Интерактивни панорами

Рапр е веб-сајт кој овозможува преобразување на статичните панорамски слики во интерактивни панорами. За да направите интерактивна панорама, мора да изберете некоја панорамска слика која е веќе поставена на сервисот за слики Фликр. Доколку имате ваша панорамска слика на која сакате да и додадете движење и интерактивност, најпрво поставете ја на Фликр во некоја од групите, додека пак доколку само сакате да разгледувате, не треба да правите ништо друго, освен да си избирате панорами.

Откако ќе изберете една панорама, можете да уживате во нејзиното автоматско придвижување, или пак вие да ги избирате саканите правци на движење, продлабочувања на сликата или оддалечувања од неа. Многу значајно е што вака генерираните интерактивни панорами можете да ги вградувате насекаде: на вашите лични страници, профили или веб-сајтови.

Дополнување: ретко
Брзина: средна
Функционалност: одлична
Дизајн: веб 2.0
Навигација: минимална
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.wrapr.org

Како најлесно се прави веб-сајт?

Во последно време, се чини дека трендот за правење блогови полека се заменува со нов тренд кој иако може да делува преамбициозно, всушност претставува многу очекувана и природна тенденција. Блоговите се едноставни, но и ограничени, па луѓето сакаат нешто помоќно, кое сепак ќе ја задржи едноставноста. Ова пак им е од особена важност на не толку напредните корисници кои сакаат да истражуваат, како и останатите, но и за едните и за другите, се повеќе станува важно да се троши што помалку време за да се создаваат што повеќе содржини и постигнуваат што поголеми ефекти.

Уибли е веб-сајт кој овозможува бесплатно и едноставно креирање на личен веб-сајт, кој за разлика од многу вакви сервиси изобилува со огромен избор на дизајнирани шаблони (templates), овозможува додавање на дополнителни страници, создавање на блогови во рамките на веб-сајтовите, додавање на мултимедијални и текстуални содржини со влечење, потоа игри, мапи, можност за рекламирање, читачи на полиња (feeds), како и лични елементи на креаторот. И за сето ова, скоро и да не треба да имате било какви предзнаења.

Ако досега не ви го понудивме вистинскиот сервис за да го изработите вашето онлајн портфолио, тогаш сега е вистинското време да му верувате на вашиот инстинкт и да го пробате Уибли. Ќе се заљубите на прв поглед.

Дополнување: често
Брзина: брзо
Функционалност: одлична
Дизајн: веб 2.0
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 7/10
Јазик: англиски
Политика за приватност: има
Адреса: www.weebly.com

Центар за дигитални приказни

Центарот за дигитални приказни е непрофитен проект за развој и истражување, посветен да им помага на луѓето да ги користат новите медиуми во раскажување на значајни приказни од нивните животи.

Дигиталното раскажување на приказни им овозможува на луѓето, кои немаат техничко познавање, преку користење на информациско-комуникациски технологии да создадат видео со кое прикажуваат своја приказна . Најчесто производот е 2-5 минутен филм кој е комбинација од наративен дел од лична приказна, проследен со фотографии и музика.

Страницата на центарот за дигитални приказни овозможува прегледување на видеа од ваков тип, креирани од различни корисници. Видеата се организирани во категории, постои дел за видеа кои се прегледуваат во моментот, како и најнови видеа. Сајтот нуди можност за поставување на свое видео и за тоа секако потребна е регистрација.

Дополнување: често
Брзина: брзо
Функционалност: одлична
Дизајн: веб 2.0
Навигација: минимална
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: англиски
Политика за приватност: има
Адреса: www.storycircles.org

Сервис за чување и споделување фотографии

Доколку веќе користите некој онлајн сервис за складирање на слики и фотографии или пак ја искористувате таквата можност на сајтовите за социјално вмрежување, можеби нема да имате потреба од дополнителна алатка од ваков тип. Сепак, „Шуап“ е различен од останатите. Многу е едноставен за работа, нуди интересна комбинација од опции благодарение на кои можете без мака да добиете визуелно примамлив производ.

Овој веб-сајт не служи исклучиво како складиште на вашите фотографии. Покрај тоа што можете да си креирате фото албуми кои ќе ги исполнувате со вашите фотографии, од нив подоцна можете да креирате видеа со визуелен ефект по избор и музичка подлога која ќе ги придружува. Поставените фотографии и создадените видеа, можете да ги споделите со блиските по принципот на покана преку имејл, или пак директно да ги поставите на некои од популарните сервиси за социјално вмрежување.

Дополнување: редовно
Брзина: брзо
Функционалност: одлична
Дизајн: веб 2.0
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.shwup.com

Едиси - наједноставниот веб едитор

Со напредокот на веб-технологиите, скоро и да не претставува проблем, и луѓето со скромни технички познавања да одржуваат свои веб-сајтови и блогови и на тој начин да се изразуваат себеси онлајн. Сепак, изработката и одржувањето на веб-сајтови не е едноставна работа, додека блоговите најчесто располагаат со скромни можности.

Многу пати, одржувајќи блог, може да посакате да направите повеќе, или пак сакајќи да имате веб-сајт, посакувате да располагате со потребните технички знаења. Не знаејќи што можете да направите, на крајот не преземате ништо. Може да преземете само еден едноставен чекор - се вика „Едиси“ и претставува веб-едитор кој ќе ви понуди убав, модерен дизајн со можности за уредување и исполнување со содржина, како и уникатна веб-адреса преку која ќе може да му се пристапува на веб-сајтот што ќе го создадете. Исто така, доколку имате обезбедено домен име (веб-адреса), преку кое сакате да ви биде пристапен сајтот, истото можете да го поврзете со креираниот сајт со помош на Едиси.

Некои од опциите се следните: избор на саканиот изглед од палетата на понудени или пак изработка на свој, додавање на јазици на кои сакате да биде достапен вашиот сајт, додавање на вашето лого, фавикон (мала уникатна икона што ја придружува адресата во прелистувачот), уредување и додавање на категории, постови, мултимедијални содржини итн.

Едиси е одлична веб-алатка, но е се уште во фаза на развој. Додека ја тестиравме не забележавме проблеми. Сепак, може да се очекува дека во иднина ќе биде уште подобра и пофункционална и дека ќе има нови дополнителни опции, со оглед на тоа што редовно се работи на нејзиното унапредување.

Едиси е одлична алатка за изработка на веб-сајт за промоција на фирма, организација или индивидуа.

Дополнување: редовно
Брзина: брзо
Функционалност: одлична
Дизајн: веб 2.0
Навигација: минимална
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 4/10
Јазик: англиски, шпански,
руски, француски,
естонски, кинески
Адреса: www.edicy.com

Сподели македонски видео и аудио содржини

Маквидео е нов македонски веб-сајт наменет за споделување на македонски видео и аудио содржини. Иако на популарните сервиси за споделување на вакви содржини, можат да се најдат и такви поставени од страна на Македонци и на македонски јазик, досега не постоеше специјализиран веб-сајт кој ќе нуди исклучиво вакви содржини.

Пред да почнат посетителите на овој сајт да споделуваат содржини во аудио или видео формат, најпрво треба да ги прочитаат условите пропишани од страна на креаторите, до кои може да се пристапи преку соодветниот линк на дното на страницата. Потоа, потребно е и регистрирање на членство, после што може да се почне со поставување.

Сајтот изгледа многу солидно, содржините се категоризирани, дизајнот е чист и прегледен, навигацијата јасна, а пребарувачот функционален. Не изгледа како оние веб-сајтови кои се појавуваат на веб-просторот како несериозни акции и никогаш не се развиваат во нешто посериозно, културно и функционално. Маквидео навистина делува како веб-проект кој има изгледи да стекне голема популарност помеѓу македонските сурфери.

Во моментот кога беше пишувана рецензијава, посетителите имаа можност да прегледуваат вкупно 189 видео и 21 аудио содржини. Според темпото на работа на веб-сајтот, може да се очекува овие бројки да растат со голема брзина.

Дополнување: често
Брзина: брзо
Функционалност: одлична
Дизајн: модерен
Навигација: минимална
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: нема
Јазик: македонски
Адреса: makvideo.net

Се за шмизлите

Ново освежување на македонска блог сцена претставува адресата smizla.mk. Се работи за блог изработен на платформата на Вордпрес, но дотеран на оригинален начин и прилагоден да одговара на самите содржини. Постовите се долги и интересни, ги одликуваат цврсти ставови презентирани во вид на факти, а стилот е забавен и хумористичен.

Блогот е релативно нов, но веќе брои 20-ина сеопфатни постови. На блогов ќе најдете вакви наслови: „Манифест на една шмизла“, „сексот и шмизла“, „дали девојка ти е шмизла???“, „фати шмизла во 11 чекори... а немаш кеш“ итн. Првите коментари на посетителите на блогот се позитивни, иако некои сигурно нема секогаш да се согласуваат со напишаното. Како и да е, на темата и е пристапено со сериозност и длабочина, па може да очекуваме дека овој блогер ќе потрае на сцената.

Дополнување: редовно
Брзина: брзо
Функционалност: одлична
Дизајн: блогерски
Навигација: минимална
Пребарувач: нема
Клучни зборови: нема
Јавен бројач: има
РСС/Атом: има
Гугл-ранг: нема
Јазик: македонски
Адреса: smizla.mk

Надмостување на јазот помеѓу РСС полињата и имејл пораките

РСС полињата се карактеристика на вебот од поново време и не многу корисници се служат со нив. Се работи за опција која повеќето веб-сајтови ја имаат, а овозможува константно информирање за содржините кои тие ги нудат во вид на кратки најави. „Фид мај инбокс“ е сајт кој има за цел да им биде од корист на оние луѓе кои не сакаат или пак не знаат да користат РСС и слични полиња, а сакаат да ги користат придобивките од таквите формати за добивање редовни информации. На овие, им се нуди можност да ги добиваат ваквите информации во вид на имејл пораки.

Креаторите на сајтот велат дека само 3% од целата интернет популација ги користи овие формати и дека е штета останатите 97% да бидат исклучени од можноста за користење на технологијата. Во делот за опис на начинот на функционирање може да се види каква е постапката за користење на сервисот, а добро е што во случај на премислување, ќе можете да се откажете од регистрацијата за добивање пораки од РСС од одреден веб-сајт, служејќи со копчето Unsubscribe.

Дополнување: еднократно
Брзина: брзо
Функционалност: одлична
Дизајн: веб 2.0
Навигација: нема
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Политика за приватност: има
Адреса: www.feedmyinbox.com

Пребарувач за временска прогноза

„Симпл ведр“ е наједноставниот пребарувач за временска состојба и прогноза за градовите од светот. Сајтовите кои нудат временска прогноза се многубројни, некои се порелевантни од други, некои нудат посеопфатни податоци, често придружени со графички и анимирани елементи итн. Сепак, обичниот човек најчесто го интересира моменталната и идните температури, како и општата временска состојба, ако ништо друго за да би знаел како треба да се облече наредниот ден. Симп ведр го овозможува токму тоа. Ослободен од секакви додатоци како фотографии, мапи и сл., работи едноставно на принципот на внесување поштенски код или име на град, по што веднаш ги враќа бараните резултати. Покрај за актуелниот ден, понудена е временската состојба за наредните пет дена, прикажана на ултра едноставен начин.

Пребарувачот ја користи базата со информации од веб-сајтот њњњ.цустомњеатхер.цом, така што јасно е од каде потекнуваат резултатите кои тој ги презентира. Една исто така интересна можност која ја нуди сајтот е алатката за изработка на виџет кој би можеле да го поставите на вашиот веб-сајт, лична веб-страница или блог со цел постојано да ја прикажува актуелната временска состојба за вашето место на живеење. Единствен проблем со овој додаток е што при изработката не го препознава градот Скопје, ниту останатите градови од Македонија. Грешката беше во истиот момент пријавена до сопствениците на веб-сајтот, па во очекување сме на нејзино најскоро поправање.

Дополнување: повремено
Брзина: брзо
Функционалност: одлична
Дизајн: веб 2.0
Навигација: минимална
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.simpleweather.com

Изразете се кратко, динамично и оригинално

„Image chef“ е веб-сајт кој овозможува една интересна онлајн активност. Имено, посетителите на овој сајт, односно неговите регистрирани корисници имаат можност да создаваат оригинални слики и кратки анимирани презентации кои можат да се искористат за најразлични цели. Сајтот е од забавен карактер и е од оние сајтови на кои трошите малку време за да им ја сфатите суштината, а многу повеќе време играјќи си со понудените опции.

Идејата е да создадете сопствена анимација или слика, користејќи некои од многуте понудени, некои веќе анимирани шаблони, да ги додадете саканите слики и текст и производот да го зачувате на вашиот компјутер, да го публикувате некаде онлјан или да го испратите некому преку имејл. Последниве две варијанти можат особено да ви се најдат доколку имате практика да им изразувате чувства, да им пренесувате необични пораки или да им честитате на вашите блиски за некоја годишнина, роденден, венчавка или друга пригода.

Дополнување: често
Брзина: брзо
Функционалност: одлична
Дизајн: веб 2.0
Навигација: минимална
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски, турски,
шпански, француски, италијански,
германски, португалски
Политика за приватност: има
Адреса: www.imagechef.com