Ментална акробатика - блог што се бори за слобода на печатот во Кенија

Ментална акробатика - блог што се бори за слобода на печатот во Кенија

„Ментална акробатика“ е блог што постои три години, а многу се прослави во последнива недела благодарение на тоа што Боинг боинг (боингбоинг.нет) редовно се повикува на него во врска со упадите на кениската полиција во редакции на приватен весник и телевизиска станица.

Блогов, воден од млад и анонимен Кениец, помага во ширењето информации за овие настани: реакции, фотографии и цели филмови, прошверцувани од интерниот-систем за набљудување на редакциите.

Овој блог не користи некој бесплатен блогерски сервис, туку го има инсталирано софтверот Вордпрес на свој закупен веб-сајт со сопствен домен. Овој потег е во согласност со препораките на гуруто на употребливоста, Јакоб Нилсен, кој вели: „На адресите на блогови со blogspot.com, typepad.com и слично наскоро ќе се гледа како на адреси за е-пошта со @aol.com (кај нас @yahoo.com) или веб-сајт на Геоситис - карактеристика на наивен почетник, кој не треба да се зема сериозно. Дозволувањето некој друг да го поседува вашето име значи дека тие ја поседуваат вашата судбина на Интернет“.

Вордпрес, исто така, овозможува понапредни функции, како категоризирање на постовите по теми, што овозможува полесно архивирање и разгледување. Иако веќе подолго време се шушка дека и сервисот Блогер ќе додаде вакви функционалности, тоа се уште се нема случено.

„Ментална акробатика“ е член на неколку блогерски мрежи, локални, континентални и глобални, што овозможува негова поголема видливост и релативно висок ранг на Гугл.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 7/10
Јазици: англиски
Адреса: www.mentalacrobatics.com

Критичар за реклами

[лекториран]

„Критичар за реклами“ е наменет за пренос на вести и на информации за рекламната индустрија, најпознат по тоа што уште од 1999 година го промовира концептот на понуда на видеоклипчиња за симнување.

Голем дел смешни филмчиња што изобилуваат на македонските „забавни“ портали се реклами што првобитно се појавиле овде. Најсмешно е што веб-сајтовите што ги пренесуваат им обезбедуваат дополнително и континуирано бесплатно рекламирање на брендовите што ги направиле рекламите и биле доволно мудри да ги објават на „Критичарот“. Секако, постои извесна веројатност дека оваа шема е случајна. Освен што веројатно земаат пари од авторите на рекламите, сопственициве на веб-сајтот уште и наплатуваат претплата за оние што сакаат да ги симнуваат од кај нив, што ја зголемува нивната привлечност. Привидот на цензура е моќно пропагандно оружје, затоа и фирмите што ја продаваат и прифаќаат тој вид на производи да биде јасно обележан со назнака дека е „забранет“ за одреден дел од населението.

„Критичарот“ е добар и како извор на информации во врска со „креативниот потенцијал“ на македонската рекламна индустрија. Некои од „оригиналните идејни решенија“ што се вртат по нашите медиуми имаат свој зачеток токму тука.

Од аспект на употребливост, недостиг на веб-сајтов е тоа што отвора и попап-прозорче при вчитувањето на насловната страница, оти тоа повлекува дополнително трошење ресурси, неинтерактивност и неоставање можност за избор на корисникот, безбедносни ризици ако поради тоа корисникот реши да ја деактивира заштитата од поп-апи. Од аспект на оптимизација за машини за пребарување, добра страна е што форматот на адресите на написите е во едноставна форма, со тоа што името на ХТМЛ-датотеките се гради со употреба на клучните зборови, што придонесува за поголема видливост.


ЗА ВЕБ-САЈТОТ

Дополнување: често
Брзина: средна
Функционалност: добра
Код: ПХП/ХТМЛ
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазици: англиски
Адреса: adcritic.com

Блогот на Би

[лекториран]

Блогот на Би е еден од неколкуте што по својот квалитет се издвоија од мноштвото блогови отворени на првиот македонски блогерски сервис Блогерај.

Овој веб-сајт за блогирање, иако стаса со одредено задоцнување, сепак ќе биде од голема помош за луѓето што не го познаваат добро англискиот јазик, а би сакале своите идеи да му ги соопштат на светот - или барем на македонската јавност.

Освен што со доработениот, но не и пренатрупан дизајн остава добар визуелен впечаток, најјака страна на овој блог се студиозноста и полезноста на написите, кои често мешаат стручни теми (авторката е психолог) со теми интересни за јавноста што имаат практична примена во секојдневието.

Темите на блогот опфаќаат мислења на авторката, осврти од социјална психологија за однесувањето на луѓето во групи, како членови на општество и во интеракција со други, како и критики на општествени феномени и медиумски производи, меѓу кои и рецензии на филмови.

Добра страна на уредувачката политика е и неконфронтирачкиот однос кон многубројните коментари, со обид да им се помогне на заблудените, наспроти обидите да се испровоцираат навредливи „дискусии“.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП (друпал)
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: има
РСС/Атом: има
Гугл-ранг: 4/10
Јазик: македонски
Адреса: blogot.blog.com.mk

Гугл ток - директен разговор, интегриран со е-пошта

[лекториран]

Преку новата алатка за разговарање, „Гугл“ прави пробив на пазарот на инстант-месинџери и програми за интернет-телефонија. „Гугл ток“ (Google Talk) овозможува муабетење преку пораки и со пренос на глас.

Најголема новина во врска со „Гугл ток“ е што тој, освен како посебно програмче од 900 килобајти што може да се симне и инсталира на компјутерот од корисникот, е вграден и во бесплатниот систем за е-пошта на „Гугл“, „Џи-мејл“. Ова овозможува не само користење на сервисот од каде било, дури и од јавни машини или машини на кои корисникот нема привилегии да инсталира, но пред се искористување на веќе постојната критична маса на корисници на „Џи-мејл“, односно ефектите на вирален маркетинг.

Вирален или вирусен маркетинг (вирал маркетинг) е техника на рекламирање што ја искористуваат постојните социјални мрежи за да предизвикаат експоненцијални зголемувања во свесност за брендови, преку вирални процеси што личат на ширење епидемија. При тоа, преносот на информации е многу брз и со широк опсег, преку лични контакти (word of mouth) засилени со употребата на Интернет.

Иако и други инстант-месинџери, како „Ајсикју“, имаат веб-варијанти, во досегашната практика тие не се истакнале како рамноправни партнери на „основните“ верзии.

Кај Гугл ток, од друга страна, веб-варијантата е основна и активно ги користи сите потенцијали на „Џи-мејл“ – како на пример, огромниот простор од сандачето за чување записници (логови) од муабетите.


ЗА ВЕБ-САЈТОТ

Дополнување:
неопределиво
Брзина: брзо
Функционалност: одлична
Код: ХТМЛ и др.
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 9/10
Јазик: англиски
Адреса: talk.google.com

Фотоглас

[лекториран]

Фотоглас е буквален превод на името на добротворната организација „Фотовоис“ (PhotoVoice) чии членови се трудат да го поттикнат користењето на документарна фотографија од страна на оние што традиционално се нејзин предмет на интерес, да станат нејзини создатели, да преземат контрола врз тоа како ги перцепира остатокот на светот, истовремено учејќи нова вештина што може да им го збогати животот.

На веб-сајтот се претставени резултатите од нивната работа, поделени по проекти. За секој проект се дадени основни информации, впечатоци од вклучените фотографи, како и фотогалерии.

Фотогалериите се изведени во Флеш со доста интуитивен интерфејс и работат задоволително брзо. Арно ама ова решение оневозможува директно линкување одделни фотографии, а е неповрзано и со формуларот-барање за публикување некоја фотографија. Посетителот заинтересиран да ја промовира работата на Фотовоис мора да го запомни кодот на фотографијата, кој не се гледа на прв поглед, а потоа рачно да го впише во формуларот.

Целна група на проектите се маргинализирани групи низ целиот свет, од жени заразени со ХИВ во Конго, преку улични деца во Лондон, до бегалци во Непал. Целестина, една од Конгоанките, изјавила: „Живеевме среќно со мажот ми додека не почна да бара и друга жена.

Го предупредив да престане, но одбиваше да ме послуша. Се зарази од втората жена. Еден ден, едно од нашите деца беше неарно и го однесов в болница. Му требаше трансфузија на крв. Мажот ми донира - детето се разболе и умре. Еден доктор ни кажа дека умрело од сида.

Тоа го длабоко го погоди мажот ми - тој набргу умре. Семејството ме отфрли и веќе не ми помага во грижата за нашите седум деца. Низ моите фотографии сакам да ја покажам реалноста на ХИВ/СИДА и да ги поттикнам луѓето да внимаваат“.


ЗА ВЕБ-САЈТОТ

Дополнување: повремено
Брзина: средна
Функционалност: добра
Код: ХТМЛ/Флеш
Дизајн: комбиниран
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазици: англиски
Адреса: www.photovoice.org

Зголемување на пристапот за луѓе со посебни потреби

[лекториран]

Веб-сајтот „ВебЕјм“ има цел да го зголеми потенцијалот на вебот за луѓето со посебни потреби. Оваа група на луѓе е често занемарена при развојот на софтверските решенија (особено во Македонија) и ваквиот вид на дискриминација наидува на се поголема осуда во развиениот свет.

Со оглед на тоа што одамна постојат стандарди за тоа како да биде попристапен даден софтвер, оние што не ги спроведуваат во последно време се цел и на правни мерки, како тужби за дискриминација.

ВебЕјм овозможува совладување на техниките и на концептите што се дел од стандардите, посочува методи на координација и водство, а исто така нуди и листи на софтвер (бесплатен и комерцијален) од оваа област, како и совети за тоа како да се организираат обуки или како да се бара помош (преку учество во дискусии, форуми и преку листа на консултанти).

Напомена: некои од алатките, како Вејв, овозможуваат директно тестирање на веб-сајтови за пристап на луѓе со посебни потреби, но може да се неприспособени за веб-страници напишани со други јазици или кодни табели.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.webaim.org

Блогот на „Веб-сајт на денот“

[лекториран]

Одржувањето на блогот „Веб-сајт на денот“ е за да се искористат можностите на медиумот, пред се во насока на отворање нови канали за комуникација со читателите и овозможување дополнителна интерактивност.

Преку блогот читателите може да предлагаат нови веб-сајтови за рецензија, но и да дискутираат за веќе објавените рецензии преку коментари.

Во вид на постови се објавуваат и писмата од читатели што се жалат, демантираат некои наводи или, пак, пофално се изразуваат во однос на рецензиите. Блогот, исто така, служи и како архива на написите од рубрикава што се појавуваат во весникот, подредувајќи ги хронолошки.

Поновите написи се дополнуваат секојдневно, додека постарите, објавени пред излегувањето на блогот, полека се внесуваат во архивата во заднина. Тоа ќе одземе повеќе време, поради ан-гажманите на авторот. Но, ќе се согласите, се исп-латува да почекате!
Во согласност со правилата на употребливост на блогови, линкови до позначајните постови, особено рецензиите на македонските блогови, се издвоени во лентата за навигација од десната страна.

Предност во водењето на блогот е транспарентната политика при линкувањето, со отворено повикување на другите блогери на реципрочна размена на линкови.
Голем прилив на посетители се забележува преку блог-агрегаторите на Најди! и на Маседониа срч.


ЗА ВЕБ-САЈТОТ

Дополнување: секојдневно
Брзина: брзо
Функционалност: добра
Код: блогер
Дизајн: блогерски
Навигација: стандардна
Пребарувач: има
Клучни зборови: има
Јавен бројач: има
РСС/Атом: има
Гугл-ранг: 3/10
Јазик: македонски
Адреса: sajtnadenot.blogspot.com

Пребарување и споредба на цени на книги

ИСБН.ну овозможува барање книги по наслов, автор или тема. Откако дадена книга ќе се пронајде, односно откако ќе се утврди нејзиниот ИСБН-број, веб-сајтов врши споредба на цените за истото издание кај 14 продавници за книги преку Интернет.

Овој „доказ за концепт на неколку идеи за информациски менаџмент, организација и за линкување“ овозможува пребарување на околу три милиони наслови печатени во САД, како и некои надвор од нив.

Резултатите овозможуваат директно поврзување, без посредни чекори, со сајтот на книжарницата што по споредбата на цени посетителот ја одбира како место од кое ќе нарача. Тие може да бидат подредени и според цената и брзината на испорака.
Особено пофално за веб-сајтов е што има јасно назначена применета политика за приватност, со која се обврзува дека не ги задржува податоците за индивидуалните корисници.

Политиката, исто така, јасно го опишува однесувањето на кукија и други помошни механизми што служат за следење на однесувањето при посетите.
Поради успешноста во интегрирањето различни типови информации за овозможување полесно купување, овој услужен систем има добиено поволни критики од повеќе респектабилни американски медиуми.

Фуснота: ИСБН (ISBN = International Standard Book Number) е систем за единствено означување книги, оформен во Велика Британија во 1966 година и прифатен како меѓународен стандард (ISO 2108) во 1970 година.


ЗА ВЕБ САЈТОТ

Дополнување: автоматско
Брзина: брзо
Функционалност: одлична
Код: вики
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: http://isbn.nu

Википедија на македонски јазик

[лекториран]

Википедија на македонски јазик е дел од повеќејазичниот проект за креирање целосна и точна слободна енциклопедија. Секој посетител може да додава и да менува статии.

Македонската верзија постои од крајот на 2004 година и има речиси 4.000 статии.
Приклучувањето на овој проект може да е исклучително полезно за задоволување на приоритетната потреба за поголемо количество содржини на македонски јазик (назначена и во Националната стратегија за развој на информатичко општество), но и од аспект на промоција на македонската култура во светот.

Имено, на насловната страница на целата енциклопедија, во горниот најупадлив дел се претставени верзиите што имаат повеќе од сто илјади написи. Со оглед на тоа што таа не само што има висок ранг на Гугл (8) туку и се почесто се користи како негова замена кога се бараат дефиниции, нема потреба да се елаборира значењето на „испливувањето“ на линкот до македонската верзија во ова елитно друштво.

Во иницијативата може да учествува буквално секој што има пристап на Интернет, а написите не мора да се „фермани“. Доволно е да се дадат концизни основни податоци за поими или за личности, пренесени од јавно достапни текстови - како на пример учебници. Друг начин на пополнување е со превод на еквивалентните написи од англиската или од другите верзии на енциклопедијата.

Најспособни да се вклучат се секако блогерите, но исклучително добро би било кога би се активирале и училиштата, кои благодарение на Кина имаат компјутерски училници, благодарение на САД имаат пристап на Интернет, па преостанува наставниците да почнат да ја користат Википедија како алатка за ширење и за дополнување на знаењето на учениците.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: вики
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: нема
РСС/Атом: нема
Гугл-ранг: 0/10
Јазик: македонски
Адреса: mk.wikipedia.org

Виртуелна прошетка низ Париз

[лекториран]

Виртуелната прошетка низ Париз е дел од конзорциум на веб-сајтови што покриваат и други европски градови, како Амстердам, Барселона, Лондон… Посетителите на веб-сајтот, без потреба да потрошат пари на патување, може да се наполнат со туристички впечатоци од разгледувањето на главните културни и туристички атракции.

Прошетките се уредени на сличен начин како и во реалноста, со тоа што кога се наоѓате на дадена локација имате можност преку соодветни линкови да преминете на нејзините соседни. Движењето и местоположбата по центарот се прегледно претставени и со мапа, која исто така може да послужи за навигација. Трет метод на разгледување е со „земање такси“ – односно пронаоѓање локации преку текстуални линкови.

Веб-сајтов е фино организиран и нуди низа можности за интеракција: од оставање мислење за хотелите внесени во неговата база, преку форумот, до можноста за директен муабет со посетителите на сите веб-сајтови од мрежата преку јава-аплет.

Од аспект на оптимизација за машини за пребарување, најголем недостиг на веб-сајтов е употребата на рамки. Иако како алтернатива е поставена и верзија без рамки, таа е некомплетно имплементирана и во неа галериите не работат како што треба, оти функцијата во јаваскрипт за враќање назад при клик на голема верзија на фотографија не е вметната во кодот. Во самите галерии би било добро да се имплементираат и линкови за претходна и следна слика, со што би се зголемил ефектот на разгледување на самото место.
Уште еден технички недостиг е што јавниот бројач на посети е поставен само на една страница, наместо на сите, па се добива нереално мала бројка.


ЗА ВЕБ-САЈТОТ

Дополнување: неопределиво
Брзина: средна
Функционалност: добра
Код: ЦГИ, ЈС, Јава
Дизајн: рамковен
Навигација: стандардна
Пребарувач: има
Клучни зборови: има
Јавен бројач: делумно
РСС/Атом: нема
Гугл-ранг: 5/10
Јазик: англиски
Адреса: www.paris.cx