Најбрз пристап до вашите омилени веб-страници

„Трансфер“ е наменет да функционира како најефикасна почетна страница во интернет прелистувачите на корисниците преку која се овозможува најбрз и наједноставен пристап до омилените, најпосетувани веб-страници. Тој уште на почеток ве снабдува со листа на веб-локации според претходно назначените интереси, која подоцна можете да ја уредувате. Веб-сајтовите се претставени со мали слики-икони, кои се сепак доволно големи за лесно пребарување и препознавање. Иконите можат да бидат преуредувани преку менување на нивниот редослед, боја и наслов. Дополнителна опција е корисникот да избере дали сака веб-страницата да биде отворена во ново прозорче или во веќе отвореното.

Услугата е едноставна за користење откако прво ќе се регистрирате како корисник, што е бесплатно и достапно за секого. За да додадете нова икона треба да притиснете на “Add an icon” и да ги пополните полињата што ја бараат адресата на веб-страницата, насловот на иконата и нејзината боја.

Тоа што го прави овој веб-сајт уште поефикасен и интересен е тоа што тој може да биде посетуван од кој било компјутер или друг уред со пристап до интернет, а не само од вашиот персонален компјутер. „Трансфер“ е начин како да ги организирате вашите обележувачи на едноставен и ефикасен начин со дополнителните опции како сортирање на иконите во одредени групи кои самите ги формирате.

Дополнување: повремено (блог)
Брзина: брзо
Функционалност: одлична
Дизајн: модерен
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 3/10
Политика за приватност: има
Јазик: англиски
Адреса: www.transferr.com

Напишано од: Дона Џамбаска

Македонски сајт за кратење веб-адреси

Јасно е дека долгите адреси се непрактични за користење, пред се, поради две причини: големината на просторот што го зафаќаат и нивната естетска природа. Веб-сајтовите за кратење на долгите адреси особено се популаризираа со сервисите како Твитер, кој овозможувајќи споделување на пораки од максимум 140 карактери, би бил бескорисен за размена на корисни линкови, доколку истите мора да останат во својата оригинална должина.

Инаку, ваквите сајтови само создаваат кратки линкови кои упатуваат до истите веб-локации до кои водат и долгите адреси од кои тие се создадени. Кратењето на линковите не значи оневозможување на пристапот преку оригиналните адреси.

Од неодамна се појави „нула“ - македонски веб-сајт наменет за кратење на долгите линкови, кој има неколку специфики кога би се споредил со други сајтови за оваа намена. Пред се, се работи за македонски сајт чија адреса е многу лесна за помнење и брза за пишување. Понатаму, на корисниците им е овозможено да си изберат наставка којашто сакаат да ја добие нивниот краток линк, доколку истата претходно веќе не ја искористил некој друг. За привремено користење на кратките линкови, постои една фер политика, што овозможува нивно бришење по употребата, со цел истите да бидат достапни за понатамошно користење.

Особено практична примена на системот за кратење на долгите веб-адреси овозможува букмарклетот кој со извлекување во лентата за обележувачи, го овозможува користењето директно, со еден клик, без потреба од вчитување на сајтот во прелистувачот.

Дополнување: нема
Брзина: брзо
Функционалност: добра
Дизајн: едноставен
Навигација: минимална
Пребарувач: нема
Клучни зборови: има
Јавен бројач: има
(број на кликови и број
на скратени линкови)
РСС/Атом: нема
Гугл-ранг: 0/10
Политика за приватност: нема
Јазик: македонски
Адреса: 0.mk

Вашата дигитална визит-карта

Онлајн претставувањето е многу значајно во денешно време, посебно доколку со нашата професионалност и стручност сакаме да допреме до голем број активни интернет корисници кои би сакале да ползуваат од нашите услуги. Претставувањето може да биде изведено на неколку начини, преку официјални веб-сајтови, лични блогови, профили креирани на социјалните мрежи итн. Едно поинакво, деловно онлајн претставување овозможува веб-сајтот card.ly - наменет за едноставно креирање на дигитални визит-карти.

Предуслов за да го користите веб-сајтот е да се регистрирате низ кратка постапка, што ќе ви овозможи да си ја изработите вашата визит-карта. Изработката на визит-картите се изведува во неколку чекори: наведување на корисничките имиња под кои можете и сакате да бидете најдени на социјалните мрежи, пополнување на вашите лични податоци и опис на вашиот профил, избирање на дизајн кој најмногу ќе одговара на вашата дејност или вкус, споделување на информацијата за туку-што креираната визит-карта со вашите твитер следачи и вградување на визит-картата на вашиот веб-сајт, блог или друга веб-локација. Овие податоци и параметри можат подоцна да се менуваат.

Како резултат на вашиот краткотрајно вложен труд ќе добиете професионална дигитална визит-карта која ќе биде поставена на веб-сајтот во формат: http://card.ly/username.

Сајтот нуди можност за користење на платена варијанта која изнесува 25 долари годишно, а тоа, меѓу поважното, ќе ја ослободи вашата-картичка од реклами, ќе ви понуди голем избор на дизајни и ќе ви дозволи да си ја регистрирате визит-картата на домен по ваш избор.

Дополнување: од страна
на корисниците
Брзина: брзо
Функционалност: одлична
Дизајн: модерен
Навигација: минимална
Пребарувач: нема
Клучни зборови: има
Јавен бројач: нема
РСС/Атом: има (за извори
Посочени од корисниците)
Гугл-ранг: 0/10
Политика за приватност: има
Јазик: англиски
Адреса: card.ly

Проверете го текстот кој го напишавте на странски јазик

Без разлика колку добро познаваме одреден странски јазик, никогаш не се чувствуваме доволно сигурни во објавувањето на напишан текст, без претходно да го провериме истиот со некој онлајн речник или пак уште подобро со личност која подобро го познава тој јазик од нас. Доколку се спојат овие две работи, се добива омилениот веб-сајт на многу преведувачи, изучувачи на странски јазици и многу други вклучувајќи ме и мене - „корект мај текст“.

Принципот на кој функционира овој веб-сајт е многу едноставен. Се што треба да направите е да се регистрирате, да го напишете вашиот текст во обележаното поле и да го изберете јазикот на кој е напишан. Вашиот текст ќе биде објавен на веб-сајтот од каде познавачи на истиот јазик ќе може да го преземат и да го проверат. Додатни опции кои ја подобруваат ефикасноста на овој веб-сајт се: избирање на клучни зборови кои го олеснуваат пребарувањето; одредување на нивото на познавање на јазикот кое го барате од личноста која го проверува вашиот текст; назначување на бројот на лицата (од1 до 3) кои сакате да го проверат вашиот текст и добивање на говорна форма од проверениот текст.

Друг начин на кој „корект мај текст“ ви помага во усовршување на вашите познавања на странските јазици е правото вие да проверувате текстови закачени од други корисници. Веб-сајтот е преведен на повеќе јазици од кои можете да го изберете оној кој најмногу ви одговара.

Дополнување: многу често
(од страна на корисниците)
Брзина: брзо
Функционалност: одлична
Дизајн: едноставен
Навигација: минимална
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 4/10
Политика за приватност: нема
Јазик: англиски, руски, шпански,
француски, италијански,
португалски, германски
Адреса: www.correctmytext.com

Напишано од Дона Џамбаска

Френдфид - сервис за споделување

Многуте сервиси за брзо споделување на информации помеѓу избрани корисници на истите ни даваат голем избор, но истовремено ни предизвикуваат проблем бидејќи тешко е да се одлучиме што е најпрактично и најприфатливо за нас, ако не знаеме што нудат останатите сервиси од ист вид. Така, следува заклучокот дека доколку сакаме да ги избереме најкорисните сервиси, треба постојано да следиме што ново се појавува, кои промени и надградби ги доживуваат постоечките сервиси итн. Секако, нема никаква корист ако се зачленуваме на сите сервиси што се појавуваат, доколку немаме време сите да ги користиме. Сервис кој го препорачуваме за користење од многуте такви кои постојат е Френдфид.

Френдфид е онлајн сервис за споделување информации помеѓу пријатели. Тој нуди интерактивен начин на откривање и дискутирање за информациите кои пријателите ги споделуваат.

Она што ќе го добиете по бесплатната регистрација е фид - река од информации - составен од пораките кои со вас ги споделиле вашите пријатели. Тука можат да се најдат фотографии, линкови, видеа и текстуални пораки. Доколку вие се најдете во нечиј круг на пријатели, тоа значи дека тој корисник ќе ги добива содржините кои вие ги споделувате. Можете да се пријавите да следите и новости од одредени групи, како на пример од вашето семејство, колегите или најтесниот круг на пријатели.

За да го користите сервисот нема потреба од инсталација на некаков софтвер. Сè што ви треба е прелистувач во кој ќе го повикате сајтот на кој треба да бидете најавени за да читате и поставувате. Алтернативно, за овој сервис можете да се служите и со вашиот фејсбук профил, вашата имејл корисничка сметка или СМС пораки за да поставувате содржини. Јавните френдфид профили се видливи за сите. Вашиот фид можете да го вградите на вашиот веб-сајт или блог и со тоа да ги збогатите информациите кои таму ги нудите, како и да поставувате информации на други сервиси, како фликр, твитер, фејсбук и уште многу други, директно со нивното поставување на френдфид.

Дополнување: од корисниците
Брзина: брзо
Функционалност: одлична
Дизајн: веб 2.0
Навигација: минимална
Пребарувач: има
Клучни зборови: нема
Јавен бројач: нема
РСС/Атом: има
(на страниците на корисниците)
Гугл-ранг: 8/10
Политика за приватност: има
Јазик: англиски, француски, шпански,
италијански, германски, турски...
Адреса: friendfeed.com

Отворете ја кутијата - споделувајте и обработувајте фајлови фајлови од секаде

Потребата од онлајн складиште за личните документи се повеќе се зголемува. Ако хард дисковите со мал капацитет ги заменивме со такви кои имаат значително поголем, снимените дискови ги користиме помалку заради попрактичните усб базирани мемориски уреди, она што е следно е преселбата на нашите фајлови онлајн. Многумина веќе ова го практикуваат, а ќе го практикуваат и повеќе во иднина, како што ќе стануваме се поактивни онлајн и како што ќе расте нашата зависност од големиот број неопходни документи. Чувањето фајлови онлајн има уште една додадена вредност во однос на другите методи за складирање - можноста за пристапување од било кој компјутер во светот поврзан на интернет. Ако чувствувате дека е време и вие да преселите дел од вашите неопходни фајлови онлајн, тропнете на вратата на Бокс. Вратата ќе се отвори, а ќе ве пречека 1 ГБ онлајн простор само за вас и тоа сосема бесплатно.

Предноста на овој сервис, во однос на останатите кои нудат слободен простор за чување фајлови е во тоа што тој на корисниците им овозможува поставување на документи кои можат да се прегледуваат и обработуваат од одреден број на поканети членови. Според тоа, овој сервис цели кон бизнис корисниците кои често соработуваат од различни точки на Земјата. Затоа, покрај основниот модел за користење на сервисот, постојат и такви кои се плаќаат и имаат помалку ограничувања, односно повеќе можности. Сервисот овозможува и директно креирање на документи онлајн, приватно споделување на поставените фајлови со испраќање на соодветните линкови преку имејл, креирање на онлајн работен простор на кој поканетите можат да поставуваат фајлови, да дискутираат и да допринесуваат во работата, поставување на различни сигурносни опции, пристапување од мобилни уреди и сл. Некои од опциите се сепак ограничени само за претплатените корисници.

Дополнување: од корисниците
Брзина: брзо
Функционалност: одлична
Дизајн: прегледен
Навигација: минимална
Пребарувач: има (за личните фајлови)
Клучни зборови: има
Јавен бројач: нема
РСС/Атом: има (блог)
Гугл-ранг: 7/10
Политика за приватност: има
Јазик: англиски
Адреса: www.box.net

Македонски сајт за храна

Една од најздодевните, но истовремено и најнеопходните работи на кои треба да мислиме секој ден е нашето мени. Што да јадеме, каде да јадеме, дали нешто да зготвиме, колку време ќе ни биде потребно, дали ги имаме сите потребни состојки... Ваквите прашања би можеле да добијат брз и едноставен одговор со помош на еден нов веб-сајт кој нуди многубројни рецепти и совети, а притоа целиот достапен на македонски јазик – hrana.com.mk.

Сајтови од ваков тип постојат на веб, но англискиот јазик може да биде фактор на ограничување за оние кои не го разбираат добро. Сега сите домаќинки, независно од возраста, јазичните и техничките познавања, може да го користи овој ресурс за пополнување и проширување на куќното мени.

Рецептите се поделени според разни критериуми, па посебно можете да барате детски јадења, јадења кои содржат месо, празнични оброци, тестенини, национална кујна итн. Покрај пребарување според категорија, клучни зборови и со класично прелистување по содржините, можете да барате и рецепти за кои е потребно одредено време за подготовка. Оваа опција е многу корисна со оглед на тоа што понекогаш немаме премногу време на располагање за подготовка на ручекот, па некоја брза варијанта со која ќе ги пречекаме домашните би била добредојдена. Секој рецепт вклучува име, слика, потребни состојки и кус преглед на начинот на подготовка.

Советите ќе ви одгатнат зошто се тријат краставиците на краевите, како да си подготвите домашен јаболков оцет, колку време смеете да го чувате месото во фрижидерот за замрзнување итн. Доколку имате проблеми со килограмите или одреден дел од телото кој се соочува со недостатоци, прочитајте кои вежби ќе ви помогнат во остварување на вашата посакувана цел.

Веб-сајтот е добар, тематски насочен, доволно богат со содржини и сериозен во намената. Според тоа, е еден од единствените од ваков тип.

Дополнување: често
Брзина: брзо
Функционалност: добра
Дизајн: едноставен
Навигација: средна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 2/10
Политика за приватност: нема
Јазик: македонски
Адреса: www.hrana.com.mk

Направете си сопствена социјална мрежа

Социјалните мрежи се ултра популарни. Ги има многу, слични и различни, корисни, но и заразни. Некои корисници се склони кон едни, некои кон други, но во секој случај многумина одлучуваат да им се приклучуваат. И покрај многуте можности кои ги нудат, корисниците изгледа почесто сакаат да ги користат за забава, дружење и занимација, а поретко за професионални цели, за остварување на некакви планови, амбиции или за споделување дела, информации и сл.

Доколку вие мислите дека ви е потребно нешто различно од она што го нудат моментално актуелните социјални мрежи, без разлика на вашата крајна цел, ви препорачуваме да ги истражите можностите кои ги нуди сервисот „Нинг“. Тој всушност претставува платформа на која корисниците можат да креираат свои социјални мрежи низ брза, едноставна и бесплатна постапка. Притоа, мрежите можат да функционираат како јавни или приватни, а нивните создавачи можат да изберат да користат некоја од понудените дизајн теми или пак да поставуваат свои, да ги прилагодуваат елементите на почетната страница итн. Секако, нинг ги поддржува и стандардните начини за споделување мултимедијални содржини, односно поставување слики, вградување видеа, презентации и сл., потоа, креирање настани, покана на нови членови, комуникација преку интегрирана чет програма, приклучување во групи и др.

Креираните мрежи добиваат уникатни веб-адреси кои го содржат името што вие ќе го изберете, проследено со наставката ning.com.

Ако се прашувате зошто би го користеле овој начин за поврзување со вашите колеги, пријатели или роднини, а не некоја од постоечките социјални мрежи, одговорот побарајте го во поголемите можности за прилагодување според вашата замисла за социјална мрежа.

Дополнување: често (блог)
Брзина: брзо
Функционалност: одлична
Дизајн: едноставен и прегледен
Навигација: минимална
Пребарувач: има
Клучни зборови: нема
Јавен бројач: нема
РСС/Атом: има (блог)
Гугл-ранг: 8/10
Политика за приватност: има
Јазик: англиски
Адреса: www.ning.com

Изразете се во аудио формат

Иако ретко практикуваме, сепак пренесувањето на информации, пораки или било какви содржини во аудио формат, понекогаш може да е многу корисен и брз начин за постигнување на саканиот ефект. Мултимедијалноста не ги подразбира само сликите и видеата. И аудио записите придонесуваат за мултимедијално обогатување на веб-сајтовите кои претежно ги презентираат содржините преку текст.

Доколку во вашата работа понекогаш сте сведоци на настани, правите интервјуа, барате изјави од луѓе со кои соработувате или пак едноставно имате што да кажете само со помош на глас и евентуално негово комбинирање со музичка подлога, тогаш можеби треба да размислите за вклучување на аудио содржини на вашиот веб-сајт или блог.

Постапката за користење на вакви можности е иста како кога се работи за видео материјали. Но за аудио записите, наместо на „јутјуб“, треба да појдете на „јуарлисн“ – тоа е сервис кој овозможува бесплатно поставување на аудио фајлови, нивно споделување со другите корисници на сервисот, вградување на записите на други веб-локации и секако користење на сите јавни материјали од страна на посетителите. Корисниците на сервисот можат да ги оценуваат објавените содржини, што овозможува поголема популарност на оние кои се повисоко рангирани.

Содржините на овој сајт се класифицираат според нивната намена, па така посебно се издвоени и можат да се пребаруваат интервјуа, звучни ефекти, аудиоблог содржини, поткасти, книги итн. Понатаму, категориите се делат според други критериуми, како жанр, област и сл.

Дополнување: од страна на корисниците
Брзина: брзо
Функционалност: одлична
Дизајн: чист
Навигација: минимална
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 3/10
Политика за приватност: има
Јазик: англиски
Адреса: yourlisten.com

Ваша мултимедијална библиотека онлајн

На интернет постојат многу сервиси кои можете да ги користите за наоѓање и споделување на разни видови мултимедијални производи. Повеќето такви ви дозволуваат своите содржини да ги направите достапни за другите или да ги чувате во сопствена онлајн библиотека. Како и да е, дури и најпопуларните сервиси како што се „јутјуб“ или „слајдшеар“ имаат ограничувања кои понекогаш можат да создадат потреба за нешто повеќе и подобро. Ако ви се случило да имате видео кое никако не можете да го стокмите да зафаќа помалку од 100МБ, или такво за кое е многу важно да не изгуби од својот квалитет, или пак едноставно барате една онлајн локација на која сите ваши мултимедијални содржини ќе бидат собрани, регистрирајте се на „скринкаст“.

Скринкаст е сервис кој во суштина е од комерцијална природа, бидејќи за можностите и просторот кој го нуди им наплаќа на професионалните корисниците по без малку 100 долари годишно за простор од 250ГБ. За среќа на сите останати, кои своето членство на сајтот можат да го стекнат преку едноставна регистрација, им овозможува поставување на видеа, слики, презентации и други типови на фајлови, за што на располагање им остава по 2ГБ. Иако сервисот поддржува разни видови на фајлови, сепак најмногу е наменет за чување и споделување на видеа и слики, за кои постои и можност за вградување на други веб-сајтови.

Она што е специфично за овој сервис е дека нуди можност за одредување на нивото на приватност на секој поединечен фајл или пак на група фајлови. Исто така, за користење на сервисот за качување на мултимедијалните дела, можете да се служите и со десктоп апликации кои се достапни за винодус и мекинтош оперативните системи, како всушност и се овозможува поставувањето на фајлови поголеми од 100МБ. На овој начин не сте ограничени во однос на големината на фајловите што сакате да ги чувате и споделувате оналјн, што пак директно влијае на нивниот квалитет.

И конечно, уште една позитивна работа за овој веб-сајт и воедно сервис е тоа што е многу едноставен за користење, за што пак особено помагаат видео туторијалите кои покрај објаснување на начинот на функционирање и користење, вклучуваат и дополнителни едукативни елементи.

Дополнување: од страна на корисниците
Брзина: брзо
Функционалност: одлична
Дизајн: модерен
Навигација: минимална
Пребарувач: нема
Клучни зборови: нема
Јавен бројач: нема
РСС/Атом: има (персонализирано)
Гугл-ранг: 6/10
Политика за приватност: има
Јазик: англиски
Адреса: www.screencast.com