31 декември 2005

Добра рамнотежа со „Баланс“

[лекториран]

Веб-сајтот на продукциската куќа „Баланс“ од Скопје користи инвентивен интерфејс, одлично анимиран во „Флеш“. Истовремено, тој може да послужи и како пример за ограничувањата што ги поставува исклучивата употреба на „Флеш“, како и фокусирање на перспективата на нарачателот, а наспроти онаа на публиката.

Почетниот екран е претставен во вид на раце што вртат грамофонска плоча, што е многу соодветно за компанија што промовира диџеи. Арно ама, вртењето на плочата, преку кое се одбира определена секција на веб-сајтот, можеби е разбирливо за диџеи, но не е интуитивно, па посетителите може да имаат проблем при тоа кој прст треба да се кликне за да се постигне саканиот ефект. Транзициите од екран во екран се прекрасно направени. Кога ќе се стигне до дадена секција, посетителот треба премногу да клика за да види кои други секции му се на располагање - нема дадено мени со сите избори, туку се редат една по една, а на крај мора да кликне уште еднаш да ја избере секцијата.

Исклучивата употреба на „Флеш“ оневозможува соодветен пристап од машините за пребарување и длабинско линкување. Ова може да се поправи доколку покрај верзијата во „Флеш“, се направи верзија на веб-сајтот со истите информации, но базирана на текст, односно ХТМЛ без многу графички елементи и без рамки. Секако, голем минус е што барем половина од секциите, меѓу кои и мултимедија, прес, линкови, црно/бело, интервјуа – се „во изработка“.


ЗА ВЕБ-САЈТОТ

Дополнување: неопределиво
Брзина: средна
Функционалност: средна
Код: Флеш
Дизајн: флешерски
Навигација: променлива
Пребарувач: нема
Клучни зборови: нема
Јавен бројач: има
РСС/Атом: нема
Гугл-ранг: 0/10
Јазик: македонски
Адреса: www.balance.com.mk

30 декември 2005

Гонзо-фотоновинарство

[лекториран]

„Гонзо“ пристапот кон фотоновинарството промовира „прогресија преку строга точност и автентичност без потчинување на ограничувањата на стандардните правила за репортажи“. Се одразува преку анотација во гонзо-стил, без многу „јадење бурек“, туку со презентирање на фактите. Анотацијата се темели на одговарање на пет прашања: кој, што, каде, кога, зошто (who, what, where, when, why).

Веб-сајтот има цел да го промовира овој стил преку примери и објавување на манифест со кој се објаснети принципите на движењето, кои се темелат на земање предвид на промените што ги носат дигитализацијата и користењето Интернет наспроти печатените медиуми. Со тотално прилепување од десно, изработката на манифестот намерно ги крши сите правила на употребливост, но со примена на визуелна логика, која му овозможува сепак да биде читлив и ефективен при пренесување на атмосферата на новото.

Терминот гонзо во слична смисла (идиосинкратички субјективно со акцент на непосредно вклучување во акцијата) се користи и во други области на современото човеково творештво, како индустријата за филмови за возрасни, особено оние што се снимаат во Италија и во САД со уметници по потекло од Унгарија.

Употребата на Флеш за приказ на видео на овој веб-сајт овозможува поголема контрола врз изгледот на екранот, но на некои разгледувачи може да доведе до технички проблеми, кои се одразуваат преку „сечкање“ на звукот. Дури и кога би работело перфектно, не би било лошо да се остави можност за симнување на клипот, со назначување на форматот и на големината.


ЗА ВЕБ-САЈТОТ

Дополнување: еднократно
Брзина: средна
Функционалност: добра
Код: Флеш/ХТМЛ
Дизајн: комбиниран
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 0/10
Јазик: англиски
Адреса: http://www.gonzopj.net

29 декември 2005

589

Во денешниот број на „Време“ не се појавува рубриката „Веб-сајт на денот“.

28 декември 2005

Џебна капела

[лекториран]

„Џебна капела“ е бесплатен софтвер што овозможува поставување црковен олтар на десктопот на персонален компјутер. Достапна е во верзии за оперативните системи „Мајкрософт Виндоуз“ или „МекОС“ на „Епл“.

Верникот (христијанин) може да го уреди олтарот по свој вкус, со избирање и со разместување разновидни елементи што му се на располагање. Меѓу нив има статуи (Исус, Богородица, Господ), икони, слики, крстови, мебел, цвеќиња, свеќи и слично.

Авторот Дарио Гибелини (од Германија) смета дека за луѓето што поминуваат повеќе од осум часа на компјутер, компјутерите стануваат нивен живот. Со неговата апликација се овозможува воведување на духовното во таквиот живот, овозможувајќи им на верниците „простор“ за молитва.

Најинтересно за џебната капела е тоа што може да се стави на УСБ-стик и буквално да се носи во џеб, па да се активира на кој било помодерен компјутер до кој верникот има пристап во моментот. Се препорачува и ставање на симболот на крстот на УСБ-стикот, преку лепење или гравирање.

Веб-сајтот е дизајниран едноставно и информативно. На него, освен основните податоци за програмата, може да се најдат и галерија со олтари и УСБ-стикови дизајнирани од обичните корисници.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.pocketchapel.com

27 декември 2005

Излажан ум - оптички илузии

[лекториран]

Веб-сајтот „Мајнд фејк“ (анг. „мајнд“ = ум, „фејк“ = лажно) им е посветен на оптичките илузии, за да ја забави и зачуди публиката. За секоја од нив посетителите можат да даваат оцени и коментари, што не само што ја зголемува интерактивностатуку и овозможува изострена перцепција.

Под оптичка илузија се подразбира „илузија што го мами човечкиот визуелен систем да перцепира нешто што не е присутно, или некоректно да го перцепира она што е присутно“.Тие се појавуваат и во природата, како фатаморганата, но многу од нив настанале како резултат на рационални истражувања во уметноста, математиката и во психологијата.

Илузиите може да бидат физиолошки, кои зависат од замор или од други влијанија на очите, или когнитивни, кои зависат од процесирањето на информациите во мозокот. Кај овој вид мешањето на своевидните „предрасуди“ вградени во начинот на кој перцепираме доведува до збунувања, или до амбивалентни резултати.

Поучни се и илузиите со дисторзија, кога поради одредени фактори е тешко од око да се процени должина или друга димензија.

Конкретните примери за оптички илузии се користат и како едукативно средство, но имаат и многу поширока примена. На пример, докажувањето на несовршеноста на човечката перцепција и сеќавање има огромно влијание на судскиот систем во развиените држави, каде што кредибилитетот на исказот на сведок-очевидец мора да биде поткрепен и со други докази за да се земе здраво за готово.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ХТМЛ/ЦГИ
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: http://www.mindfake.com

26 декември 2005

Вегетаријанска порнографија

[лекториран]


„Без разлика дали тоа ни се допаѓа или не, порнографијата има големо влијание врз општеството“, вели основачот на „Вегетаријанска порнографија“. Според него, порното, меѓу другите, има клучна улога врз развојот на индустриите поврзани со видеокасети, цедиња и со Интернет. Концептот на веб-сајтот настанал врз основа на полушеговитата идеја дека штом порното можело да придонесе толку многу за толку многу други нешта, зошто да не може да го помогне и вегетаријанството.

Во случајов не се работи за „традиционалната“, туку за користење една од дефинициите на порнографијата што ги нуди речникот „Мериам-Вебстер“, дека се работи за „претставување дејства на сензационален начин за да се предизвика брза и интензивна емоционална реакција (на пример, како 'порнографија на насилството')“.

За обновување на содржините и изградба на заедница на членови што ќе се врткаат и контрибуираат текстови и мислења, веб-сајтов користи комбинација на форум од кој некои од поинтересните постови се вадат во „главниот“ дел, со што се добива ефект приближен на блоговски. Стилот на пишување е хумористично-ироничен поглед на сериозни теми, во согласност со другите елементи што го сочинуваат севкупниот имиџ.

Вегетаријанското малцинство во сештојадните средини се соочува со низа проблеми, не само во РМ - каде што специјализираните ресторани се меѓу најскапите туку и во светот. „Вегетаријанска порнографија“ нуди предлог-решенија за некои од нив. Меѓу нив се и со кои алкохоли да се налеваш а да не ги нарушиш принципите на својот стил на живот, како и проблемот на недостиг од сексуално-емоционални партнери што се вегетаријанци. За таа намена служи директориумот на членови, но и предлагањето разни методи за тоа како со помош на заводливи најави да се конвертираат месојадци, односно да се поттикнат да и се придружат на заедницата.



ЗА ВЕБ-САЈТОТ

Дополнување: често
Брзина: брзо
Функционалност: добра
Код: ХТМЛ/Перл
Дизајн: текстуален
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.veganporn.com

24 декември 2005

Структурирано блогирање

[лекториран]

Структурираното блогирање е иницијатива чија цел е пренос информации на Интернет во форма што е поупотреблива и пополезна. Се работи за надградба на секојдневното блогирање, која се постигнува со додавање функционалности (плагини), кои нудат публикување и во формати што се читливи од страна на машини.

Од кориснички аспект, разликата помеѓу обичното и структурираното блогирање е во тоа што може да се додаваат стилови и тагови кои овозможуваат препознавање на контекстот и содржините од страна на машини за пребарување и други апликации. Тие информации невидливо се вметнуваат во текстот на блоговите и овозможуваат пристап до фидови за синдикација, читачи за икс-ем-ел или агрегатори на блогови.

На веб-сајтот се достапни додавки за популарните блогерски платформи „Мувабл тајп“ и „Ворд прес“, а има и блог и вики-алатка, кои служат за информирање и колаборација.

Иако структурираното блогирање „има потенцијал да биде исклучително полезно“, првата пречка со која се соочува е и најголемата: мрзата на блогерите. Блоговите станаа популарни токму поради тоа што овозможуваат на луѓе без многу техничко знаење на едноставен начин да ги публикуваат своите писанија, така што кај таа популација се јавува отпор кон потребата за дополнително технолошко усовршување. Веројатно клучен фактор во развојот на концептот ќе има (не)вклучувањето на Блогер.ком, доминантниот играч на блогерскиот пазар, кој со години одбива да го закомплицира својот интерфејс, макар со додавање категории.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: има
Гугл-ранг: 6/10
Јазик: англиски
Адреса: structuredblogging.org

23 декември 2005

Ликвидна (течна) генерација

[лекториран]

Веб-сајтот „Ликвидна (течна) генерација“ нуди низа забавни содржини во анимирана форма од нејзина продукција, повеќето насочени кон пародирање „сериозни“ медиумски форми, при што се истакнуваат неделните вести, во кои особено се обработуваат членовите на забавната индустрија.

Дизајнот на веб-сајтот е преоптоварен со графички елементи, а некои од линковите се отвораат во нови прозорци, но тоа не би требало да им пречи на љубителите на вакви веб-сајтови што со задоволство може да ги разгледуваат колекциите на смешни фотографии, филмчиња, музика (имаат и интернет-радио), игрички и слично - под услов да користат широкопојасна врска со Интернет.

Во рамките на веб-сајтот функционираат неколку блога (за сајтот, за музика и слично), а до него дојдовме по препорака на истакнатиот македонски блогер Офчарот (њњњ.вуна.тк).

Нискиот ранг на „Гугл“ се должи на тоа што од главната адреса до која водат повеќе од 1.000 линка се врши пренасочување до друга страница, до која водат само околу 200.

Моментален хит на веб-сајтот е пригодната е-картичка за честитање Нова година, преку која се пренесува двојно предупредување против опивање и, следствено, несакано затруднување во новогодишната ноќ.


ЗА ВЕБ-САЈТОТ

Дополнување: секојдневно
Брзина: средна
Функционалност: одлична
Код: АСП, Флеш
Дизајн: комбиниран
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 0/10
Јазик: англиски
Адреса: www.liquidgeneration.com

21 декември 2005

Нушин Наџафи - фотографка од Иран

[лекториран]

Веб-сајтот на Нушин Наџафи презентира општествени документарни фотографии од Иран на најразлични теми, а често поврзани со животот на жените во ова исламистичко општество.

Сите фотографии презентирани на овој веб-сајт имаат макар кратко објаснение за тоа што се случува во нив, што влијае позитивно на вкупниот впечаток, а особено на образовно-информативната компонента за осознавање на животот на Иранците.

Содржините се поделени на фотостории и фотоблог. Фотосториите се обично за даден настан (прво одење на жени на фудбалски меч по 1979 г., како се одвива обуката на полицајки, посета на клиника за домашни галеничиња) или имаат некој заеднички мотив (кукли од излози). Фотоблогот претставува галерија на разновидни поединечни фотографии снимени низ Иран, на кои се прикажани сцени од животот или пејзажи.

Иако дизајнот на веб-сајтов не е ништо посебно, хуманизирачкиот ефект на користењето на Интернет за запознавање со луѓето низ светот го прави вреден за посета. Дури и некои ситни печатни грешки („привју“, наместо „привиос“ во фотоблогот) укажуваат дека целиот е аматерско дело на самата авторка, што дава чувство на интимност при посетата. Примената на едноставни, незабележителни елементи овозможува фотографиите да дојдат до израз, а тие се сепак дел од богатата иранска традиција на визуелно изразување, чии светски познати елементи се персиските килими, средновековните исламски украсени ракописи, како и современата индустрија на авторски филмови.


ЗА ВЕБ-САЈТОТ

Дополнување: неопределиво
Брзина: брзо
Функционалност: добра
Код: ХТМЛ
Дизајн: текстуален
Навигација: минимална
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.noushin-photo.com

20 декември 2005

Едноставно - убави, голи жени

[лекториран]

Концептот на „едноставни актови“ (simple nudes) е еден од трите фотографски жанра раширени на Интернет, кај кои голото човечко тело е во фокусот. Првиот е еротската фотографија, чија цел е да предизвика сексуална возбуда, а вториот е уметничката фотографија, чија цел е да предизвика естетско задоволство или други возвишени чувства. Арно ама уметничките фотографии се најчесто индиректни, при што ставата или лицето на моделот се скриени, а кај порнографските слики убавината е девалвирана со „напнати, неприродни пози, кои прават моделот да личи на парче месо наместо на грациозно суштество“.

Од друга страна, основната цел на „едноставните актови“ е презентирање на убавината на моделот, при што еротскиот и уметничкиот аспект може да бидат присутни, но се секундарни.

Веб-сајтот игра улога на портал, а покрај дефиницијата на стилот и неколку галерии за пример, негова главна содржина е базата со линкови до повеќе од стотина веб-сајта што прикажуваат ваков тип фотографии. Голем дел од нив се однесуваат на по еден фотограф, најчесто од Европа, кој ги презентира своите дела. При приказот на линковите се врши и нивно рангирање според популарноста.

Веб-сајтовите од Македонија што ги исполнуваат следните критериуми може да влезат во листата и да добијат зголемена посетеност. Тие треба да бидат направени со вкус, да содржат поголем број фотографии од убави полнолетни модели, но фотографиите да не бидат експлицитни, да не содржат линкови до хардкор-порнографски сајтови, да изгледаат професионално, без премногу реклами и со регулирани авторски права.


ЗА ВЕБ-САЈТОТ

Дополнување: неопределиво
Брзина: брзо
Функционалност:многу добра
Код: ХТМЛ, ЦГИ
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: има нема
Гугл-ранг: 5/10
Јазик: англиски
Адреса: www.simplenudes.com

19 декември 2005

Свети Никола - откривање на вистината за Дедо Мраз

[лекториран]

Целта на овој веб-сајт е да ја шири приказната за „вистинскиот Дедо Мраз“, односно за свети Никола, христијански владика од четвртиот век од нашата ера, кој живеел во Мала Азија и е познат како несебичен доброчинител и заштитник на децата.

Според легендата, свети Никола го споделувал своето наследено богатство со сиромашните без да се фали за тоа додека бил жив, а по смртта станал чудотворец што спасувал од разни опасности, како ропство и природни непогоди. Историски е докажано дека тој учествувал и на Советот во Никеја (325 г.), кога е утврдена основната доктрина на христијанството, која до ден-денешен ја спроведуваат и православието и католицизмот.

Моштите на свети Никола во 1087 година од Мира (денешниот град Демре во Турција) биле пренесени во италијанскиот Бари, по што се забележува пораст на неговата популарност низ Западна Европа.

Во почетокот на 19 век во САД се појавуваат приказни настанати врз основа на неговиот лик, но со губење на христијанските елементи. Ова кулминира во 1931 година, кога со рекламна кампања на „Кока-кола“ ликот на „современиот,“ иронично целосно искомерцијализиран, корпорациски Дедо Мраз е втиснат длабоко во ткивото на современата култура.

Веб-сајтот е одлично изработен, а содржински е поделен на два дела: за општата публика и за деца. Тие се разликуваат по дизајнот - кај децата е поразигран, со илустрации приспособени за возраста, како и според стилот на текстовите - кај децата приказните и легендите се дадени во оригинална форма. Во обата дела има интерактивни содржини изработени во „Флеш“, од хронологии на настани до едноставни игри.


За веб-сајтот

Дополнување: неопределиво
Брзина: брзо
Функционалност: одлична
Код: ПХП, Флеш
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: има
Гугл-ранг: 5/10
Јазик: англиски
Адреса: www.stnicholascenter.org

18 декември 2005

Критериуми за избор на „веб-сајт на денот“ (1)

Иако во основа, било кој веб-сајт може да заслужи место во рубриката „веб-сајт на денот,“ сепак постојат определени критериуми кои влијаат на изборот. Во листата се наведени дел од нив.

Достапност
Предност имаат веб-сајтовите што работат. Веб-сајт што не работи нема зошто да биде прикажан. Функционирањето на веб-сајтот се проверува најмалку три пати:
  • при откривањето,
  • при пишувањето на рецензијата и на
  • самиот ден на вметнување на написот во весникот. На третиот пат се зема и слика од екранот.
Доколку еден веб-сајт често паѓа или е повремено недостапен од некоја друга причина, потешко влегува во изборот - освен ако особено не се истакнува по некоја друга особина.

Интересност
Оваа особина е тешко да се дефинира, а се однесува на она што веб-сајтот го издвојува од мноштвото други достапни веб-сајтови слични на него, кои во одредени случаи ги има буквално милиони. Целта на рубриката е на читателите да им презентира нешто што го заслужува нивното внимание. Тоа може да биде поради:
  • содржините - на сајтот има полезни или занимливи работи за читање, гледање, интеракција, особено ако покрај квалитетот се нуди и квантитет,
  • особини на техничкиот дизајн - кои може да послужат како пример за добри или лоши практики,
  • актуелност поради други околности - на пр. веб-сајтот се однесува на личност или настан од интерес за јавноста.
Комплетност
Недовршени, недоносени, запуштени или напуштени веб-сајтови имаат помалку шанси да бидат рецензирани од комплетни, односно комплетирани презентации, па макар овие вториве да се минималистички дела чив концепт налага да немаат големо количество содржини.

Типичен негативен пример се сугестиите „тукушто отворивме веб-сајт, дојдете да го видите.“ Ако при посетата се утврди дека е поставена само насловна страница и две-три други, а најголем дел од линковите се „во изградба“ и без функционалност, а веб-сајтот не се истакнува по другите критериуми... тогаш таквата сугестија се остава во сандачето за е-пошта и се проверува во моменти на екстремен недостаток на инспирација кај тимот. Пораките од тоа сандаче понекогаш ги снемува од технички причини.

(продолжува...)

Нема веќе borat.kz

„Време“ од 17.12.2005 ја објави веста дека Казахстанците го укинаа официјалниот сајт на комичарот
Авторитетите [Властите] од Казахстан вознемирени од британскиот комичар Саша Барон Коен, кој го портретира сексистичкиот и расистички казахстански телевизиски репортер Борат го укинале неговиот сајт. Коен, кој на borat.kz се потсмеваше со поранешната советска република, го испровоцира казахстанското министерство за надворешни работи да ја презема оваа мерка.

- Го направивме тоа за да не може да се служи со погрдни зборови на обласното име [ова е изгледа буквален превод на име на домен (domain name)] на Интернет - .KZ. Не може да прави што сака на туѓи адреси - кажал претставникот на казахстанското министерство за надворешни работи.

Борат е инаку еден од неверојатните карактери измислени од Коен покрај Али Џи, лик со кој Саша Барон Коен ја исмеваше британската улична ганстерска култура. Уште еден од групата на овие ликови е и Бруно, австралиски моден презентер - педер..
Веб-сајтот на Борат беше претставен како веб-сајт на денот на 08.11.2005 г. Во моментов на таа адреса нема ништо - а баш можеле да ја искористат барем за редирекција до некој друг веб-сајт со про-казахстанска пропаганда.

17 декември 2005

Новинарот Ендрју Саливан

[лекториран]

Ендрју Саливан е уредник и новинар по потекло од Англија, а неговиот блог е еден од највлијателните во САД - во просек има по околу 50.000 посети на ден. Темите со кои се занимава се покажуваат интересни за јавноста во неговото општество: хомосексуалност, верба, политика, култура, луѓе и Војната. Во дебатите за смислата и улогата на САД на глобалната сцена, Саливан е застапник на провоените ставови и често е центар на разни контроверзии.

Веб-сајтот, освен блогот, содржи и оддели за написите на Саливан објавени во печатот, како и интервјуа што ги прави преку е-пошта или инстант-месинџер. Во делот „клуб на книгата“ тој дава препораки за читање книги, кои може на лице место да се нарачаат од Амазон, а ги објавува и писмата од читателите, без наведување на нивните лични податоци.

Креаторите на содржини на веб со години водат „тивка дебата“ на тема линкови за отворање нови прозори. Некои од нив своите ставови ги преточуваат во зборови, како Јакоб Нилсен, додека повеќето учествуваат преку примена на една од алтернативите. Саливан, на пр. отвора нови прозорци за линковите кон надвор, особено кога при коментирањето ја линкува оригиналната вест или напис. Оваа алтернатива овозможува останување на неговата содржина во почетниот прозорец, со трошење дополнителни ресурси на корисникот. Неговите политички противници од Ентајвор пак, таквите линкови ги отвораат во истиот прозорец. Наспроти опасноста читателот да остане на сајтот каде што го упатиле, останува и можноста за враќање – преку копчето за назад (Back). Ефективноста на ова копче често се потценува, но не и од најголемите интернет-компании, како „Гугл“ и „Јаху“, кои го користат истиот принцип, веројатно со добра емпириска подлога за таквата одлука.



ЗА ВЕБ-САЈТОТ

Дополнување: често
Брзина: брзо
Функционалност: добра
Код: ПХП
Дизајн: комбиниран
Навигација: стандардна
Пребарувач: нема
Клучни зборови: има
Јавен бројач: има два
РСС/Атом: има
Гугл-ранг: 7/10
Јазик: англиски
Адреса: www.andrewsullivan.com

16 декември 2005

Блогот на Лебовски од хрватски „Космополитен“

[лекториран]

Блогот на Лебовски го препорачува Букаро, кој за него вели дека е еден од најдобрите и најпосетуваните блогови во Хрватска, како и успешен пример од нашето блиско соседство за тоа како од блогер се станува укоричен писател. Освен издавањето збирка раскази, од кои поголем дел веќе се објавени на блогот, Лебовски има и редовни машки шовинистички колумни [од машки агол] во хрватската варијанта на женскиот месечник „Космополитен.“

Блогот изобилува со интересни написи од животот и од делото на авторот, а особен шмек му дава тоа што по секој од нив се прикажани и многубројните коментари од читателите.

Политиката во врска со нив се сведува на следната најава: „Публиката може да ги одбере своите писатели, но писателите не може да ја одберат својата публика. Со други зборови, понекогаш вашите коментари ќе ги снемува, но не поради проблеми во работата на серверот.“

Од аспект на употребливост, маана е што линковите до колумните на Елвис Џ. Куртовиќ се отвораат во нов прозорец. Минималистичкиот дизајн не остава можност за дополнителни согрешенија.

Календарот што покажува во кој ден од месецот има или нема нови писанија и можноста читателот да го контролира прикажувањето на коментарите директно на страниците со текст се добри дополнителни функционалности.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ (блог.хр)
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: затворен
РСС/Атом: има
Гугл-ранг: 4/10
Јазик: хрватски
Адреса: http://lebov.blog.hr/

15 декември 2005

Блогот „Комуникации“

[лекториран]

„Комуникации“ е блог за Интернет, ТВ, радио, масовни медиуми, реклами, емисии и за многу други работи. Настанат како резултат на интересирањата на група постдипломци по комуникологија, работата на него доведе до истакнување на Дарко Булдиоски [без „в“], еден од најактивните популаризатори на блогерството, и во академската и во јавната сфера.

Содржините на блогот се интересни, а меѓу нив често има реакции на вести, кои се состојат од линк до оригиналот, краток релевантен извадок и коментар. Овој стил на блогирање е всушност главен тек (мејнстрим) во граѓанското новинарство во САД. Повеќето други македонски блогери се свртени кон посубјективен, интроспективен стил, па во општ случај ретко поставуваат директни линкови до постови на други блогови или написи на други сајтови, преферирајќи мислењата да ги изразат директно во коментари. Арно ама, стилот на „комуникации“ овозможува издигање на рејтингот на поврзаните страници, со што дополнително придонесува за развој на вебот кај нас.

Дизајнот е концизен и конзистентен, со интегрирани графички и навигациски елементи. Исклучок е што на внатрешните страници нема линк до насловната. Правилата на употребливост главно се следат, што овозможува добро корисничко искуство. Општиот добар впечаток го дополнува тоа што е јасно ставено на знаење дека содржините се лиценцирани под „Криејтив комонс“, така што оние што би сакале да преземат нешто од блогот точно знаат што смеат, а што не смеат да прават.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ (блогер)
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: затворен
РСС/Атом: има
Гугл-ранг: 4/10
Јазик: македонски и англиски
Адреса: komunikacii.blogspot.com/

[Новата адреса на блогот Комуникации е http://komunikacii.net]

14 декември 2005

Че Гевара е жив

[лекториран]

„Сите што носат маичка со Че (треба) да се запрашаат малку за ликот,“ вели познатиот македонски блогер Офчарот, препорачувајќи го веб-сајтот „Че е жив“. Се работи за левоориентиран проект посветен на споменот на комунистичкиот револуционер Ернесто Че Гевара.

Содржините опфаќаат текстови и говори на Че, како и негови биографии и написи од други автори. Застапени се и мултимедијални содржини, како фотографии, звучни и видеозаписи, меѓу кои и популарната песна „Хаста сиемпре команданте Че Гевара“ од Карлос Пуебла. Поставено е и интернет-радио, кое емитува револуционерни содржини, спроведено преку „Шауткаст“. Не се за занемарување и линковите до важни написи на самиот веб-сајт, или до содржини на сродни веб-сајтови, кои често се на разни други јазици, од шпански и турски, преку германски, полски и шведски, до француски и корејски.

Веб-сајтов го користи „ПХП-нјук“ како систем за раководење со содржини. Тој во голема мерка ги задоволува стандардите за употребливост, но сепак крајната примена зависи од директните администратори. Така на пример, тие имаат одбрано некои линка да се отвораат во нов прозорец, што не претставува добра практика.

Освен преку веб, новите содржини на веб-сајтов се достапни и во форма на е-билтен, кој се дистрибуира преку е-пошта или РСС. Тој заработува (можеби) преку донации и преку продавање производи со ликот на Че. Обете операции се вршат преку системи за електронска трговија.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 5/10
Јазик: англиски
Адреса: www.che-lives.com

13 декември 2005

Омилена икона (фејвајкон)

[лекториран]

„Фејвајкон“ (favicon) или во буквален превод „омилена икона“ е сликичка што се вметнува како дел од веб-сајт и ја подобрува неговата визуелна презентација, бидејќи на веб-мастерот му овозможува за нијанса повеќе контрола на приказот на сајтот или на линковите до него во различни разгледувачи.

Февајконот, кој најчесто се темели на логото, е важен елемент при брендирањето на даден сајт.

Веб-сајтот „Фејвајкон“ продава програмче за правење вакви икони, кои се снимаат во посебен формат (.ICO), при што датотеката може да содржи верзии на иста слика во различни големини. Сајтот нуди низа општи информации за целиот концепт, со што им помага на посетителите да се образуваат.

Со оглед на тоа што секој разгледувач (синоним: прелистувач) има посебен интерфејс, иконите може да послужат на разни места: во „фејворитс“ во Интернет експлорер, кај „табовите“ (јазичињата) во Фајерфокс и наредната верзија на Нетскејп итн. На веб-сајтот има посебни написи за секој од нив, со детални упатства како во кој случај треба да се постапи, како и општи „најдобри практики“.

Особено полезно за кредибилитетот на сајтов и на програмчето е што нуди директни линкови до рецензии на други сајтови, арно ама, со оглед на тоа што некои од нив се стари по неколку години, не зачудува што дел од линковите веќе не работат.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ЈСП
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.favicon.com

10 декември 2005

Гостивар онлајн (импресивно!)

[лекториран]

„Гостивар онлајн“ нуди основни информации за Гостивар и за некои околни места, како Маврово, Галичник, Св. Јован Бигорски и Вруток, пренесени преку компактен дизајн, читливи текстови и убаво обработени фотографии.

Тоа што текстот на македонски не е лекториран е веројатно единствената техничка забелешка што може да му се даде на сајтов. Неговата изработка е импресивна - кодот е во целосна согласност со стандардите на В3Ц и без проблем ја поминува валидацијата. Освен тоа, претставува и одличен пример за примена на каскадните стилови, особено преку можноста за менување на дизајнот на самото место, преку избор на една од трите понудени опции. Добриот впечаток за дизајнот го крунисува икончето (фавикон [фејвајкон]) со логото, кое се гледа ако сајтот го ставите во обележувачи (букмаркс, фејворитс) или гледате во јазиче (таб) на „Фајерфокс“.

Мора да се напомене дека, за жал, повеќето македонски дизајнерски фирми воопшто не обрнуваат внимание на придржување до горенаведените стандарди, туку ги извлекуваат парите од муштериите врз база на изгледот. Ова подоцна доведува до слаба видливост на сајтовите на машините за пребарување, ниско ниво на употребливост и пристапност.

„Гостивар онлајн“ отскокнува и со тоа што нуди и информација за заштитата на приватноста на посетителите, како и за тоа што не прави со адресите на е-пошта на лицата што ги контактираат - не ги дава ниту продава на трети лица, освен по налог на соодветните власти.

Покрај содржините за Гостивар и за околината, на сајтов има и полезна страница со линкови до други важни и полезни македонски сајтови, избрани од тројцата автори.


ЗА ВЕБ-САЈТОТ

Дополнување: баталено
Брзина: брзо
Функционалност: одлична
Код: ХТМЛ/ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 3/10
Јазик: македонски и англиски
Адреса: http://www.gostivar.com

09 декември 2005

Интернет-кафиња низ светот

[лекториран]

„Сајбер-кафиња“ претставува база на податоци за повеќе од 4.200 интернет-кафиња и јавни точки за пристап на Интернет во 140 земји низ целиот свет. Тие може да се пребаруваат по земја или по град, а податоците содржат начини за контакт, цени, капацитети, работно време и слично.

Ваквиот начин на пополнување овозможува пренос и споредби на податоци за кои инаку би бил потребен контакт со луѓе на теренот. На пример, може да се дознае дека цената за еден час пристап на Интернет во Македонија и во Индија е околу 1 долар, во Кина е два, на Фиџи - 3 долари, во Грција - од 3 до 4, во Андора и Аргентина - околу 5 долари, во САД е околу 6 (или 10 центи по минута), во Австралија - од 7 до 10, а во Замбија дури 10-12 долари.

За жал, некои од податоците изгледаат застарено, на пример за некои интернет-кафиња од земји од ЕУ цените се во старите валути, а не во евра. Сајтов како пример за тоа што може да направат за клиентите го одржува компанија што нуди софтверски решенија за електронска трговија, а грижата за содржините им е препуштена на сопствениците на интернет-кафињата, кои добиваат пристап до базата да внесуваат и да ги менуваат податоците.

Македонија на сајтов е претставена без дискриминација - под уставното име, и тоа преку девет интернет-кафиња од различни градови. Некои од нив имаат и веб-сајтови, чиј рејтинг на машините за пребарување е издигнат благодарение на тоа што до него води уште линк поврзан токму со клучниот термин од нивната област.

Фин дизајнерски „момент“ на сајтов е користењето иконче (т.н. фавикон [или фејвајкон]) со лого, кое се појавува во листата на обележувачи (букмаркс, фејворитс) и во јазичето (таб) во „Фајерфокс“ до неговото име.

ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: АСП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.cybercafes.com

08 декември 2005

x

Во денешниот број на „Време“ не се појавува рубриката „сајт на денот“.

07 декември 2005

Мак-рап

[лекториран]

„Мак-рап“ е портал на македонската хипхоп-сцена на кој може да се најдат вести, статии со анализи, рецензии и податоци за чинителите од т.н. урбаната култура. Во САД, „урбано“ е еуфемизам за „црнечко“, а во контекст на веб-сајтов се користи за сè што е поврзано со рапот и со хипхопот, кој го прават граѓани на Македонија од разновидни етнички и други потекла.

Амбициозните автори ќе ја подобрат ефективноста на својата презентација ако обрнат внимание на употребливоста на сајтов. Неа ја нарушуваат:
  1. приспособеноста само за „Интернет експлорер“ - дизајнот и линковите едноставно не работат во „Фајерфокс“,
  2. користењето рамки - спречува пристап од машини за пребарување до написите,
  3. нападната „музичка илустрација“ во Флеш, која се вклучува автоматски, и може да им пречи на луѓе што го посетуваат сајтот од работно место, а и влијае на брзината на вчитување и
  4. отворањето некои линкови во нови прозорци како попапи, што предизвикува конфликт со антишпионските блокери на попапи, вградени во ленти за алатки (тулбари).
Особено интересни на сајтот се вестите за приближување на овие цивилизациски вредности и до младите, преку предавања во средните училишта, и до интелектуалците, преку издавање културолошки студии. Како дел од содржините се истакнуваат и видеоклипови на некои од водечките локални групи од овој жанр, кои се презентирани по пропис, со наведена големина кај линковите за симнување.


ЗА ВЕБ-САЈТОТ

Дополнување: неопределиво
Брзина: средна
Функционалност: средна
Код: ХТМЛ+Флеш
Дизајн: рамковен
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 0/10
Јазик: македонски
Адреса: http://www.makrap.com

06 декември 2005

Озборувач

[лекториран]

„Озборувач“ е блог на извесен Бобан, којшто по учење или по работа се движи низ разни места во светот, а моментално живее и работи во Чикаго. За себе тој вели дека „учествува во идна конспирација. Сака индивидуализам, демократија, слободен ум, слободни пазари, слободен код. Мрази инертност, себичност, мрзеливост и се што не му оди во прилог.“

Написите на блогот се често содржајни и интересни стории од секојдневието или размислувања на најразлични теми, испреплетени со фотографии или со други графички содржини. Понекогаш тие претставуваат комплетни патописни репортажи.

Блогот во оваа форма постои од април 2005 година, а делата на авторот и пред тоа и се познати на интернетската јавност, од форумски или колаборативни веб-сајтови.

Од аспект на употребливост, на „Озборувачот“ може да му се забележи што линковите кон надворешните сајтови, а особено кон другите блогови, ги отвора во нов прозорец на разгледувачот. Со тоа ем им троши дополнителни ресурси на посетителите, ем си ја ускратува можноста посетителот да му се врати назад преку копчето „бек“ и да ги забележи промените настанати на сајтот во меѓувреме. Ова е особено важно ако реши да се самофинансира преку банери или учество во програми за огласи. Дополнително би било добро во шаблонот на внатрешните страници да вгради линк до насловната страница.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ (блогер)
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: има
РСС/Атом: има
Гугл-ранг: 4/10
Јазик: македонски
Адреса: www.ozboruvac.org

05 декември 2005

Блогот „Вицотека“

[лекториран]

Блогот „Вицотека“ служи за архивирање и за презентирање вицови на најразлични теми. Некои од нив се преземени од весници, а некои влегуваат директно од усното творештво. Посетата на сајтов може да обезбеди брзо опуштање од грижите во текот на работниот ден.

Без оглед на разликите во вкусовите што може да влијаат на впечатокот, не смее да се изуми дека постоењето на вакви блогови е од голема важност. Националната стратегија за развој на информатичко општество како приоритет ги поставува зголемувањето на количеството и разновидноста на содржините на локалните јазици, бидејќи така им се овозможува на граѓаните на Македонија да имаат причина за користење Интернет.

Би било добро кога насловите на постовите во „Вицотека“ би биле поописни, односно би ја најавувале содржината на вицот, секако без да ја откријат крајната поента. Честото користење на насловите како „Трпе“ – според еден од главните јунаци, или знаци за интерпункција, не овозможува снаоѓање со содржините.

Во поглед на дизајнот, блогот користи стандарден шаблон, кој не е модифициран. Би било препорачливо остварување зголемена размена на линкови и поставувањето јавен бројач Сајтмитер, којшто поддржува целосна интеграција со Блогер. Имено, при изборот на код на бројачот, корисникот може да одбере за каков тип сајт е наменет. Доколку се работи за сајт што се хостира на Блогер, корисникот добива можност да ги внесе своето корисничко име и лозинка, по што Сајтмитер автоматски го вметнува кодот на бројачот во блогот.


ЗА ВЕБ-САЈТОТ

Дополнување: повремено
Брзина: брзо
Функционалност: добра
Код: ХТМЛ (блогер)
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: затворен
РСС/Атом: има
Гугл-ранг: 1/10
Јазик: македонски
Адреса: vicoteka.blogspot.com

04 декември 2005

Да размениме линкови

Доколку имате блог или веб-сајт, повелете да размениме реципрочни линкови. Јавете се по е-пошта или преку коментари на овој пост. :-)

03 декември 2005

Антипункт [поточно: .аНТИблог]

[нелекториран]

„Антипункт“ [поточно: .аНТИблог] е блог на Ивица Антевски, поет, новинар и еден од најзаслужните членови на неформалната македонска блогерска заедница (МБЗ) и на интернет и вон него, кој работи на надминување на дигиталниот јаз преку промовирање на блогерството низ печатените медиуми.

Разновидните содржини на „Антипункт“ [моментално] одат под мотото „ништо против сè“ опфаќаат лични мислења против и за појави и луѓе, пофалби или кудења за сајтови или дела, како и еден вид на дневник на настаните кои му се случуваат на авторот и неговите реакции на нив. Стилот на пишување на постовите од овој вид е ’без влакно на јазик‘ и отворено идеолошки обоен („националнот: анархист“). Особено интересни се постовите со цели колумни во врска со некои вгездени предрасуди, стереотипи и општоприфатени ставови.

На блогот понекогаш може да се најдат и новинарски стории необјавени во медиумите за кои работи авторот, напишани во објективен стил.

Како и кај другите видни претставници на МБЗ, на блогот се дозволени коментари од читателите, кои за некои теми имаат прераснато во опсежни полемики.

Секако, ваквото зголемување на можностите за интеракција, а и редовното освежување доведуваат до јакнење на репутацијата на блогот, а и позитивно влијае на популарноста (која не му е важна на авторот), што може да се провери со споредба на јавните бројачи.

Дополнување: секојдневно
Брзина: брзо
Функционалност: одлична
Код: ХТМЛ (блогер)
Дизајн: блогерски
Навигација: стандардна
Пребарувач: нема
Клучни зборови: нема
Јавен бројач: има
РСС/Атом: има
Гугл-ранг: 4/10
Јазик: македонски
Адреса: antipunkt.blogspot.com

02 декември 2005

Плагиј.ат

[лекториран]

Веб-сајтот „Плагиј.ат“ (доменот е хостиран во Австрија) пренесува вести, информации и коментари од светот на музичката и на филмската, а и од други гранки на уметноста и современата култура и општество.

Сајтот е и како електронско списание и како форум, во стил на колективните блогови од типот на Слешдот или Багра, но со особен стил што доаѓа од воспоставената уредувачка политика и индивидуалноста на авторите и на авторките. Членови на заедницата се луѓе од Македонија што живеат низ целиот свет и се веќе познати урбани личности, кои се занимавале и со други веб-проекти или изградба на заедници преку ИРЦ, но и класични уметности како проза или екстремни спортови како скејтбординг. Сето тоа се огледа и во свежиот визуелен дизајн.

Сајтот содржи и солидна библиотека на видеоклипови снимени на концерти на некои од најпознатите македонски и балкански алтернативни бендови и изведувачи.

Од аспект на оптимизација за машини за пребарување, би било добро кога насловите на написите презентирани со интро на главната страница би претставувале линкови до целосната содржина. Од аспект на употребливост, тоа би било добро да се примени и за придружните сликички-икони. Во внатрешните страници, со написи, би било добро да се вметне линк до првата страница, на пример кај логото на сајтот. Додавање на РСС или друг икс-ем-ел фид би му овозможило поголема популаризација на сајтот.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: ПХП
Дизајн: текстуален
Навигација: минимална
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 4/10
Јазик: македонски
Адреса: www.plagij.at

01 декември 2005

Светски ден за борба против ХИВ/сида

[лекториран]

Веб-сајтот посветен на Светскиот ден за борба против ХИВ/сида го одржува британска организација што е водечка во таа земја на полето на лобирање и застапување од оваа област.

Веб-сајтот нуди основни медицински информации за ХИВ/сида, четирите начини на инфицирање и методите за побезбеден секс во многу достапен и прифатлив формат, дополнет со едноставен и ефективен дизајн. Покрај тоа, остава можност за двонасочно информирање за јавни настани поврзани со оваа тема, при што и други организации може да го искористат и да најават свои активности.

Особено интересно е направен делот за лични приказни, во кој разни луѓе, претставени со фотографија, ги споделуваат своите мислења за темата, како и за потребата да се носи црвената лента како симбол на свеста за потреба од сеопфатна активност за помагање на заболените и на потенцијалните жртви. Овие содржини се достапни и преку посебна страница, но и како инсерти на другите страници, по случаен редослед. И во овој случај читателите имаат можност да испратат свои прилози, што може да биде одлична шанса за промовирање на активистите од Македонија во странство.

ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: АСП
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: www.worldaidsday.org

30 ноември 2005

Детско здравје

[лекториран]

Мисијата на веб-сајтот „Детско здравје“ е да им овозможи на децата, родителите и на луѓето од пошироката заедница пристап до авторитетни, веродостојни современи и локално релевантни информации, презентирани на едноставен и разбирлив начин, поделени во достапни категории. Кредибилитетот на информациите почива на консултација на врвни медицински стручњаци.

Презентираните написи се исцрпни и интересни, па посетата на сајтов е препорачлива за сите што се заинтересирани за здравјето. Секој напис е поделен на секции, до кои може да се дојде преку кратка содржина на врвот на страницата, што придонесува за издигање на нивото на употребливост. Написите се леснодостапни и преку „пул даун бокс“, во кој се вметнати имиња на темите што ги обработуваат.

При изработката, страниците најверојатно се тестирани само со „Интернет експлорер“. Затоа, кога веб-сајтот се посетува со „Фајерфокс“ некои од табелите се развлечени и надвор од должината на екранот. Дизајнерот би требало да обрне внимание на компатибилност со разни типови разгледувачи, а уредникот на дополнување со содржини кај линковите што водат кон страници со натпис „under construction“.

ЗА ВЕБ-САЈТОТ

Дополнување: ретко
Брзина: средна
Функционалност: добра
Код: АСП
Дизајн: текстуален
Навигација: стандардна
Пребарувач: нема
Клучни зборови: делумно
Јавен бројач: нема
РСС/Атом: нема
Гугл-ранг: 5/10
Јазици: македонски и албански
Адреса: www.detskozdravje.org.mk

29 ноември 2005

Не кликај - Институт за истражување на интерактивноста

[лекториран]

Целта на овој веб-сајт направен од италијанскиот институт за истражување на интерактивноста е да покаже дека кликнувањето со глувчето не е неопходна операција при разгледувањето дигитални содржини.

Всушност, кликнување на сајтот е потребно само еднаш, при влегувањето во него. Потоа влегувате во свет „без копчиња“, во кој сите операции поврзани со навигација и со читање се прават со комбинација на поставување на покажувачот на определено место и со анимирано приспособување на самиот сајт на новонастанатата ситуација.

Дури и ситуациите за кои природно се очекува дека е неопходно кликнување, како одговарање на прашања со повеќе опции, се решени со тоа што изборот на опции се прави со поминување над дадена површина.

Прашањата што ги поставува проектов, колку е тешко да се надминат навиките или што се случува ако се отстранат елементите на навигација на кои публиката е навикната и како тоа го менува однесувањето, се важни и од аспект на проучување на човечкиот ум, но и од аспект на употребливост, особено во ситуација на развој на широкопојасен пристап кој душа дал за употреба на флеш и на други интерактивни апликации.

Интересно е дека доколку се кликне каде било во одлично изработениот интерфејс, се појавува порака што реагира на таа појава и се обидува да ја разбере.

Податоците од сите посети се чуваат и се обработуваат, со што се придонесува за развој на концептот.

ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: Флеш
Дизајн: флешерски
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.dontclick.it

27 ноември 2005

Предложете сајтови за рецензија

Скоро сите веб-сајтови предложени за рецензија по е-пошта биле претставени во рубриката „сајт на денот“. Повелете, искористете ја можноста да предложите сајтови и преку коментарите на овој пост.

26 ноември 2005

Дневен преглед на политичка теорија

[лекториран]

„Дневниот преглед на политичка теорија“ е портал/веблог за политикологија и философија. Негова цел е да обезбеди централно место на вебот преку кое посетителите ќе имаат увид во најновите вести, претставени во вид на густо испреплетени линкови.

Написите и есеите до кои се поставени линковите може да се читаат без дополнително плаќање и се однесуваат на широк дијапазон теми, погледи и методологии.

Покрај насловната страница, сајтот содржи и неколку страници за поддршка со линкови до ресурси на Интернет, посебни научни трудови и архива на старите прилози. Редакцијата е расположена за соработка со сите добронамерници, што претставува добра шанса за македонски сајтови со слични содржини да добијат линкови до нив, со што ќе се издигне нивниот рејтинг на пребарувачите.

„Прегледот“ одржува и база со линкови до организации, лица и до блогови од оваа област, кои може да бидат од голема полза и за нашата академска заедница. Особено се интересни линковите во врска со стотиците стипендии достапни преку веб за пишување оригинални трудови и за учество на научни собири и конференции.

Читателот што ни го препорача сајтов смета дека нуди одлична дневна доза линкови до стории што поттикнуваат размислување - сесрдно се согласуваме.

ЗА ВЕБ-САЈТОТ

Дополнување: секој работен ден
Брзина: брзо
Функционалност: одлична
Код: ХТМЛ
Дизајн: текстуален
Навигација: минимална
Пребарувач: има
Клучни зборови: нема
Јавен бројач: затворен
РСС/Атом: нема
Гугл-ранг: 6/10
Јазик: англиски
Адреса: www.politicaltheory.info

25 ноември 2005

Училишна мрежа во Намибија и стрипот „Хаи ти“

[лекториран]

„Скул нет“, односно „Училишна мрежа“, е непрофитен провајдер, кој овозможува бесплатен пристап на Интернет, хардвер и обука за повеќе од 450 училишта од Намибија. Проектот со училиштата почнал во 2000 година и се базира на употреба на слободен софтвер, особено на приспособена верзија на „Линукс“ и апликации како „Опен офис.“

Веб-сајтот на организацијата нуди детални и транспарентни информации за нејзиното функционирање, а за подобро снаоѓање е поделен на оддели наменети на одредени целни групи: ученици, наставници, услуги… Од дизајнерски аспект, единствено што може да им се забележи е употребата на сликички за менито, наместо табела со текстуални линкови, можеби засилени со јаваскрипт-функционалност, оти вака вчитувањето е побавно.
Особено убаво за „Скул нет“ е што имаат најдено многу инвентивен начин за приближување на своите услуги до младите - преку стрип. Стрипот „Хаи ти“, кој на локалниот јазик ошивамбо значи „слушај ваму“, е извонредно квалитетно нацртан и изобилува со хумор и со информации.

Во него група деца решаваат проблеми со употреба на ИКТ и на можностите што им ги нудат училишните лаборатории. Евидентна е и еволуцијата на стрипот во поглед на пристапност, оти во втората епизода се вметнати фусноти со објасненија на поими погодни за читатели што првпат се среќаваат со информатиката и со Интернет.

„Хаи ти“ е лиценциран под криејтив комонс и може целосно да се симне од веб, и тоа во верзија само за читање на екран (помали слики), но и во верзија што е погодна за печатење и за обработка, односно превод и реиздавање, без потреба да се плаќаат авторски права.

ЗА ВЕБ-САЈТОТ

Дополнување: повремено
Брзина: средна
Функционалност: мн. добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.schoolnet.na

24 ноември 2005

Зајачиња во филмска акција

[лекториран]

Продукцијата „Лут вонземјанин“ под водство на Џенифер Шиман е најпозната по цртаните филмови во кои главни ликови се група зајачиња. Анимациите се одлично изведени во „Флеш“ и претставуваат пародии на класични и култни филмски остварувања, кондензирани на 30 секунди.

Добриот хумористичен впечаток го дополнува звучната и музичка поддршка направена во карактеристичен и препознатлив стил. Љубителите на филмот, секако, нема да останат рамнодушни.

Тековно се застапени филмовите „Осмиот патник“, „Големото студенило“, „Егзорцист“, „Фреди против Џејсон“, „Хајлендер“, „Тоа е прекрасен живот“, „Ајкула“, „Евтини приказни“, Роки хорор пикчр шоу“, „Вресок“, „Сјаење“, „Тексашки масакр со моторна пила“, „Титаник“ и „Војна на световите“ (старото издание). Постојат и други пародии на филмови направени во истиот стил, но тие се достапни само со плаќање на веб-сајтот на компанијата што ги нарачала.

Од аспект на информациска архитектура, сајтов е добро проектиран, бидејќи секое филмче има своја посебна ХТМЛ-страница, до која може да се постави директен линк, односно да се пристапи преку машина за пребарување, што не би било случај ако сајтов е направен комплетно во „Флеш“, со еден интерфејс во кој би се вчитувале филмовите.

Други интересни апликации на веб-сајтот се дневникот на извесна Ејми, напишан во 1978 година, дополнет со мултимедијални елементи, како и низа кратки цртани филмови без зајачиња во нив.

ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: Флеш + ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: затворен
РСС/Атом: нема
Гугл-ранг: 7/10
Јазик: англиски
Адреса: www.angryalien.com

21 ноември 2005

Листата на Крег

[лекториран]

Крег Њумарк ги набљудувал луѓето како си помагаат преку Интернет, на пример преку системот „Вел“ (WELL) и дискусионите групи на „Јузнет“ (Usenet), па во 1995 година решил и тој да се приклучи, известувајќи по е-пошта за интересни настани во Сан Франциско и пошироката околина. Листата се ширела од човек на човек и наскоро имало потреба за неа да се употреби специјализиран софтвер, кој прераснал во специјализиран веб-сајт, кој овозможува интегрирано комуницирање во комбинација со е-поштата.

Со текот на времето луѓето почнале да објавуваат информации и огласи од различни области, како отворени работни места, продажба на предмети, изнајмување станови - како одговор на кусокот станови во околината, како и форуми за дискутирање на најразлични теми.

Во 1997 година Крег носи одлука листата да не биде комерцијална и да не се користи за објавување огласи преку банери. Оваа одлука ја поддржала заедницата што се развила околу листата, зајакната со правење журки за членовите, како и со основањето непрофитна фондација.

Денес листата на Крег се смета за еден од најефективните и најпопуларни веб-сајтови за вработувања во широката и влијателна географска област што ја покрива. Луѓето го сакаат и користат бидејќи им дава: (1) можност да се искажат, (2) чувство на доверба и интимност, (3) конзистентност на непретенциозни вредности, (4) едноставност, (5) не им бара пари, со исклучок на објавувањето огласи за работа, (6) свежина на материјалот, (7) отсуство на огласи, особено на банери.

Поуките на листата на Крег може да бидат од голема полза за низа македонски сајтови со големи амбиции, кои допрва треба да ги покажат широкоградоста и инклузивноста во односот со корисниците.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ, ЦГИ и др.
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.craigslist.org

18 ноември 2005

Римската војска низ илустрации

[лекториран]

Тоталитарен милитаризамНа Интернет има многу ресурси во кои се дискутира за историјата на античкиот свет, но само малку од нив нудат квалитетни и точни визуелни илустрации на оваа тема. Написите на веб-сајтот „Ред рампант“ (Црвена безобѕирност) содржат не само историски податоци туку му ставаат акцент и на изгледот преку оригинални илустрации. На нив може да се види како изгледале во тоа време облеката, оклопот, оружјето, фортификациите и слично.

Освен основните информации за римската војска, како нејзината организација, хронологија на походите и опис на опремата, веб-сајтов содржи и податоци за другите антички цивилизации и народи со кои тие доаѓале во контакт, а често и во конфликт.

Иако презентираните податоци се издржани и врз научна основа, со наведување на точните извори (кои служат и како линкови на процент до Амазон.ком, со што се помага одржливоста на сајтот), зачудува тоа што текстовите не се лекторирани и изобилуваат со ситни, но забележителни грешки од типот несоодветна употреба на мали и големи букви.

Без разлика на тоа, веб-сајтов вреди да се посети, оти нуди концизна и пристапна презентација на содржините, кои доживуваат нова популарност благодарение на стратегиските видеоигри од серијалот „Тотална војна“.

Заинтересираните за историјата може да стапат во контакт со авторот Ендрју Брозина и да ги дополнат неговите сознанија со податоци од историјата на Македонија, која, бездруго, била дел од светот на стариот Рим.


ЗА ВЕБ-САЈТОТ

Дополнување: неопределиво
Брзина: брзо
Функционалност: одлична
Код: ХТМЛ
Дизајн: текстуален
Навигација: минимална
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.redrampant.com

16 ноември 2005

Светски водич за жени на лидерски позиции

[лекториран]

„Светскиот водич за жени на лидерски позиции“ претставува уште едно енциклопедиско издание за чие создавање не се барани, ниту добиени државни пари, туку е резултат на личниот ентузијазам и истражувања на Данецот Мартин Кристиансен.

Веб-сајтот содржи списоци на жени-шефови на држави категоризирани по земји, хронолошки листи на жени што биле во позиции на моќ од 3000 г. п.н.е., како и жени што биле на функциите премиер, министри на финансии и одбрана, жени-претседавачи на парламенти, гувернери, премиери, како и локални водачи, шефови на партии, хронолошки листи на кандидатки за претседатели, амабасадорки во ООН, листи на жени-свештенички и бискупи, како и листа на Данки на лидерски позиции.

Единствено што може да му се забележи на сајтов од аспект на употребливост е што резултатите на пребарувањата ги отвора во нов прозорец. Инаку, нуди и извонредно многу детални податоци за жените во политичкиот живот на Македонија, секако под уставно име и придружени со основни биографски белешки.

Опфатени се жените од Олимпија Епирска - жената на Филип Втори, мајка на Александар Трети, која владеела со античка Македонија како регентка, до сите современи политичарки што биле на значајни функции во земјата по осамостојувањето. Во однос на Република Македонија, голем дел податоци авторот на веб-сајтот ги има собрано преку Интернет, но, за жал, со одминувањето на владејачките гарнитури голем дел од нив е загубен од веб-сајтовите на соодветните државни институции.

ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ
Дизајн: текстуален
Навигација: минимална
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.guide2womenleaders.com

14 ноември 2005

Блогот на Горан Андреев

[лекториран]

Блогот на Горан Андреев е за Велес, мобилна технологија, музика, хумор, хајтек, Интернет, софтвер, хардвер, спорт и, всушност, ги обединува темите што тој претходно ги обработуваше на посебни блогови поставени на различни платформи (блог за Велес, Мобил блог итн.).

Префрлањето на новата платформа Ворд прес кон крајот на септември значеше дека ќе мора да го гради својот ранг на Гугл од нула, но е оправдано со зголемените можности што таа ги нуди, како категории, интерни статистики, можности за приспособување и слично.

И адресата на блогот исто така содржи елемент на новина во себе. Имено, Горан Андреев ја користи единствената можност што, според правилникот на МАРНет, им овозможува на физички лица да регистрираат свој поддомен во Република Македонија. Ваквите поддомени мора да завршуваат на name.mk. За сите други видови легални поддомени (com.mk, gov.mk, org.mk, net.mk, inf.mk, edu.mk) сопственик мора да биде правно лице, и тоа често од строго определена област.

Познат како еден од најактивните македонски блогери, Андреев го разбива стереотипот за тоа како жителите на престолнината се понапред во однос на оние што живеат во другите делови на земјава кога се работи за интересот и за користењето на новите информатичко-комуникациски технологии. Во поглед на блогерството, покрај Велес, од каде што дејствуваат и Јован Петров (рецензија) и Љупче Пепиќ, лидерска улога игра и Битола.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 0/10
Јазик: македонски
Адреса: blog.goranandreev.name.mk

09 ноември 2005

Тетово-онлајн

[лекториран]

„Тетово-онлајн“ е блог на Декстер, истакнат член на македонската блогерска заедница, кој епитетот го има заслужено благодарение на постојаноста на освежувањето. Блогот не е тематски ниту географски ограничен, па обработува теми од разни области, од занимливости од целиот свет до пренесување вести за настаните во Тетово и во Тетовско.

„Ворд прес“, софтвер што го „придвижува“ овој блог, станува се попопуларен кај оние македонски блогери што се доволно амбициозни да инсталираат апликации на сопствен сервер, или да закупат простор на сервер што го овозможува тоа. Неговата предност над бесплатниот блогер е во тоа што овозможува поделба на содржините на категории, интегрирано пребарување и коментари и слично.

„Ворд прес“ го користат и други познати блогери, како експертот за ИКТ Јован Петров (рецензија), велешката легенда Горан Андреев (рецензија) и експертот за е-бизнис Мијалче Георгиев (рецензија).

Фактор за успехот на „Тетово-онлајн“ е урамнотеженоста на содржините. Блогот има 19 категории (геџети, Интернет, интересно, мобилки, сеир, музика, општо, хумор…) и бројот написи речиси во сите е приближно еднаков, така што во секое време на насловната страница има за секого по нешто.

Дополнителна причина за посета на веб-сајтот „Тетово-онлајн“ е што во неговите рамки постои и архива за МП3-музика, во која може да се најдат некои класици на македонската забавна музика, но и песни од локални рап- и рок-бендови од Тетово.


ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ХТМЛ
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 4/10
Јазици: македонски и англиски
Адреса: www.tetovo-online.com

07 ноември 2005

Борат од Казахстан

[нелекториран]

Борат од Казахстан, водителот на годинешното доделување на европските награди на МТВ, е креација на брилијантниот британски комичар Али Џи. Неговиот лик темели на две нешта.

Првото е директно копирање на искрениот маалски стил на Турчинот Махир Чагри кој стана светски познат благодарение на смешноста на неговиот недоучен англиски јазик при неговот барање пријатели низ светот преку интернет.

Второто е тоа што главниот тек на хипер-политички коректната јавност во САД и ЕУ дозволува еден исклучок при спроведувањето на непишаната забрана за стереотипизирање врз база на културниот идентитет: во случајот на луѓе од бившиот комунистички блок. Иако сеуште не постои социолошка студија на оваа појава, можеби се работи за еден од рецидивите на Студента војна, односно дел од одложеното исмејување на оние кои беа победени во неа. Друг пример за ова е филмот „Терминал“ на Спилберг, за смешно-жалниот, политички зафркнатиот, но коруптивно снаодлив преживувач со неадекватно јазично и неопределиво географско потекло.

Иако дел од грешките на веб-сајтот (демоде дизајнерски елементи како анимираните гифчиња, изборот на бои, фонтови и правописот) се очевидно намерни и прифатливи во дадениот урнебесен контекст, од аспект на употребливост се направени пропусти со неприлагодувањето на големината на прозорецот од разгледувачот, отворањето на нови прозорчиња при кликање на линковите, а особено во однос на снимката од наградите од МТВ, кој функционира само со широкопојасна врска и инсталиран плагин, за што не се дадени потребните дополнителни информации.

Дополнување: неопределиво
Брзина: брзо
Функционалност: добра
Код: ХТМЛ
Дизајн: комбиниран
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 0/10
Јазик: англиски
Адреса: www.borat.kz

24 октомври 2005

Проект за истражување на Кооби Фора

[лекториран]

Регионот Кооби Фора во околината на езерото Туркана во северна Кенија е исклучително значаен извор на фосилни остатоци од цицачи акумулирани во претходните неколку милиони години. Меѓу нив досега се најдени околу 350 примероци од пралуѓе (хоминиди), како и нивни алатки, преку кои се градат интерпретации на нивното однесување.

Во Проектот за истражување на Коби Фора се вклучени светски познати палеонтолози, меѓу кои и припадниците на семејството Лики, заслужни за откривање низа познати фосилни докази за еволуцијата на човекот. Бернард Нгенео, еден од локалните ловци на фосили од нивниот тим, во 1972 година го има откриено черепот на нашиот предок од видот хомо хабилис („вешт човек“) , наречен 1470, кој е претставен на логото на проектот.

Веб-сајтот ги документира експедициите што се одвиваат еднаш годишно во форма на рудиментиран блог, преку извештаи и фотостории, овозможувајќи директен увид во работата на теренот. На веб-сајтот се презентирани и низа дополнителни информации, почнувајќи од оние за историјата на истражувањата во областа, до линкови до други веб-сајтови што пренесуваат вести за откритија низ целиот свет.

Ловот на фосили е интересна и напорна работа, која во Кенија значи изложување на ризик од средби со истите диви животни што ги ловеле нашите предци. Разликувањето на скаменетите остатоци од коски од другите камења во слоевите на седименти бара огромна вештина и долготрајна обука.

Палеонтологијата е значајна не само како интелектуален предизвик и научна дисциплина. Разбирањето на биолошкиот постанок на човекот овозможува ширење на свеста за заедничките корени на денешните луѓе и ги тривијализира разликите според раса, народност или нација, кои се користат како изговор за конфликти.


ЗА ВЕБ-САЈТОТ

Дополнување: повремено
Брзина: средна
Функционалност: одлична
Код: ХТМЛ
Дизајн: комбиниран
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.kfrp.com

10 октомври 2005

Фарскејп - мапетовци во вселената

[лекториран]

Иако на прв поглед изгледа конфекциски, ТВ-серијата „Фарскејп“ на Алфа има низа добри особини, освен тоа што е единствена редовна научнофантастична содржина што без кабелска или сателитска се фаќа на подрачјето на Скопје. Она што ја издвојува од мноштвото остварувања за мултивидна група што талка со вселенски брод се акцентот на биотехнологија, но и вештината на изработка и способноста за хумор и иронија.

Изработката е дело на студиото на познатиот куклар Џим Хенсон, авторот на „Мапет-шоу“ и „Раскажувачот“, чиј син Брајан е еден од авторите на „Фарскејп“. Ефектите се импресивно изведени, а не заостануваат ни костимите на вонземските ликови, дури ни на епизодистите во масовните сцени, со мала забелешка за усиленоста на клингоидниот Лаксанец Д’Арго.

Духовитоста на „Фарскејп“ се огледа во користењето референци на жанрот во кој припаѓа. Главниот лик се вика Крајтон, исто како познатиот СФ-писател и режисер („Паркот Јура“, „Тринаесеттиот воин“, „Твистер“) и ТВ-продуцент („Ургентен центар“ на А1) Мајкл Крајтон. Пишувањето на името на англиски (Crichton) е фонетски нелогично и им задава маки на преведувачите-буквалисти. Во серијата, земјанинот споменува други СФ-серијали, како „Војна на ѕвездите“, како дел од неговото културно наследство, што го зајакнува впечатокот на реалност.

За жал, „Фарскејп“ како франшиза е во опасност. Веќе не се снима по „сезони“, туку е сведена на минисеријали и ДВД-изданија. Обожавателите преку Интернет веќе неколку години се обидуваат да создадат мрежа за поддршка, слично на онаа што ја има развиено заедницата на „Ѕвездени патеки“. На веб-сајтовите од овој тип ќе најдете информации за развојот на настаните и дискусии во таа насока. За жал, најважниот таков сајт „Сејв Фарскејп“ деновиве е неактивен. Од официјалните сајтови, оној на каналот Сај-фај е подобар и посвеж од оној кај Хенсоновци.


ЗА ВЕБ-САЈТОТ

Дополнување: неопределиво
Брзина: средна
Функционалност: добра
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.scifi.com/farscape

02 октомври 2005

Македонска врска

Веб-сајтот „Македонска врска“ претставува деловен директорум преку којшто може да се стапи во контакт со македонски фирми од целиот свет. Конципиран е да може да овозможи поврзување во рамките на дијаспората, но и на дијаспората со матичната земја.
Секоја фирма е претставена преку неколку клучни параметри, како адреса, мапа (преку Гугл мапс), информации за контакт и сопственикот, линк до веб-сајт, оглас или визит-карта во формат на слика.

Особено интересна е опцијата „македонски попуст“: фирмите која ја одбрале даваат погодности на оние кои ќе го испечатат и донесат со себе купончето за таа фирма од сајтот. Погодностите се различни за секоја фирма и се движат од процентуални намаленија до ослободување на муштеријата од плаќање на локалниот данок на промет (го покрива фирмата).

Пребарувањето на сајтот е одлично изведено, а резултатите може да се филтрираат преку градови, или разгледуваат по име на компанијата или име на сопствениците.
Овој сервис со огромен потенцијал почна со работа пред неколку дена. Засега поголем дел од фирмите се од поширокото подрачје на Торонто, Канада, но очевидно е дека се приклучуваат нови од целиот свет. За жал, од Република Македонија има само една, интернет цвеќарницата „Флауершоп“, еден од ретките примери за употреба на електронска трговија во земјава.

Дополнување: неопределиво
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 0/10 (нов сајт)
Јазик: англиски
Адреса: www.macedonianconnection.com
Датум нa пишување: 02.10.2005.

01 октомври 2005

Пингоматик – фраерска алатка за блогери

[лекториран]

„Пингоматик“ овозможува испраќање пингови (сигнали) до сервисите за следење и поврзување блогови, преку кои се известуваат дека нешто ново е поставено на даден блог.

Таквите сервиси се многу влијателни, оти преку нив блоговите добиваат видливост и зголемен сообраќај, но најчесто не им се исплатува постојано да проверуваат дали има нешто ново на сите блогови во светот. Со испраќање мал пинг до секој од нив може да ги известите дека сајтот е освежен и да ги поканите да го посетат. На тој начин тие добиваат свежи податоци, а серверот не е преоптоварен со автоматски посети од овие машини за пребарување.

Откако ќе се испрати пингот, треба да помине извесно време пред да може да се испрати нов. Ова оневозможува злоупотреба и преоптоварување на „Пингоматик“ и сајтовите што ги известува.

Сосема природно, интегрален дел од сајтот е и блогот со кој авторите на „Пингоматик“ известуваат за нивната работа и за новостите во врска со сервисот.

Интересно е дека Флешот на сајтов е искористен многу практично - не за банери што светкаат и трепкаат без врска и на кои никој не клика, туку во делот за статистика за прегледен графички приказ на податоците од база. Иако нема независна верификација, угледот којшто го има овој „Пингоматик“ (го препорачува дури и ЕФФ - Електроник фронтиер фоундејшн) придонесува да нема место за сомневање во резултатите што ги прикажуваат, како на пример дека дневно се прават меѓу 1 и 4 милиони пинга.

ЗА ВЕБ-САЈТОТ

Дополнување: често
Брзина: брзо
Функционалност: одлична
Код: ПХП, Флеш
Дизајн: текстуален
Навигација: стандардна
Пребарувач: несоодветно
Клучни зборови: нема
Јавен бројач: нема
РСС/Атом: несоодветно
Гугл-ранг: 7/10
Јазик: англиски
Адреса: pingomatic.com

27 септември 2005

Македонски блог за е-бизнис

[лекториран]

Еден од најновите македонски блогови со огромен потенцијал за успех и добар старт е „Македонскиот е-бизнис блог“, кој го води експертот за маркетинг Мијалче Георгиев, асистент на Економскиот факултет во Скопје и член на Работната група за изработка на Национална стратегија за информатичко општество на РМ.

Иако почна да работи неодамна, овој блог го привлекува вниманието со посветеноста на авторот да обезбедува обемни, чести и промислени информации. Покрај тоа, ова е веројатно еден од првите примери луѓе од академските кругови да комуницираат со јавноста на својата тема, овозможувајќи ширење на знаењата и надвор од нивната матична институција. Вака конципиран, блогот претставува одличен ресурс за сите што ја истражуваат можноста за воведување Е-бизнис решенија во Македонија.

Изборот на софтверот Вордпрес како платформа овозможува и разграничување на содржините по категории (е-бизнис, ЕРП, не-бизнис, е-маркетинг, ВОИП, БПМ...), што го олеснува разгледувањето. Блогот овозможува интерактивност, при што се истакнува можноста за оставање коментари.

Најново од светот на македонското блогерство е дека бројот на блоговите што ги индексира пребарувачот „Најди!“ од пред неколку дена е повеќе од 100.


ЗА ВЕБ-САЈТОТ

Дополнување: секојдневно
Брзина: брзо
Функционалност: одлична
Код: ПХП
Дизајн: блогерски
Навигација: стандардна
Пребарувач: има
Клучни зборови: нема
Јавен бројач: има
РСС/Атом: има
Гугл-ранг: 0/10 (нов сајт)
Јазик: македонски
Адреса: blog.ebiznis.info

16 септември 2005

Едбастерс

[лекториран]

„Едбастерс“ во слободен превод значи „разбивачи на огласи“ (потсетува на некогаш популарните „гоустбастерс“ - истерувачи на духови). Едбастерс претставуваат глобална мрежа составена од уметници, писатели, шегаџии, неолудити, философи, студенти и претприемачи, кои сакаат да промовираат ново движење за општествен активизам, приспособено на информатичката ера. Нивната цел е да се соборат постојните структури на моќ и да се овозможи големо поместување во начинот на живот во 21 век.

За таа цел, Едбастерс издаваат непрофитни печатен магазин и веб-сајт, а и нудат креативни услуги преку агенција за застапување.

На веб-сајтот се прикажани написи од магазинот и разни други содржини, меѓу кои се истакнува галеријата на испародирани реклами поделени по области: мода, тутун, алкохол, храна и разно.

Најпозната активност на Едбастерс е таканаречениот „џаминг“, односно вандализирање на поставени рекламни паноа и слични марифетлаци со додавање разни уметнички елементи, кои го деконструираат или дополнуваат нивното значење. Со оглед на тоа што се нелегални, таквите активности не се промовираат јавно на веб-сајтот, но за нив може повеќе да прочитате во книгата „Не лого“ на Наоми Клајн (њњњ.нолого.орг).

На веб-сајтот се претставени и тековните кампањи на Едбастерс, кои имаат поширок опсег од визуелниот. На пример, една од нив е за промена на наставните планови на факултетите, преку која би се исфрлила тековната „неокласична“ економија, која како неуспешна парадигма го води човештвото во погрешна насока и би се вовела еколошка економија.


ЗА ВЕБ-САЈТОТ


Дополнување:неопределиво
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.adbusters.com

05 септември 2005

Битолските сајбер-стоматолози

Стоматолошката ординација на симпатичните битолски доктори Нечаковски (татко и син) може да се пофали со еден од најдобрите веб-сајтови во земјава на тема здравство и здравствена установа. За жал, тоа е поради општата катастрофална состојба кај нас на ова поле, оти сајтот, иако е пристојно изработен, сепак не е ремек-дело.

Огромна предност на сајтов е што може да послужи и како извор на знаења од стоматологијата. Голем број на прашања и основни поими се објаснети преку концизни написи. Особено импресионира напорот за ваква цел да се употреби и успешно изведената анимацијата во Флеш.

Најважно нешто што недостасува на сајтов е ценовникот, оти кај списокот на услуги не е наведено колку која чини и за кого.

Интересно е дека во светот е во подем здравствениот туризам, појава при која посетители од земји со повисок стандард одат во земји каде што здравствените услуги се на задоволително ниво, а со пониски цени. Засега ваков вид услуги се нудат претежно за соседите – во Битола за јужните, а во Скопје за северозападните и за нашите иселеници за кои една од причините за посета на татковината е „да се суредат“ во овој поглед. Секако, вистинскиот потенцијал за оваа гранка лежи во здружување на здравствени фирми со туристички агенции способни да се поврзат со колеги од странство, кои би носеле пациенти од Западна Европа на чартер-летови во комбинација со тури по нашите природни убавини.

Ефективноста на сајтов би се зголемила кога сите содржини, особено оние општообразовните, би се превеле конзистентно и на странските јазици. Со тоа ќе се добие повисок рејтинг на машините за пребарување, а со тоа и поголема можност за нови муштерии. Исто така, од полза би било закупување или размена на банери со посетуваните сајтови за РМ кои објавуваат информации на тие јазици, како Риалити Маседониа и Макфакс за англискиот, или веб-сајтот на Виножито за грчкиот.

Дополнување: неопределиво
Брзина: брзо
Функционалност: добра
Код: ХТМЛ, Флеш
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазици: македонски, англиски, грчки
Адреса: www.stomatolog.com.mk
Датум на пишување: 05.09.2005.

Фуриии

„Фурии“ е веб-сајт на шведската дигиталната уметничка Линда Бергквист, позната и под псевдонимот Енајла. Иако во случајов има неколку жртвувања на употребливоста (рамки, отворање на линкови во нови прозорци), сајтов сепак вреди да се посети поради извонредно изработените слики и цртежи. Покрај тоа, на сајтот се достапни и стрипчиња во кои главни ликови се самата уметничка и нејзиниот мачор Азраел.

Галериите со слики се поделени според доминантните бои, а не според тематика. Тоа малку го отежнува снаоѓањето, но не е преголема пречка. Иако таа воглавно црта од кеиф, во моментов г-ца Бергквист работи на книга со „темни бајки“, а посета на нејзиниот веб-сајт се препорачува за оние кои сакаат фантастика и слики на самовили и елфи.

Уживањето што се нуди е чисто естетско – нема порнографски содржини, ниту форми на гушење преку здодевни тиради. Во минатото сајтов бил поврзан со прилично активен форум, но тој сега е згаснат што ја намалува можноста за интеракција и активна промоција.
За активно заинтересираните за уметност особено полезни се неколкуте галерии кои содржат упатства за тоа како чекор-по-чекор се црта со програми од типот на Фотошоп. Некои од овие „туторијали“ прво се објавени во ценети компјутерски списанија, како оние за цртање делови од човечко лице: око, нос и слично кои излегуваат во „Компјутер артс“.

Дополнување: на недела-две
Брзина: брзо
Функционалност: добра
Код: ХТМЛ
Дизајн: комбиниран
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.furiae.com
Датум на пишување: 05.09.2005.

03 септември 2005

Факти за религиите

[лекториран]

Овој амбициозен енциклопедиски веб-сајт има за цел да ги презентира фактите за светските религии и теми поврзани со религијата од „објективна, академска перспектива“, на пристапен начин.

Во основа, сите текстови се напишани во афирмативен стил, со фокус на духовните активности и на обичаите. Отсуствуваат обработки на контроверзни историски настани и движења поврзани со религиите (крстоносните војни, џихадот), и критиките упатени до некои од нив, особено во врска со новоформираните. Како извори на информациите често се користат официјалните сајтови на дадени религии – ако ги има.

Религиите опфатени со сајтов се: баха’и, будизмот, кинеската религиозна традиција, старогрчката религија, христијанството, хиндуизмот, исламот, џаинизмот, Јеховините сведоци, јудаизмот, скиентологијата, сикизмот, таоизмот и вика (вештерство).

За секоја од религиите се презентирани лист со основни информации, речник на поими, хронологија, историја, како и детални објаснувања на верувањата, симболите, празниците, важните личности, е-книги, линкови и разни други содржини. Особено се интересни табелите и графиконите со кои се прави споредбена анализа на сектите во рамките на една религија, или религиите се споредуваат една со друга.

Сајтов се издржува преку реклами за книги и огласи од „Гугл“. Вториве се интегрирани во самиот дизајн и понекогаш е тешко да се разликуваат од содржините на страниците, што веројатно ги прави поефективни (се елиминира „банерското слепило“), но исто така го пренасочуваат вниманието и кликањето од линковите до оригиналните текстови.

Техничката изведба е со чист ХТМЛ, што ја помага видливоста пред машините за пребарување. Информациската архитектура и навигациските елементи со одлично разработени со употреба на структура на разгрането дрво, така што посетителите секогаш знаат во кој оддел се наоѓаат, но и лесно може да преминат во некој друг или до насловната страница.


ЗА ВЕБ-САЈТОТ

Дополнување: повремено
Брзина: брзо
Функционалност: одлична
Код: ХТМЛ
Дизајн: текстуален
Навигација: приспособлива
Пребарувач: има
Клучни зборови: делумно
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.religionfacts.com

02 септември 2005

Наука во живо

[лекториран]

„Наука во живо“ ги објаснува најновите истражувања за нашата планета, од човечка биологија, преку животинскиот свет до природните сили. Тоа го прави не само со редовно пренесување вести (оригинални и агенциски) туку и со спротивставување на погрешните сфаќања на научните откритија, одговарајќи на нив со куси, но концизни и понекогаш духовити анализи.

Темите на овие „гласови на разумот“ се најразлични, од штетноста на егзорцизмот (истерувањето зли духови, односно кај нас раширеното „баење“, особено при „лекување“ на луѓе со вистински психолошки нарушувања, кои нанесуваат огромни штети низ светот), до постоењето на духови, бигфут, па се до разоткривање на лажните тврдења во „Кодот на Да Винчи“.

Според сопствениците, целната публика на овој веб-сајт се луѓето од мобилната елита, кои поседуваат „интелектуална љубопитност, глад за идеи, настани и нешта што ја минуваат линијата, која го дели академското од фраерското, кои повикуваат на ангажман и имаат врска со животот.“

Информациската архитектура на сајтов е солидна, па на пример, кај секој напис има релевантни фотографии во две верзии: мала на страницата што води до поголема, како и линкови до сродни вести. Пофално е и што за сите информации се наведува точниот извор, често и преку линкови, што овозможува понатамошно истражување или разгледување.

Изведбата на сајтов е во обичен ХТМЛ, при што страниците се додаваат рачно, што веројатно одзема поголеми човечки ресурси и ја зголемува можноста за погрешни линкови, наспроти користење решение со динамички пристап до база на податоци. Сепак, можно е сопствениците да ја донеле одлуката да не преминат на нова технологија поради големото количество веќе архивирани написи, чие пренесување е можно да чини поскапо од потенцијалните предности за даден период.


ЗА ВЕБ-САЈТОТ

Дополнување: секој ден
Брзина: брзо
Функционалност: одлична
Код: ХТМЛ
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: нема
РСС/Атом: има
Гугл-ранг: 8/10
Јазик: англиски
Адреса: www.livescience.com

01 септември 2005

Ретрокраш

[лекториран]

Името „Ретрокраш“ доаѓа од англиските изрази „ретро“ (нешто во врска со стилот и модата од минатото, помешано со носталгија) и „краш“ (не фабрика за чоколади, ниту судир, туку интензивно ненадејно вљубување). Авторот Роберт Бери е навистина вљубеник во поп-културата од минатото, која ја користи и како тема на содржините и како графичка подлога.

Главни делови на сајтот се архивата на написи на разни теми, галериите со ретро-женски и форумите. Без разлика на тоа што сексуалноста е честа тема низ содржините, порнографски материјали отсуствуваат. Написите се комбинација на оригинални слики и фотографии и вицкаст, понекогаш исклучително ироничен текст. Фотографиите се понекогаш преголеми и се добива впечаток на пренатрупаност, како и потреба да се скролува, што ја нарушува употребливоста.

Стилот на пишување и целата работа на сајтот се блогерски непосредни, но без специфичен блогерски софтвер. Се обработуваат и теми, кои деконструираат некои начела што се земаат здраво за готово. На пример, различните парадокси поврзани со примената на супермоќите на Невидливата Девојка и Господин Фантастик од „Фантастичната четворка“ додека водат љубов, или кои се најфраерските возила од поп-културата, со особен осврт на количката на Супер Марио и штицата за сурфање на Сребрениот Сурфер.

Особено интересни се интервјуата со разни ретро-ѕвезди, од кои повеќето се познати и на нашата публика од разни ТВ-серии, како „Малата куќа во преријата“, „Гратчето Пејтон“, „Војводите од Хазард“ или филмови како „Трон“ и џемсбондовскиот „Дијамантите се вечни“.

Иако на сајтот нема апликација за РСС во текстуален формат, интересно е дека е овозможен „поткаст“, односно, емитување на аудиосодржини на ај под-уред (iPod) преку РСС.


ЗА ВЕБ-САЈТОТ

Дополнување: неопределиво
Брзина: средна
Функционалност: добра
Код: ХТМЛ
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: нема
РСС/Атом: нема
Гугл-ранг: 7/10
Јазик: англиски
Адреса: www.retrocrush.com

30 август 2005

Невротично ваши

[лекториран]

„Невротично ваши“ е серија цртани филмови, филмови и други производи што ги прави извесен Џонатан Иан Метерс, а во кои главни ликови се антипатичната верверичка Фоуми и симпатичната девојка Жермеин.

Драматуршки, целата концепција потсетува на легендарниот Синфест од Татсуја Ишида - главните ликови се неугледно машко и прекрасно женско, но употребата на други медиуми и, секако, особениот авторски печат и изборот на различни теми му дава свежина на овој пристап. Воведувањето аудиоподдршка навистина создава огромна разлика во впечатокот, особено поради добрите изведби на Дон Бенет како Жермеин.

Цртаните филмови се особено доброизведени и од анимациски и од технолошки аспект и претставуваат уште една потврда на тоа како ИКТ може да овозможи креативен израз за нешто за што порано биле потребни огромни ресурси. Тие ги користат сите предности на Флешот, па се вчитуваат доста брзо во споредба со други слични сајтови. Ова особено доаѓа до израз ако користите АДСЛ.

Употребливоста на сајтов ја нарушува тоа што речиси сите линкови се отвораат во нови прозорци (трошење ресурси и губење континуитет), оти со тоа се оневозможува и опцијата за отворање во јазичиња, која ја овозможуваат модерните разгледувачи како Фајерфокс. Исто така, има нарушување и при изведба на шемата за обојување, оти линковите не ја менуваат бојата во зависност од тоа дали биле кликнати или не. Пример за ова е списокот со транскрипти на филмчињата, во кој е невозможно да се види кои веќе сте ги прочитале, а кои не.

Добра страна на сајтов е што појавувањето на секој нареден цртан филм е прецизно најавено, преку што се врши синхронизација на очекувањата на публиката со можностите на авторот.

Околу Фоуми се има развиено култна заедница на обожаватели и почитувачи, кои одржуваат низа веб-сајтови посветени на неговиот лик, дело, вредности и принципи. До нив може да се дојде преку страницата со линкови.

ЗА ВЕБ-САЈТОТ

Дополнување: повремено
Брзина: релативно брзо
Функционалност: одлична
Код: Флеш, ХТМЛ, ЈС
Дизајн: графички
Навигација: стандардна
Пребарувач: нема
Клучни зборови: делумно
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.illwillpress.com

26 август 2005

Стрипот „Последниот бакнеж“

[лекториран]

„Последниот бакнеж“ е субверзивно стрипче што излегува на Интернет, а го прави Џон Ластиг и опфаќа најразлични контроверзни теми од меѓучовечките односи, како што се љубовта, сексот, лезбејството и лицемерството, обработени преку „екстремен хумор“.

Ластиг во 1987 година за 400 долари ги откупил авторските права на „Првиот бакнеж“, серија љубовни романчиња прикажани преку стрип, кои излегувале од 1957 до 1965 година. Иако на нив работеле некои од подоцнежните великани на американскиот стрип, како Дик Џордано и Винс Колета, ова не биле нивни врвни дела. На оригиналниот издавач му била битна брзината, а не квалитетот, наспроти нивната реклама дека е „најфиниот магазин што се занимава со љубовни теми“. Самиот Ластиг признава дека ова било зделка на принципот колку пари - толку музика.

„Последниот бакнеж“ е пример на современа концептуална уметност со користење готови материјали: Ластиг користи избрани постојни цртежи како основа, ги добојува и во нив додава свој текст, што секако му дава нови, подлабоки значења на делото. Во голем број случаи, резултатот е исклучително смешен и забавен, но и интелектуално изнијансиран.

Покрај стриповите, на сајтот има и низа други забавни содржини, од интервјуа и рецензии до линкови до други стриповски сајтови. По се изгледа дека дизајнот, со виолетово-жолтеникавиот дезен, е намерно направен така кичесто. Променливоста на навигацијата го отежнува шетањето по сајтот - ако влезете во архивата со стрипови, не гледате други линкови освен до насловната страница – но тоа е мала цена наспроти добивката од читањето.

ЗА ВЕБ-САЈТОТ

Дополнување: неделно
Брзина: брзо
Функционалност: добра
Код: ХТМЛ
Дизајн: текстуален
Навигација: променлива
Пребарувач: нема
Клучни зборови: нема
Јавен бројач: затворен
РСС/Атом: нема
Гугл-ранг: 6/10
Јазик: англиски
Адреса: www.lastkisscomics.com