јазици: англиски и 18 други
Адреса: www.eurescv-search.com

09 март 2006

Когнитивни вести - што имате на ум?

[лекториран]

„Ког-њуз“ е веб-сајт за вести од когнитивните науки - неврологија, психологија, вештачка интелигенција, философија, лингвистика, биологија и антропологија - кој работи во стилот на Слешдот (њњњ.сласхдот.орг), користејќи сличен систем за раководење со содржини врз база на слободен софтвер.

Мотото на веб-сајтов е цитатот на познатиот бихејвиористички психолог Б. Ф. Скинер: „Науката е подготвеност да се прифатат фактите дури и кога тие се во спротивност со желбите“.

Она што го прави овој веб-сајт особено интересен за македонската научна јавност е можноста кој било читател да контрибуира со вметнување свои написи, кои е доволно да бидат само краток вовед со надворешни линкови.

Тоа може да го сврти вниманието на постигањата и објавените резултати и од истражувања во Македонија, со што ќе се придонесе кон издигање на угледот на нашата наука воопшто.
Написите на „Ког-њуз“ се поделени во категории според научната дисциплина на која и припаѓаат и се леснодостапни и за разгледување и за пребарување, а достапна е и база на линкови до универзитети и други институции поврзани со когнитивните науки.


ЗА ВЕБ- САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 6/10
Јазик: англиски
Адреса: cognews.com

08 март 2006

Технорати - задолжително за секој блогер

[лекториран]

„Технорати“ се рекламира како најголем авторитет за она што се случува во светот на блоговите на глобално ниво - и не се далеку од вистината. Оваа „машина за пребарување во реално време“ во моментов следи речиси 30 милиони веб-сајта и повеќе од 2 милијарди линка.

„Пред неколку години, пребарувањето на вебот беше револуционеризирано од едноставна, но длабока идеја - дека релевантноста на еден веб-сајт може да се определи преку бројот на веб-сајтови што имаат поставено линкови (врски) кон него, што имплицира дека го сметаат за важен. Во светот на блоговите, линковите се уште позначајни, оти блогерите често линкуваат и коментираат на други блогови, што дава чувство на навременост и поврзаност што човекот го има при разговор. „Технорати“ ги следи бројот на линкови и перцепираната релевантност на блогови…“, преку автоматски известувања од самите сервери на кои се поставени блоговите, штом нешто ново се внесе на нив.

За Вашиот блог да биде регистриран на „Технорати“ треба да ја пријавите и да ја докажете вашата сопственост врз блогот преку вметнување мало парче код во шаблонот (темплејтот). „Технорати“ почнува со следење откако ќе се увери дека кодот е на место. Секој блог добива посебна страница на нивниот веб-сајт со основните податоци (внесени од сопственикот), рејтингот, како и линковите од други блогови што водат кон него.

Со оглед на тоа што вистинската моќ на блоговите е во надминување на концептот на интернет-форум (еден централизиран веб-сајт со разни разговори) преку дисперзија и децентрализација на разговорите на разни сајтови, кои се контролирани од самите учесници во муабетот (а не од некој надреден администратор на форумот), примената на практиката на ширење на даден муабет на повеќе блогови е клучна за развојот на македонската блогосфера.


За веб-сајтот
Дополнување: автоматски
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.technorati.com