Бесплатен сервис за онлајн средби

„Лајвмитапс“ е онлајн сервис за остварување на конференциски врски и онлајн средби со едноставна можност за споделување на десктопот на презентерот со пријавените учесници за проследување на презентацијата.

Интегрираниот скајп за конференциски повици и чет (пишан текст) го прави овој сервис уште подобро решение за онлајн поврзување на било кои точки во светот.

Може да се користи на сите оперативни системи и не бара потреба од било каква инсталација на софтвер, ниту пак некаква посебна хардверска конфигурација или претходно инсталиран софтвер. Презентерот треба само да го регистрира своето членство и да направи канал, кој може да биде приватен или јавен, за да им овозможи на потенцијалните учесници пристап до неговата презентација во реално време.

Како идни опции во рамките на „лајвмитапс“ ќе следуваат можноста за паузирање на презентацијата, како резултат на што презентерот ќе добие нотификација дека некој од учесниците има прашање, можноста за снимање и повторно репродуцирање на целата презентациска сесија, организирање на средби однапред и известување на потенцијалните учесници преку имејл, како и побрз трансфер и многу други карактеристики.

Овој сервис има мноштво предности пред останатите сервиси од овој тип. Најважно е што е сосема бесплатен за користење, нема ограничување ниту во поглед на системските и хардверските побарувања, нити во однос на локацијата и условите за користење, ниту пак во бројот на дозволени учесници по презентација.Најпогоден е за користење во професионални цели, но може да се користи и како систем за учење на далечина.

Дополнување: повремено
Брзина: брзо
Функционалност: одлична
Дизајн: модерн, едноставен
Навигација: минимална
Пребарувач: има (блог)
Клучни зборови: има
Јавен бројач: нема
РСС/Атом: има (блог)
Гугл-ранг: нема
Политика за приватност: има
Јазик: англиски
Адреса: www.livemeetups

Забавна и безбедна онлајн околина за најмладите

„Кидоз“ е официјален веб-сајт за софтверски производ наменет за децата, а за кој треба да знаат родителите. Се работи за прелистувач за деца кој сосема бесплатно може да се преземе и инсталира на секој оперативен систем. Тој нуди безбедна околина за децата и им овозможува да сурфаат по сајтови, да гледаат видеа и да играат игри.

Прелистувачот е безбеден бидејќи им овозможува на децата да гледаат само дозволена содржина, додека сите обиди за пристап до други содржини автоматски се блокираат. Софтверот е достапен на 4 јазици, но тоа не претставува никакво ограничување за децата било каде во светот, бидејќи интерфејсот е претежно графички, па детето не мора да знае да чита или пишува на ниеден јазик за да се служи со него.

Секако, прелистувачот е заштитен со лозинка која ја поставува родителот. Ваквиот начин им овозможува на родителите пристап до посебен администраторски дел преку кој тие можат да одлучат некои линкови да блокираат или пак да додаваат нови, со цел сите содржини комплетно да бидат прилагодени на потребите, возраста и темпераментот на детето. Оние содржини кои родителите ќе ги додадат за да им овозможат пристап на своите деца, можат да бидат поставени јавно, кои после модерирањето од страна на тимот на „кидоз“, ќе станат достапни и за останатите деца.

Дополнување: редовно (блог)
Брзина: брзо
Функционалност: одлична
Дизајн: детски
Навигација: минимална
Пребарувач: нема
Клучни зборови: нема
Јавен бројач: нема
РСС/АТОМ: има (блог)
Гугл-ранг: 1/10
Јазик: англиски
Политика за приватност: нема
Адреса: kidoz.net

Македонски народен театар со свој веб-сајт

За сите љубители на театарот и драмската уметност, еве уште една погодност на распространетата интернет сфера - Македонскиот народен театар се претставува со сопствен веб-сајт, прикажувајќи информации за својот редовен репертоар.

Сајтот е организиран на едноставен и функционален начин со интересен дизајн и е пријатен за посетителите. Веб-сајтот на МНТ ви нуди можност да се информирате за термините на закажаните театарски претстави, како и општи информации за истите, како на пример, кратко резиме за секоја од нив, за режисерот, актерите што глумат, сценариото и друго. Меѓу другото на овој веб -сајт можете да погледнете фотографии од актуелните театарски претстави, како и податоци за актерите кои што работат во театарот.

Сепак мора да се забележи дека сајтот има потреба од повеќе содржини, посебно од забавен карактер, бидејќи театарот сам по себе претставува инстутиција која што се стреми да ги забавува гледачите, па според тоа и веб-сајтот би било нормално да биде место каде што ќе може посетителот да наиде на интересни и забавни содржини. За почеток би било доволно да се пополнат празните категории, со што сајтот би се делувал комплетно.

Дополнување: повремено
Брзина: брзо
Функционалност: солидна
Дизајн: солиден
Навигација: мала
Пребарувач: нема
Клучни зборови: нема
Јавен бројач: нема
РСС/АТОМ: нема
Гугл Ранг : 2/10
Јазик: македонски, англиски
Политика за приватност: нема
Адреса: www.mnt.com.mk

Напишано од Миша Вучиќевиќ

Вашиот живот - дигитално и безбедно организиран со Тонидо

„Тонидо“ е платформа за споделување и синхронизирање на податоци. Вклучува неколку апликации, со можност за додавање на други во иднина. Тие се користат директно од десктопот на корисникот, без можност за нарушување на неговата приватност. Исто така, преку веб интерфејсот, корисниците можат да им пристапат на своите апликации од било кое место.

Работи на сите оперативни системи. Во моментов е се уште во пред-бета фаза и заинтересираните корисници можат да се регистрираат само за добивање редовни известувања. За неколку недели би требало да е веќе достапен за преземање како официјална бета верзија.

Апликацијата за фотографии овозможува споделување, синхронизирање и организирање во албуми, со пријателите и роднините, директно од десктопот. Со апликацијата „тонидо џубокс“ можете да си ги организирате вашите омилени музички колекции, а со „тонидо вебшеар“ да чувате и споделувате големи фајлови кои се тешки за праќање преку имејл, со користење на уникатни веб-адреси. Последната апликација овозможува организирање и споделување на задачи, забелешки, контакти, календари и документи со било кого во светот, како и комуникација преку форуми, програми за муабет итн.

Веб-сајтот изгледа одлично, а уникатноста во она што го нуди е во загарантираниот степен на приватност на податоците, што произлегува од локацијата на која тие се чуваат - локалните компјутери на корисниците.

Дополнување: еднократно
Брзина: брзо
Функционалност: ултра модерен
Навигација: минимална
Пребарувач: нема
Клучни зборови: има
Јавен бројач: нема
РСС/ АТОМ: нема
Гугл-ранг: 4/10
Јазик: англиски
Политика за приватност: има
Адреса: www.tonido.com

Македонска верзија од ГСМ Арена

Љубителите на мобилната телефонија навистина имаат избор кога се работи за нивната потреба од заситување со информации од оваа област, но љубител или не, секој што некогаш побарал информација за мобилен телефон на интернет, сигурно неизбежно се сретнал со ГСМ Арена (www.gsmarena.com). Како и да е, предмет на оваа рецензија не се калвитетот и популарноста на овој веб-сајт, туку карактеристиките на ГСМ Македонија, што претставува македонска варијанта од ГСМ Арена.

И покрај тоа што сличноста е очигледна, не може да се оспори квалитетот на овој веб-сајт, па и трудот кој забележливо константно се вложува. Посетителите можат да пребаруваат одредени модели на мобилни телефони за да добијат комплетна листа со спецификации, можат да огласуваат и да наоѓаат огласи кои ги погодуваат нивните интереси како потенцијални купувачи, да разменуваат мислења и знаења преку форумот и да читаат новости и рецензии на македонски јазик. Делува дека веб-сајтот содржински е препуштен во рацете на еден автор, но тој е скоро на секоја содржина културно потпишан, што е проследено и со датумот на објавување на истата. Ова се две важни карактеристики кои барем до некаде влијаат на начинот на кој ќе ја перципираме веродостојноста на напишаното. Покрај рецензиите за телефоните, во посебна категорија можат да се прочитаат и општи ИТ рецензии со занимлива тематика.

Дополнување: често
Брзина: брзо
Функционалност: одлична
Дизајн: класичен
Навигација: практична
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 1/10
Јазик: македонски
Политика за приватност: нема
Адреса: www.gsmmkd.com

Он-лајн продавница за вашите омилени музички артисти

Со се поголемиот пораст на продажбата и зачестеното купување преку интернет, се зголемува и бројот на он-лајн музички продавници кои нудат голем избор на музички продукти.

Артистик директ е супер организарана веб-комуна која ви нуди широк избор на песни, музички албуми, филмови како и секакви видови на информации од светот на музиката, популарната уметност и џет сетот.

Веб-порталот содржи корисни податоци за рејтингот на музичките изданија, потоа, кориснички рецензии, како и податоци за музичките артисти од секаков тип. Меѓу другото, на ова интересно место можете да најдете информации за закажаните концерти низ целиот свет како и можност да се снабдите со влезници за истите.

Со прекрасен дизајн, прегледни навигациони менија, и многу интересни и корисни содржини, може да се каже дека артистик директ, го зафаќа топ местото меѓу високо рангираните забавни веб-портали.

Високо препорачано!

Дополнување: секојдневно
Брзина: брзо
Функционалност: одлична
Дизајн: одличен
Навигација: добро организирана
Пребарувач: има
Клучни зборови: има
Јавен Бројач: нема
РСС/АТОМ: има
Гугл ранг: 6/10
Јазик: англиски
Политика за приватност: има
Адреса: www.artistdirect.com

Напишано од Миша Вучиќевиќ

Културен информатор

Доколку сакате да бидете информирани за сите културни настани, како и да бидете во тек со новостите од областа на културата во Република Македонија, тогаш треба да го посетите веб-сајтот „Култура во Република Македонија“. Овој сајт е еден од ретките македонски веб-портали што функционираат како секојдневен културен информатор. Постои повеќе од 7 години и функционира континуирано за целото тоа време. Овде можете да најдете информации и новости за музика, филм, театар, литература, музеи, популарна култура, издаваштво, како и за културни манифестации и настани што следуваат во блиска иднина. Информациите во врска со редовните репертоари во нашите театри, кина, изложби, културни собири и мултимедијални настани се спакувани и во вид на секојдневен и неделен културен водич.

Сепак, генерално гледано, сајтот изгледа малку оскудно, како да фалат повеќе содржини, но имајки ја во предвид бројноста на секојдневните културни дејствија и настани во нашата земја, тоа е и неизбежна карактеристика. Организацијата на почетната страна е на пониско ниво бидејки напишаните новости се редат по надолна линија до бескрај, при што се случува по пат да заборавите што предходно сте прочитале. Би требало таа содржина малку подобро да се распредели по категории, можеби и по датуми, па понатаму да се складираат информациите во дополнителна архива со цел сајтот да делува по организирано.

Дополнување: секојдневно
Брзина: брзо
Функционалност: ниска
Дизајн: обичен
Навигација: многу
Пребарувач: има
Клучни зборови: има
Јавен бројач: има
РСС/ АТОМ: нема
Гугл-ранг: 6/10
Јазик: македонски, англиски
Политика за приватност: нема
Адреса: www.culture.in.mk

Напишано од Миша Вучиќевиќ

Откачени позадини за вашиот десктоп

Доколку сте љубители на интересни десктоп позадини, ова е вистинскиот веб-сајт за вас.
„Владстудио“ е добро организиран веб-сајт, креиран од една личност која има многу интересен начин на гледање на реалноста и секојдневието што се гледа во неговите обработки. Веб-сајтот претставува една едноставна, но сеопфатна и многу интересна целина. Го карактеризираат весели бои, има супер организирано навигационо мени и сосем доволно содржина, со неколку збора, изгледа совршено за она што треба да го прикаже. Позадините се поделени во повеќе категории врз основа на тоа каква тема обработуваат.

„Владстудио“ на своите корисници им ги нуди поголемиот дел од позадините за слободно преземање, но кога се работи за слики со послаб квалитет. Доколку сакате да добиете позадина со подобар квалитет, ќе треба да се регистирате, а пак за позадините со висок квалитет, се наплаќа одредена цена.

Меѓу другото, на овој веб-сајт може да најдете и електронски честитки, десктоп часовници, туторијали, постери и друго.

Дополнување: повремено
Брзина: брзо
Функционалност: одлична
Дизајн: едноставен, модерен и чист
Навигација: средна
Пребарувач: има
Клучни зборови: има
Јавен бројач: нема
РСС/ АТОМ: има
Гугл-ранг: 6/10
Јазик: англиски, германски, француски...
Политика за приватност: нема
Адреса: www.vladstudio.com

Напишано од Миша Вучиќевиќ

Првиот македонски веб-сајт за аукции

Ибид е македонски сајт за аукции, поставен кон крајот на август 2008 година. Постои за да привлече што повеќе понудувачи да се регистрираат и да ги постават своите производи на јавно наддавање, како и да им овозможи на заинтересираните купувачи поволни цени за нивните потребни производи.

Засега, регистрирани се само 3 продавници, но производи има само во рамките на една. Тоа значи дека во овој момент, на ибид можете да се наддавате доколку ви требаат некакви оптички помагала, бидејќи единствената функционална продавница е оптика.

При изработката на сајтот правени се анализи на домашниот пазар и направено е негово прилагодување со светските трендови. Страницата за помош, конкретно и опширно ги објаснува условите и начините за користење, како од страна на понудувачите, така и од страна на купувачите. Сепак, и покрај амбициозната идеја, делува дека во изработката, развивањето и промовирањето на сајтот повеќе не се вложува.

Дополнување: ретко
Брзина: средно
Функционалност: добра
Дизајн: новогодишен
Навигација: средна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 1/10
Јазик: македонски
Политика за приватност: има
Адреса: www.ibid.com.mk

Конечно македонските студенти добија свој информативен студентски портал!

Македонските студенти долго време чекаа да се појави на интернет просторот, портал на којшто ќе можат да ги најдат сите потребни информации за универзитетите, како и сите новости за студентите и студентскиот живот. Конечно, www.studenti.com.mk е прв македонски веб-сајт што настојува да ги задоволи овие потреби на студентите.

Веб-сајтот е организиран на модерен и забавен начин и освен информации за универзитетите, посетителите овде може да најдат и голем број новости од секојдневниот студентски и културно-забавен живот. Меѓу другото, на овој сајт имате можност да видите рекламни банери за агенциите кои нудат работа и студирање во странство.
Бидејќи веб-сајтот е релативно нов, сè уште не е финализиран и многу работи му недостасуваат, особено содржинско исполнување на креираните категории. Но, се надеваме дека во блиска иднина, на веб-сајтот ќе се најдат многу корисни, интересни и забавни содржини. Ние им посакуваме успех во работата и што поголем број секојдневни посетители!

Дополнување: повремено
Брзина: брзо
Функционалност: солидна
Дизајн: просечен, класичен
Навигација: задоволителна
Пребарувач: има
Клучни зборови: има
Јавен Бројач: нема
РСС/ АТОМ: нема
Гугл-ранг: 3
Јазик: македонски
Политика за приватност: нема
Адреса: www.studenti.com.mk

Напишано од Миша Вучиќевиќ