30 јули 2005

Секој ден

Информаторот „Секој ден“ започна со работа пролетоска и со текот на времето сè повеќе се етаблира како еден од поинтересните македонски сајтови за вести, оти се има покажано достоен на името што го носи.

Од основањето, овој сајт применува позитивна политика на размена на банери, што поради добриот избор на партнери многу брзо доведе до растење на неговиот ранг на Гугл. Поволно делува и тоа што сајтов го индексира „Најди!“.

Секако, освен горенаведените фактори, за успехот е заслужна и уредувачката политика на тимот, во којшто работат искусни професионалци. Инсистирањето на држење на ниво на содржините, па така, наместо галериите со мека порнографија кои ги пренатрупуваат многу македонски сајтови, „Секој ден“ нуди галерии врз база на врвни стрипови и илустрации. Пофална е и транспарентноста која се огледа во импресумот и можноста да се види кој напис колку пати е прочитан, а и да се листаат написите според популарност.

Дизајнот е солиден, со тоа што анимациичето горе лево и банерите во Флеш, иако изгледаат убаво, препорачливо е да се изведат со други техники, а тикерот е сосем излишен, оти линкови до најновите написи веќе стојат од страна, а и го одвлекува вниманието од тековната содржина. Сепак, најголем недостаток е тоа што во кодот не се вградува опис и клучни зборови, и на општо ниво и на ниво на напис/страница.

Особено важен дел на сајтов е англиската верзија, која иако се освежува поретко од македонската, има голем потенцијал, особено ако се поправат печатните грешки во интерфејсот (Archiv, Readed). Структурата на адресите изгледа погодна за индексирање на Гугл њуз светски информативен сервис на кој од 4500 извори на вести само три се од Македонија (МИА, Риалити Маседониа и Метаморфозис).

Дополнување: секојдневно
Брзина: брзо
Функционалност: добра
Код: АСП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: македонски и англиски
Адреса: www.sekojden.com.mk
Датум на пишување: 30.07.2005.

Нема коментари: