Поп-пејачката Дани

[лекториран]

Дани Димитровска е пејачка што со својот квалитет како автор и изведувач заслужува многу поголема популарност и присуство на Интернет од она што и го овозможува нејзиниот тековен веб-сајт. Направен врз принципот на „сликовница“, тој не е оптимизиран за пристап од машини за пребарување, а тоа што последната вест датира од пред речиси 4 месеци исто така не зборува во негова полза.

За подобрување на промоцијата на својата музика преку Интернет Дани би направила вистински потег доколку ги лиценцира своите песни, кои веќе дозволува да се симнат во формат мп3 под лиценцата „Криејтив комонс“ (creativecommons.org). Тоа не само што ќе и обезбеди голем публицитет преку каналите на заедницата за слободна култура, туку и прецизно ќе ги дефинира правата што им ги отстапува на корисниците - на пример, да ги користат песните за лична употреба, но не и за комерцијални цели.

Некои од видеата од сајтот не работат. Нареден чекор би требало да биде нивно „емитување“ преку сајтовите за видеоклипови, како Ју тјуб.

Инаку, доменот dani.com.mk е регистриран од 2004 година на име на „Македонски телекомуникации“ и во моментов не води никаде. Неговата недостапност е веројатната причина што овој сајт е регистриран на домен со неинтуитивно име. Од друга страна, danidimitrovska.com.mk е слободен и е препорачливо и тој да се регистрира како примарен или алтернативен начин за пристигнување на сајтов.


Дополнување: премногу ретко
Брзина: брзо
Функционалност: слаба
Код: Флеш
Дизајн: флешерски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 2/10
Јазици: македонски и англиски
Адреса: www.dani4u.com.mk

САД - земја на информатичар(к)и: љубовни контакти

[лекториран]

Во наредните неколку броја рубрикава ќе претстави неколку влијателни веб-сајта што магазинот „Вајерд“ ги користи како референтни точки за процена на ниво на погодност дадена средина да биде привлечна за информатичари од обата рода.

Иако англискиот еквивалент „гик“ носи првично пејоративно значење означувајќи асоцијални закржлавени индивидуи закопани во книги или електроника, благодарение на издигнувањето на свеста за нивното влијание, терминот полека добива и позитивна конотација. За среќа, во Македонија и во цела бивша Југославија, „компјутерџија“ има позитивно значење, благодарение и на песната „Програм твој компјутера“ (1984) на „Денис и Денис“, која нив ги претставува во вистинско светло - како идеални љубовници.

Сервисот „Гик ту гик“ е наменет за среќавање, спријателување и евентуално романтично поврзување информатичари и информатичарки, нагласувајќи дека „интелигенцијата и лојалноста“ се особини што се карактеристични за нивните корисници.

Според управата, потребата од посебен сајт за нив е наметната од тоа што и „тие се посебни, имаат интереси што не се совпаѓаат со општата популација, па и традиционалните методи на додворување може да не функционираат. Основно е дека ако барате компјутерџија/ка, на обичните сајтови мора да пребарате илјадници профили за да дојдете до таква личност“. Сервисот нуди и посебен систем за оценување на тоа дали двајца се компатибилни.


ЗА ВЕБ-САЈТОТ

Дополнување: автоматско
Брзина: брзо
Функционалност: одлична
Код: комбиниран
Дизајн: комбиниран
Навигација: стандардна
Пребарувач: има
Клучни зборови: неискористени
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.gk2gk.com

Комичната телевизија на француски куќни помошнички

[лекториран]

Телевизијата на француски куќни помошнички е еден од најпознатите медиуми што ја комбинираат дистрибуцијата на видеоматеријали преку Интернет.

Концептот е во вид ТВ-серија поделена по епизоди. Секоја епизода е на некоја образовна тема, односно тема од областа „направи сам“, но презентирана на забавен начин со употреба на комичната атмосфера поврзана со стереотипот на француски куќни помошнички.
Темите се движат од пронаоѓање музика на Интернет, преку тоа како да регистрирате домен, до како да трампите добра и услуги преку Интернет.

Форматот е кратки клипови од 2 до 5 минути, што ги прави идеални за споделување меѓу сурферите, па често ја преземаат улогата на „вирални видеа“ што се шират преку социјални мрежи.

Видеозаписите во прво време беа поставен и на Ју тјуб, а сега се хостирани на Реввер, сервис што, освен инфраструктура на хостинг, нуди и опција за делење на приходот од огласи со своите членови.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: комбиниран
Дизајн: комбиниран
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: има
Гугл-ранг: 5/10
Јазици: англиски
Адреса: frenchmaidtv.com

Научнофантастичен агол

[лекториран]

„Научнофантастичниот агол“ го води Франческа Блек, која е уредничка и авторка на написите на веб-сајтот. Цел на веб-сајтот е промовирање на научната фантастика, која таа ја дефинира како „форма на шпекулативна белетристика, која во принцип го разгледува влијанието на замислена наука и технологија на општествено и индивидуално ниво“.

Најголем дел содржини на „Аголот“ се реклами за производи произлезени од познати научнофантастични серијали („Војна на ѕвездите“, „Ѕвездени патеки“, „Екс-фајл“, „Зона на самракот“, „Галактика“ и други), но има и написи за влијанието на жанрот во општеството, потеклото и вредноста на одредени дела. Покрај тоа, присутни се и вести поврзани со тие клучни зборови што ги презема од Диг преку иксемел.

Основен недостиг на веб-сајтов од аспект на употребливост е отворањето нови прозорци без експлицитно барање на корисникот. Оние што користат нови верзии на Фајерфокс може да си приспособат ваквите прозорци да им се отвораат во нови јазичиња, но за другите тоа значи дополнително трошење мемориски и процесорски ресурси, најчесто непотребно.

ЗА ВЕБ-САЈТОТ

Дополнување: често
Брзина: брзо
Функционалност: средна
Код: ХТМЛ
Дизајн: текстуален
Навигација: променлива
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 2/10
Јазик: англиски
Адреса: www.science-fiction-corner.com

Одбери еден, сите се исти и онака

[лекториран]

„Одбери еден, сите се исти и онака“ е блог што го основале „неколку девојчиња“ оти, наводно, морало „нешто да се преземе по сите настани“ што и се случуваат „на една просечна сингл грл во оваа наша средина“ и пошироко. Примарната активност е катарзично споделување вицкасти анегдоти.

Уредувачката политика на анонимните авторки на блогов се карактеризира со проактивност, која се огледа во пријавување по агрегатори, сервиси за следење блогови и поттикнување размена на линкови со други блогови.

Низ постовите провејува тенденција на воспоставување визуелен идентитет преку користење илустрации за дополнувања на впечатокот, претежно карикатури или фотографии што ја одразуваат содржината или создаваат асоцијации.

Предолгото и тешко за прецизно помнење име на доменот, исклучивата употреба на здебелен (болд) текст и пишувањето на македонски со транслитерација на англиска латиница ја намалуваат употребливоста на блогов. Отстранувањето на овие недостатоци во раната фаза на неговото постоење ќе придонесе за намалување на потребата за кореспонденција со оние што ќе го линкуваат во иднина, имање алтернативи кога нешто ќе треба да се нагласи во постовите, како и за овозможување повеќе луѓе што пребаруваат на македонски (со кирилица) да го пронајдат блогот според содржините.

Дополнување: често
Брзина: брзо
Функционалност: мн. добра
Код: ХТМЛ (блогер)
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 0/10 (нов сајт)
Јазик: македонски
Адреса: odberiedensiteseistiionaka.blogspot.com

Омниглот: јазиците и азбуките од цел свет

[лекториран]

„Омниглот“ е веб-сајт што нуди ресурси во врска со јазиците и системите за пишување од целиот свет. Особено е практичен одделот за корисни фрази и чести изрази на разни јазици од целиот свет, но тоа е само дел од широкиот дијапазон на речиси енциклопедиското знаење што се содржи на сајтов.

Претставени се речиси сите азбуки и системи за пишување што се моментално во употреба, како и некои старовремски и „вештачки“ - направени за потреби на измислени јазици и слично. Присутни се и информации за некои од јазиците поврзани со тие системи, како и написи на разни јазици, особено од областа на социолингвистиката, совети за учење јазици и книжарница.

Особено се полезни страниците со линкови што овозможуваат пристап до други сајтови на сродни теми, или по теми. На пример, на прашањето како се пишува вашето име со најразлични азбуки од светот се одговара преку линкови до специфични страници од веб-сајтови за кинески, арапски, јапонски..., кои го нудат одговорот во рамките на нивната област. Дополнително и логично, „Омниглот“ има и блог на кој ги забележуваат активностите или ставаат понеформални написи.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски и други
Адреса: www.omniglot.com

Претседателот на Киргистан

[лекториран]

Веројатно не е коинциденција што еден од ретките веб-сајтови од Киргистан што е достапен деновиве преку Интернет е веб-сајтот на нивниот претседател.

За жал, ниту сајтовите за вести на руски или на англиски, како ни оние на повидните невладини организации не се достапни за посетители од странство од почетокот на антивладините демонстрации минатата недела.

Од уредувачки аспект, содржината на веб-сајтов е очекувана, а се состои претежно од протоколарни информации, изјави на претседателот по разни прашања и позитивни вести.
Сајтот е изграден на платформа од слободен софтвер и користи Фри БСД-оперативен систем.

Единствено што на прв поглед паѓа в очи е што сликите се неоптимизирани за веб, односно поради нискиот степен на компресија го забавуваат вчитувањето на страниците.


ЗА ВЕБ-САЈТОТ

Дополнување: секојдневно
Брзина: средна
Функционалност: средна
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: киргиски, руски, англиски
Адреса: www.president.kg

Блогот на Рибаро

[лекториран]

Блогот на Рибаро е еден од македонските блогови од сервисот Блогерај, со растечко влијание, што се одразува и на неговата посетеност. Во однос на содржините, авторот Јане Ѓорѓиоски има еклектичен пристап, презентирајќи мислења и творби на најразлични теми, од блогот како медиум до презентирање сопствена и поезија од други автори.

Карактеристично за блогот на Рибаро е што за линкови до други блогови во блогролот користи банери-сликички што сам ги изработува, а истата практика ја применува и за други видови линкови. Ова го забавува вчитувањето на блогот, но му дава карактеристичен шмек. Некои од таквите банерчиња се појавуваат двојно: и во десната и во левата колона, за што нема преголема потреба.

Употребливоста на постовите од овој блог може да се подобри со користење поуедначена големина на фонтови и употреба на празниот простор меѓу редовите и графичките елементи.

Авторот го уредува и блогот „Јас Јуриј Г.“, кој своите содржини ги црпи од истоимената книга на починатиот поет Горан Иванов Крстевски (1971-2003), обезбедувајќи нова форма на достапност на поезијата.


ЗА ВЕБ-САЈТОТ

Дополнување: често
Брзина: брзо
Функционалност: добра
Код: друпал
Дизајн: комбиниран
Навигација: графичка
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 3/10
Јазик: македонски
Адреса: ribaro.blog.com.mk

Долгата опашка

[лекториран]

Долгата Oпашка е термин со кој се опишуваат деловните и економски модели на компании како Амазон или Нетфликс. Потекнува од статистиката и се однесува на дистрибуции кај кои прво има популација со висока амплитуда, по која следува „долга опашка“ од настани со ниска амплитуда, кои кумулативно може да бидат повеќе или потешки од оние „високите“.

Во однос на Интернет, Долгата Oпашка (The Long Tail) првпат е употребена од уредникот на списанието „Вајерд“ Крис Андерсон во 2004 година, врз база на есеј од Клеј Ширки, кој забележал дека релативно мал број блогови имаат многу линкови кон нив, додека до долгата опашка од милиони други поединечни блогови водат релативно малку линкови.

Андерсон, кој во меѓувреме има напишано и книга на темата, тврди дека иднината на продажбата е на производи за кои има мала побарувачка или обем, но кои колективно може да се продадат во поголемо количество од некои хит-производи. Во основа, се работи за премин од масовен пазар кон милиони ниши. Овој пристап, во комбинација со каналите за дистрибуција што ги отвора користењето Интернет, отвора огромен потенцијален пазар во сите стопански гранки.

Покрај издавањето на книгата, Андерсон има отворено блог на кој ги следи темите изложени во неа, презентирајќи нови примери за примена на концептот во реалниот живот. На блогот се достапни и написи и извадоци од книгата, полезни за вовед во концептот.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: тајппад
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: има
Гугл-ранг: 7/10
Јазици: англиски
Адреса: longtail.typepad.com

Стрипот „Слободен пад“

[лекториран]

„Слободен пад“ (Freefall) е популарен стрип што излегува на Интернет [веб-стрип], чиј автор е Марк Стенли. Во него е изложена хумористична научнофантастична сторија за неволјите на вселенскиот брод „Дивата кокошка“ чиј екипаж го сочинуваат Сем Старфол - симпатичен вонземски трчилаж, Хеликс - детинест робот и Флоренс Емброуз - припадник на генетички модификуваниот вид „Боуменов волк“ (т.е. антропоморфно суштество од родот кучиња).

Стенли го објавува стрипот од 1998 година и досега се објавени над 1.300 ремени. Стрипот оригинално бил црно-бел, но првите 388 стрипа се достапни и во верзии обоени од неговите читатели. Од 21.4.2006 година стриповите официјално ги бои Џорџ Патерсон.

Сторијата го опишува животот на Флоренс, чесен и работлив технички инженер, која е грабната да работи за не-баш-етичкиот Сем. Од почетокот на стрипот, Флоренс се обидува да го поправи вселенскиот брод на Сем, истовремено трудејќи се да не полуди поради глупостите што ги прават Сем и Хеликс. Лошата репутација на Сем на планетата Џин на која се заринкани е толкава што властите го обвинуваат за каква било лоша случка појава во нивното општество. Тој носи скафандер со нацртан смешен лик, но наводно неговото вистинско тело личи на сипа.

„Слободен пад“ одржува доба репутација во однос на научната основа, која авторот се труди да ја одржи на реалистично ниво, без употреба на уреди од типот deus ex machina (односно „магични“), како што е „ворп погон“, „вештачка гравитација“ или „зраци за транспортирање“. Стрипот содржи и интерни шеги на сметка на „Ѕвездени патеки“. На пример, регистарскиот број на бродот е 1071-CCN, што е обратно од оној на „Ентерпрајз“ NCC-1701.

ЗА ВЕБ-САЈТОТ

Дополнување: трипати неделно
Брзина: брзо
Функционалност: одлична
Код: ХТМЛ
Дизајн: стриповски
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазици: англиски
Адреса: freefall.purrsia.com