Монстроузности

Со оглед на нивото со кое децата и тинејџерите во Македонија се клукаат со филмови на стравоти и ужасот, жаргонски познати како хорор-филмови, не е лошо поблиско запознавање со ликовите и концептите кои се експлоатираат во нив. Без разлика на високо ниво на шунд присутно во овој жанр, тој сепак е дел од популарната култура и неговите евентуални позитивни или негативни влијанија е невозможно да се сватат од неинформираните.

Веб-сајтот „Монструозности“ нуди информации за различни категории на суштества од фантазијата, и од филмовите и од митологијата. Секоја од нив содржи основни информации за нив, од истакнати ликови до зоолошки поделби, галерии, резимеа на приказни, до енциклопедиски дел со објаснувања на поимите, со синоними, земја на потекло, изглед, пријатели/непријатели, состојби итн. Меѓу суштествата застапени на сајтов се вонземјани, демони, змејови, самовили, духови, вампири… но и Франкенштајн, Гоџира и други знајни и нејзнајни јунаци и душмани.

Маана на сајтов е што тематски поделените рубрики ги отвора во нови прозорци, што ја отежнува употребливоста, троши ресурси и ја намалува интерактивната контрола на корисникот врз разгледувањето. Имено, подобро е самите посетители да може да одберат дали сакаат даден линк да им се отвори во нов прозорец, односно ново јазиче (ако користат Фајрфокс или Опера).

Освен за љубопитните, сајтов може да послужи и како средство за релаксација на луѓето кои морале да се соочат со локалната или интернационалната бирократска машинерија, на пример по повод вадење визи.

Дополнување: често
Брзина: брзо
Функционалност: добра
Код: ХТМЛ, ЦГИ
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
Гугл-ранг: 5/10
Јазик: англиски
Адреса: www.monstrous.com
Датум на пишување: 25.05.2005.

Дигитална мис на светот

Во изборот на Дигитална мис на светот не влегуваат реални личности, туку виртуелни ликови изработени преку употреба на компјутерска технологија. Виртуелните актери (особено од женски пол) веќе неколку години „играат“ во реклами, по насловни страници на списанија и слични промотивни форми, вон светот на видео игрите кои ги имаат прославено.
Секако, најпозната виртуелна личност што излегла од своите рамки е Лара Крофт, која „доживеа“ и да ја играат реални луѓе. Најавена е нова итерација во која изгледот на Лара ќе биде троа пореален (особено облините).

Да се направи компјутерски-генериран лик што делува вистински барем на екранот бара огромно знаење, прецизни алатки и осет за анимација. Оваа нова форма на куклен театар ги привлекува младите аниматори кои се желни своите дела да ги прикажат на светот. За да може да влезат во конкуренција за „мис на светот“, ликовите не треба само да „личат“, туку се обврзани и да „глумат“ во куси филмчиња што би ги прикажале нивните способности.

Една од најтешките работи за моделирање во програмите за тридимензионална анимација е косата, па не е ни чудо што дел од кандидатките носат капи, качулки и слично. Токму затоа, 80% овогодинешните финалистки претставени на сајтот се гологлави.

Од аспект на употребливост, би било добро линковите до видео-содржините на сајтов да бидат презентирани со информација за големината на филмчињата. Во сите други аспекти, сајтот е лесен за користење и овозможува и технолошки и естетски задоволства, особено ако му пристапувате преку широкопојасна врска (кабловски или со адсл).


Дополнување: повремени
Брзина: средна
Функционалност: одлична
Код: ХТМЛ, ЈС и др.
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 6/10
Јазик: англиски
Адреса: www.missdigitalworld.com
Датум на пишување: 13.05.2005.

Училиште за веб-дизајн

[лекториран]

Веб-манки (веб-мајмун) е оптимистички образовен сајт, чија цел е да пренесува знаења за правење веб-сајтови, дизајн, мултимедија, веб-програмирање и слично.

Лекциите имаат различни нивоа на тежина: и за почетници, и за активни автори, и за мајстори на овие занаети. Автори се програмери и дизајнери кои ги објаснуваат тајните на својата професија со нивниот секојдневен јазик, неоптоварен со технички или со формални конвенции, вметнувајќи свои мислења и духовити коментари. Доколку сакате да станете самоук веб-мастер (или веб-мастерка), ви препорачуваме да почнете оттука.

Веб-манки беше основан во 1996 година како дел од мрежата сајтови основана од екипата на магазинот „Вајерд". Иако жнееше успех и популарност, неговото влијание опадна со пропаста на бизнисите базирани на Интернет во 2000 година (пред се поради пресушување приходи од огласувачи и, можеби поради појавата на поструктурирани начини за учење на истите вештини, на пример на универзитетите).

Во февруари оваа година „Тера Ликос", компанијата што во меѓувреме стана сопственик на веб-манки, ги прогласи луѓето што ги плаќала да работат на него за „технолошки вишок". Иако дел од материјалите се загубиле низ годините, основната архива се уште е на веб и на располагање на сите кои сакаат учењето да го комбинираат со забава.


Дополнување: затворен сајт
Брзина: брзо
Функционалност: многу добра
Гугл-ранг: 8/10
Јазик: англиски
Адреса: www.webmonkey.com

А9 – машината за пребарување во сопственост на Амазон

[нелекториран]

А9 е машина за пребарување чија организациона структура се базира на интегрирање податоци од разни извори, почнувајќи од резултатите за текстови и слики од Гугл, но и од базата со книги што се продаваат преку книжарницата Амазон, референци од Гурунет, филмови од ИМДБ и анализа на сурфањето на корисниците на нивната сопствена лента со алатки (toolbar).

А9 се издвојува од бројната конкуренција поради нивниот нагласок не само на пребарувањето, туку и на „организирањето и запомнувањето на информациите – сè на едно место“. Сите пребарувања се запишуваат и корисникот добива информација дали се работи за нови резултати или веќе има кликнато на нив, а може и да се разгледуваат по датум.

Особено полезно кај резултатите е што покрај вообичаените наслов, линк, кус опис и големина на страницата има можност да се видат и подетални информации за сајтот (site info) и тоа во две форми – концизно, преку стриповско облаче кое се појавува во слој над тековниот или опширно, преку посебна страница.

Концизните информации го опфаќаат рангот на сајтот (не е ист со рангот од Гугл) при што помала вредност укажува на популарен сајт, колку сајтови од базата линкуваат до него, неговата брзина и кога е првпат поставен. Подеталниот приказ укажува и на тоа кои сајтови се „слични“ со тековниот, презентирајќи линкови до оние кои ги посетувале неговите преостанати посетители.

Иако е тешко веројатно дека А9 ќе го преземе приматот на Гугл на глобално ниво, резултатите што ги дава може добро да послужат при правење на споредби на ефектот на повеќе сајтови кај популацијата што го користи неговиот софтвер, која претежно доаѓа од САД. Ова е особено важно за заинтересираните за е-трговија (e-commerce).

Дополнување: автоматски
Брзина: брзо
Функционалност: многу добра
Код: ДХТМЛ и др.
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
Гугл-ранг: 9/10
Јазик: англиски
Адреса: www.a9.com

378

Во денешниот број на „Време“ не се појавува рубриката „Веб-сајт на денот“.

377

Во денешниот број на „Време“ не се појавува рубриката „Веб-сајт на денот“.

376

Во денешниот број на „Време“ не се појавува рубриката „Веб-сајт на денот“.

Фондација „Електронска граница“

[нелекториран]

Целта на Фондацијата „Електронска граница“ - ЕФФ (Electronic Frontier Foundation) е бранење на слободата во дигиталниот свет. Неа ја сочинуваат „страствени луѓе: адвокати, технолози, волонтери и визионери, кои работат на заштита на вашите дигитални права“.

Оваа фондација е основана во јули 1990 година како одговор на заканите за слобода на говор на интернет, а нејзиниот веб-сајтот дава сè од себе да ја претстави минатата и тековната работа со што е можно повеќе податоци. Секако, голема улога во квалитетот на претставувањето игра и начинот на организирање, што исто така е на високо ниво. На пример, како рубрики во главното хоризонтално мени се појавуваат мапата на сајтот (погодна за слободно разгледување), тековните случаи на кои работат активистите, акцискиот центар (тековни кампањи), оддел за печатот и оддел со информации за фондацијата.

За посетителите на кои им требаат информации од определена област, а немаат потреба да дознаваат за организациската структура, во страничното мени на насловната страница дополнително стојат и темите на интерес, од анонимност и биометрија, до е-гласање, употреба на бежични технологии, РФИД и цензура.

Улогата на ЕФФ во регулирањето на законската рамка за дигитални комуникации е огромна во светски рамки, оти иако пред сè работат на американски терен. Импликациите од одлуките на владите на САД често наоѓаат пат до одлуките на владите во земјите кои, како нашата, се навлегуваат во глобалните текови и трендови.

Дополнување: често
Брзина: брзо
Функционалност: одлична
Код: ПХП, Флеш
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
Гугл-ранг: 9/10
Јазик: англиски
Адреса: www.eff.org

Марија Клаудија Кортес – боја во движење

[нелекториран]

Веб-сајтов претставува „интерактивно искуство на комуникација и симболизам со употреба на бои“. Сајтов е корисен и за луѓето што се занимаваат со дизајн, а и за сите други граѓани - конзументи на нивната работа, чие зголемено разбирање бездруго би влијаело на подигање на квалитетот на оваа гранка кај нас.

Презентацијата е поделена во три дела – запознавање со „ѕвездите“, филмчиња и лабораторија.

Ѕвездите се боите (црвена, портокалова, жолта, зелена, сина и виолетова), а секоја од нив е претставена како личност, со информации за тоа дали е примарна или секундарна (крвна група), што претставува во светот на современиот дизајн, односно нејзините позитивни и негативни особини, како и што симболизира во разни култури низ светот.

Преку цртаните филмчиња „на дело“ се прикажани особините на секоја од боите, а во лабораторијата посетителите можат да експериментираат со бои, предефинирани елементи и цртање на лице место, како и да решаваат квизови во врска со употребата на боите. Особено е интересен делот „калеидоскоп“, каде што се добиваат анимирани прикази на комбинации на основните бои и геометриски форми.

Причината за користењето на непрепорачливата техника на отворање ново прозорче за секоја јазична верзија е обезбедување контрола врз димензиите на приказот.

Авторката го направила сајтов како дел од магистерската работа по ликовна уметност, односно компјутерски графички дизајн, на американскиот факултет Рочестерски институт за технологија во 2003 година.

Дополнување: еднократно
Брзина: споро
Функционалност: добра
Код: флеш
Дизајн: флешерски
Навигација: прилагодлива
Пребарувач: нема
Клучни зборови: нема
Јавен бројач: нема
Гугл-ранг: 6/10
Јазици: англиски и шпански
Адреса: mariaclaudiacortes.com

Анонимно известување за сексуално преносливи болести

[нелекториран]

Доколку ви е незгодно на вашите партнер/(к)и во лице да им признаете дека сте откриле дека имате сексуално пренослива болест, тоа може да го сторите анонимно со испраќање електронска картичка преку сервисот „Ин спот“.

За корисниците лоцирани во Сан Франциско има и листа (карта) на клиники каде што може да се проверат (под итно), а во рубриката „ресурси“ има одличен избор на линкови до сајтови на оваа и сродни теми.

Сајтов го има изведено здружението на граѓани ИСИС, преку спонзорство од Одделот за здравство на локалната самоуправа на Сан Франциско, што е пример за партнерство помеѓу јавниот и невладиниот сектор.

Кражбата на идентитетот (неовластено користење на лични податоци) е еден од најактуелните злостори во САД, па јасната гаранција од ИСИС дека податоците кои поминуваат низ системот нема да бидат предадени на ниедна владина или приватна агенција го зајакнува кредибилитетот на сајтот. Со тоа, во услови кога нема експлицитна законска заштите (како во Македонија, на пример) тие се ставаат на располагање да бидат приватно тужени за измама, ако излажат.

Пријатната атмосфера ја поткрепуваат и техничките и уредничките решенија за борба против спам (испраќање недобредојдени пораки) – барањето да се внесе лозинка со пречукување на текст од сликичка неразбирлива за роботи и замолница која ја буди совеста.

Графичките елементи се добро вклопени во дизајнот, без разлика на тоа што асоцираат на само една од можните варијанти за размена на телесни течности и сексуален контакт. За главното мени можело да се употреби текст наместо многу потешките сликички, а пофално е што преку него се укажува и на моменталната позиција на сајтот.

Дополнување: неопределиво
Брзина: брзо
Функционалност: добра
Код: ХТМЛ, ЈС, ПХП
Дизајн: базиран на графика
Навигација: стандардна
Пребарувач: нема
Клучни зборови: нема
Јавен бројач: нема
Гугл-ранг: 5/10
Јазик: англиски
Адреса: www.inspot.org