Преводи за филмови и ТВ серии на повеќе светски јазици

„Поднапиши“ претставува веб-сајт кој овозможува преземање на преводи за филмови и ТВ серии на 52 јазици, меѓу кои е и македонскиот. За своето 5-годишно постоење, сајтот има повеќе од половина милион преводи и истите се преземени повеќе од 100 000 000 пати.

Пребарувањето на преводи на сајтот е многу лесно бидејќи се овозможени повеќе опции кои ќе го поедностават процесот. Сè што треба да направите е да го впишете насловот и да прецизирате година на излегување на филмот и јазик за кој сакате да добиете резултати или пак број на епизода и сезона за сериите. За секој превод можете да видите неколку информации, како и коментари од корисниците за квалитетот на истиот. За преземање на преводите не е потребна регистрација, но доколку сакате да предложите или да прикачите ваш, тоа ќе треба да го сторите. Сајтот има и форум на кој можете да дискутирате за многу теми, како и дел во кој можете да прочитате новости од филмската сцена. Доколку пак сакате да си направите своја лична колекција, на сајтот има и база со обвивки од филмовите и сериите.

Интересно е тоа што и интерфејсот на сајтот е достапен на повеќе јазици, меѓу кои го има и македонскиот, што е олеснителна околност за корисниците од земјава.

Дополнување: редовно
Брзина: брзо
Функционалност: одлична
Дизајн: прегледен и едноставен
Навигација: минимална
Пребарувач: има
Клучни зборови: има
Јавен бројач: има за преземањата
РСС/Атом: има
Гугл-ранг: 5/10
Политика за приватност: има
Јазик: бугарски, кинески, хрватски,
дански, англиски, германски, грчки,
унгарски, италијански, македонски,
српски, словенски
Адреса: www.podnapisi.net