Вентилејт

„Вентилејт“ е канадски веб-магазин којшто се занимава со теми поврзани со графичкиот дизајн којшто е омилена лектира и за извесни локални врвни дизајнери. Нови изданија на магазинот излегуваат на по неколку месеци, односно околу три пати годишно. Од друга страна, сајтот ја одржува свежината и актуленоста со вестите и линковите кои во вид на блог се вртат на насловната страница.

Секој број од магазинот донесува интервјуа и приказ на дел од портфолијата на по десетина млади уметници. При тоа и квалитетот на текстот и на фотографиите е на завидно ниво, што малку влијае на брзината, но она што се добива го оправдува чекањето.

Од аспект на употребливост, маана на сајтот е што блогот е поместен во рамка, но од друга страна, се работи за рамка од типот и-фрејм, која се вградува во самата страница, а не ја дели на делови, па овој елемент има мало влијание на податноста за машини за пребарување на останатите, поважни делови од сајтот.

Полезни елементи кои влијаат на зголемување на влијанието на сајтот се можноста посетителите да се запишат во мејлинг-листа и отворената покана преку електронска пошта да предложат нови вести.

Дополнување: често
Брзина: средна
Функционалност: добра
Код: комбиниран
Дизајн: комбиниран
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.ventilate.ca
Датум ан пишување: 29.07.2005.

Ок-Купидон – бесплатно наоѓање партнер(к)и и тестови

[лекториран]

Ок-Купидон е сервис за пронаоѓање љубовни, дружељубиви, сексуални и други видови партнери и партнерки преку веб. За разлика од многуте слични, користењето на овој е бесплатно, а пронаоѓањето соодветни сродни души и тела е, наводно, екстремно точно, под услов корисникот искрено да одговара на прашалниците и да знае што сака.

Работата на овој сајт не се заснова само на поставување огласи, туку, пред се на математичко споредување на особините на корисниците и пронаоѓање погодни партнери со помош на технолошки решенија врз база на психологијата. Авторите на сајтот се математичари, кои во најголем број имаат завршено на Харвард, а самиот сајт почнал како научен проект во рамките на студиите.

Сајтот ги споредува податоците од прашалниците, но и целокупното однесување на корисникот, кое се следи, за да дознае што повеќе за него или за неа и врз база на тоа да ја определи сличноста со други корисници. Доверливоста на податоците е загарантирана со строги правила на приватност кон кои се обврзуваат авторите, кои изјавуваат дека мразат спем и дека нема да го продадат идентитетот на корисниците на трети лица или фирми.
Она што ја намалува цената на постоење на сајтот е користењето едноставни, но функционални ХТМЛ-елементи, без потреба да се ангажираат извикани дизајнери. Корисниците може да поставуваат и свои фотографии како дел од претставувањето, од чии мали верзии добиени по случаен избор е направена и ефективната и брза анимација со затемнување и осветлување во Јаваскрипт на насловната страница.

Во крајна линија, човек не мора да стане член на сајтот за да ги решава официјалните, но едновремено и вицкасти, тестови, како на пример „тестот на смртта“ (пресметува приближно кога ќе умрете врз база на ваши особини, околина и навики), „тестот за ороспиство“ (во врска со сексуалната активност), „тестот на гејдар“ (дали ви работи радарот со којшто, демек, откривате дали некој друг е хомосексуалец или не), „политичкиот тест“ (која политичка идеологија ви е најблиска)... или некој од над 10.000 тестови направени од самите корисници – некои научни, некои сосем исчашени.

ЗА ВЕБ-САЈТОТ

Дополнување: постојано
Брзина: брзо
Функционалност: одлична
Код: ПХП, ЈС и др.
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: нема
Гугл-ранг: 6/10
Јазик: англиски
Адреса: www.okcupid.com

Блогот на Моби

[лекториран]

„Моби е обожавател на ‘Фолтин’, поборник за толеранција и најголем македонски пропагатор на ликот и делото на мечето Ушко. Неговиот 13-месечен (значи речиси и прв) блог е хиперсентиментален и искрен до болка. На Моби му се случува одвреме-навреме да премине во длабока конфузност и апстракција за повторно да исплива на врвот со досетлив и конкретен пост. Позитивна оцена за разноликост на теми, оригинален стил и отвореност,“ вели Ана-Марија Светозаров, експертка за блогирање.

Благодарение на поставениот јавен бројач, во врска со овој блог може да се забележи дека голем број посети се преку машини за пребарување (Гугл, Јаху), што е добро, иако не е карактеристично за македонските блогови. Ова веројатно се должи на долговечноста и постојаноста на држењето ритам, но и на тоа што при блогирањето Моби користи само латиница, кон која странските пребарувачи имаат поголем афинитет отколку кон македонската кирилица. Транскрипцијата е врз база на редукција, што блогот го прави уште малку потежок за читање („c“ наместо „ch“ и слично).

Пофално за блогов е што употребата на додавки (анкети и слично) не ја нарушува визуелната рамнотежа.

Новост во светот на македонското блогерство е што од неодамна и сајтот „Маседониа срч“, во соработка со пребарувачот „Најди!“, на насловната страница покажува линкови до најновите написи од македонските блогови. Ова веќе има позитивен одраз на посетеноста и на популаризацијата на оваа гранка на електронското издаваштво преку која граѓаните можат да ги искажуваат своите мислења и ставови, без да зависат од естаблишментот.


ЗА ВЕБ-САЈТОТ

Дополнување: на ден-два
Брзина: брзо
Функционалност: добра
Код: ХТМЛ-блогер
Дизајн: текстуален
Навигација: стандардна
Пребарувач: нема
Клучни зборови: нема
Јавен бројач: има
Гугл-ранг: 4/10
Јазик: македонски
Адреса: kajsibemoby.blogspot.com

Ходер - најпознатиот ирански блогер

[лекториран]

Хосеин Деракшах – Ходер е роден техеранец, кој од 2000 година живее во Торонто. Емигрирал откако властите го затвориле весникот во кој работел како колумнист, а тој сега како блогер и активист се залага за јакнење на демократијата во родната земја, во која само интернет-медиумите како блоговите (iranianblogs.com) делумно остануваат надвор од контрола на цензорите на режимот (stop.censuring.us).

Блогот на Ходер, насловен „Јас, уредник“, е насочен на „Иран, технологијата и поп-културата“ го прави интересен за читање и за оние што не ги интересираат многу можните идни дестинации за „извезување слобода“ преку испраќање воен и реконструкциски персонал од нашата земја.

Според највлијателното светско технокултурно списание „Вајерд“, се проценува дека 5 од 69 милиони Иранци користат Интернет и одржуваат околу 100.000 блога. Во споредба со нашата земја, бројот на општи корисници изгледа слично (нема податок за методологијата за да се направи точна споредба). Поразително е споредувањето на процентот на блогери во однос на населението – кај нас се стотина од 2 милиони – што значи дека модерна Персија е 30 пати „појака“ во блогерство од Македонија.

Пробив кај иранските блогови направила употребата на стандардот уникод, којшто овозможува пишување и читање со персиско писмо на веб. Истиот стандард се користи и за нашата кирилица. Одговорните тела на РМ наводно имаат пропуштено во светските асоцијации за стандаризирање да напоменат дека во нашата азбука има и букви со надредни знаци (и, е), па дури и стандардните фонтови од кириличната поддршка на „Мајкрософт“ не ги прикажуваат како што треба според правописот.


ЗА ВЕБ-САЈТОТ

Дополнување: на ден-два
Брзина: брзо
Функционалност: одлична
Код: HTML/мувабл тајп
Дизајн: текстуален
Навигација: стандардна
Пребарувач: има
Клучни зборови: делумно
Јавен бројач: има
Гугл-ранг: 5/10
Јазик: англиски и персиски
Адреса: www.hoder.com

Блогот на Букаро

[лекториран]

„Букаро – човек со мисија. Сака да стане писател - и ќе стане, па макар и по цена сите да го мразат. Во меѓувреме, имаме директен пренос на тоа како јаде тулумби, зборува на ‘мирц’ и озборува познати битолски легенди. Можеш да го мразиш, можеш да посакаш да му побараш телефонски број, но нема шанси да поминеш мирно покрај неговиот блог,“ вели Ана-Марија Светозаров, највлијателната македонска експертка во практичната примена на оваа технологија, во ексклузивната изјава за „Сајт на денот“ наменета за пренесување „инсајдерска“ перспектива за содржините на најзначајните македонски блогови.

До блогот на Букаро може да се дојде преку неколку адреси за редирекција. Иако тој е поставен на Блогер, до него водат и crticka.tk (со попапи, лош избор) и новата bukarski.com. Употребливоста на стандардниот блогерски дизајн ја нарушува тоа што сите текстови се напишани со „болд,“ односно здебелени букви, што го отежнува читањето.

Пофално за него е што има поставено јавнодостапни бројачи на посетеност, од кои се гледа и дека линкови до неговиот блог имаат поставувано разни важни сајтови, а и тој самиот има остварено доста себепромоција со претходното учество на форумски сајтови.

Делата на Букаро (Алекс Букарски) ги нема само на Интернет. Тие го имаат пробиено „дигиталниот јаз“ – негови раскази објави и списанието „Маргина“, бр. 68, во делот посветен на младата македонска проза.

Иако можеби нема да им се допадне на претставниците на образовно-книжевниот и јазички естаблишмент, младите писател(к)и како Букаро, кај кои користењето информатички и телекомуникациски технологии е секојдневие, кое се прелева и во делата, се иднината на македонската литература. Иднината што е пристигната.


ЗА ВЕБ-САЈТОТ

Дополнување: секојдневно
Брзина: брзо
Функционалност:одлична
Код: HTML/блогер
Дизајн: текстуален
Навигација: стандардна
Пребарувач: преку Најди!
Клучни зборови: нема
Јавен бројач: има
Гугл-ранг: 2/10
Јазик: македонски
Адреса: www.bukarski.com

Горилаз

[лекториран]

„Горилаз“ се виртуелен бенд зад чии цртани ликови стојат некои познати современи музичари. Интересно е дека за дел од нив, популарноста на нивните алтер ега е споредлива или понекогаш и поголема од постигнатата во „реалниот свет“ – ако светот на неанимираниот шоубизнис може да се смета за „реален“ во која било смисла.

На пример, лидерот на подолгоприсутната и способна за живи свирки група „Блур“, Дејмон Албарн, е основач и на проектот „Горилаз“. Според списанието „Свет компјутера“ (07/2005), „Горилаз“ добиваат повеќе писма од обожаватели од „Блур“.

Присуството на „Горилаз“ во јавноста се гради врз база на анимации, видеоспотови и раскажување приказни за нивниот живот, а веб-сајтот е речиси совршено приспособен за таа функција. Флешот е доброинтегриран со другите технологии, така што е зачувана и употребливоста. На пример, целиот веб-сајт не е огромен флеш-фајл, туку флеш-апликации се вградени во посебни ХТМЛ-страници, со што се достапни за длабинско линкување и преку машини за пребарување.

Графичкиот дел е изведен на завидно ниво и по долготрајна макотрпна работа, која морала да се одвива паралелно со снимањето на неодамна излезениот нов албум. Следејќи ги конвенциите за претставување простор преку веб, како на пример употребата на панорамски „снимки,“ презентирана е куќата во која, наводно, живеат „Горилаз“ и нивниот таканаречен живот.


ЗА ВЕБ-САЈТОТ

Дополнување:неопределиво
Брзина: бавно без АДСЛ
Функционалност: одлична
Код: Флеш, JS, PHP
Дизајн: флешерски
Навигација: динамичка
Пребарувач: нема
Клучни зборови: нема
Јавен бројач: нема
Гугл-ранг: 5/10
Јазик: англиски
Адреса: http://www.gorillaz.com

Глобална фотографска заедница

[лекториран]

Овој пат сајтот на денот нема врска со „Стар трек,“ иако има слична мисија како вселенските бродови кои „истражуваат нови форми на живот и нови цивилизации.“ Мисијата на „Трек ерт“ (TrekEarth) е „поттикнување на развојот на глобална заедница заинтересирана за фотографија. Нејзините членови се стремат да обезбедат интересни фотографии и корисни критики за секој од нив, со што и се од полза на целата Интернет-заедница.“

Зачленувањето е бесплатно, при што членовите се обврзуваат дека ќе се придржуваат до одредени правила кои го гарантираат квалитетот на содржините. На пример, само еден човек по корисничко име и обратно, фотографиите не смее да бидат дигитално изманипулирани, освен поправање на мали несовршености, сечкање, спојување или додавање информација за авторските права. Темите на фотографиите треба да се општи, а не треба да се ставаат наместени фотки снимени во студио, потоа порнографија, еротика и семејни албуми.

Слични правила ја одредуваат и работата на форумите, во кои разговорите се често детални, дури до ниво на „работилници“ за определени фотографски техники.

На овој сајт се зачленети и десетици луѓе од Македонија, кои ја претставуваат земјата преку прекрасни снимки на пејзажи и детали од секојдневниот живот. Инаку, земјата е претставена како „ Macedonia FYR“ па посетителите што ќе одвојат неколку минути да пратат електронска порака до управата во врска со овој пропуст ќе придонесат за подобро запознавање на светот со нашата земја.

ЗА ВЕБ-САЈТОТ

Дополнување: постојано
Брзина: брзо
Функционалност: одлична
Код: PHP
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
Гугл-ранг: 0/10
Јазици: англиски + 12 други
Адреса: www.trekearth.com

Коко - горилката што зборува и Фондацијата за горили

[лекториран]

Целта на веб-сајтот на непрофитната Фондацијата за горили е претставување на нивната работа и издигање на јавната свест во врска со состојбите и со потребите за помагање во преживувањето на нашите најблиски роднини.

Главна ѕвезда на Фондацијата е горилката Коко, која зборува користејќи го стандардниот американски јазик на глувонемите и која од предмет на комуниколошки истражувања има прераснато во амбасадор на нејзиниот вид кај оние од кои зависи неговиот опстанок. Коко ја воодушевува светската јавност и со хуманоста и со нежноста што ја покажува преку грижата за маченца и ги урива стереотипите за горилите за кои основен пример е „Кинг Конг“.

Сите делови на сајтот се функционално усогласени со неговите цели, а тоа особено важи за богатството на информациите за горилите претставени преку фотоблогот, фотографиите по случаен избор на насловната страница, другите графички содржини и видеата („Коко ТВ“ - хостирани на сајтот на Епл). Покрај известувањата за тоа од каде и како, преку донации и купување документарни филмови и книги издадени од Фондацијата.

Ефективно средство за мобилизација е и месечниот информативен билтен преку електронска пошта, а особено е симпатично што по запишувањето се прикажува анимација на Коко како вели „благодарам“. Еден недостиг на сајтов од аспект на употребливост е што линковите се дадени со фиксни бои или со сликички, така што посетителите немаат директна информација за тоа на кои од нив веќе кликнале.

„Фондацијата за горили ги проширува откритијата на проектот ’Коко‘ и во Африка, каде што горилите се на работ на истребување поради експлоатацијата од меѓународните корпорации“. Од 1999 година вложуваат во формирање безбедни зони во националните паркови во Камерун, како и работа со учениците и со локалните раководители.


ЗА ВЕБ-САЈТОТ

Дополнување: на ден-два
Брзина: брзо
Функционалност: одлична
Код: HTML/PHP/Flash
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
Гугл-ранг: 7/10
Јазик: англиски
Адреса: www.koko.org

Кукли за облекување со познати ликови

[лекториран]

„Рајот за хартиени кукли“ е фински сајт почнат со идејата да се обезбеди забавна игра за девојчиња на Интернет што нема да содржи елементи што обично асоцираат на игрите наменети за момчиња. Целта на екипата е да понуди „чиста и добра околина во која девојчињата ќе го минуваат времето.“

Изведбата на куклите за облекување во стилот на „Цицин кутак“ од Политикин забавник е одлична, пред се во однос на цртањето на ликовите, односно нивната интерпретација во чист флеш-формат. Самата игра е направена без грешка, користејќи ги можностите на технологијата за работа со објекти во различни слоеви и менување бои во текот на работата на програмата.

Љубителите на познатите личности од светот имаат десетици личности со чија гардероба и изглед може да си играат, од пејачи и пејачки, преку глумци и глумици, фотомодели и манекенки, до членови на британското кралско семејство.

Оние корисници што сакаат да се регистрираат имаат дополнителни можности за комуникација преку сајтот, како муабет, пораки, зачувување на местења и омилени кукли и слично.

ЗА ВЕБ-САЈТОТ

Дополнување:
Брзина: средна
Функционалност: одлична
Код: Флеш/ПХП
Дизајн: флешерски
Навигација: минимална
Пребарувач: има
Клучни зборови: има
Јавен бројач: има
Гугл-ранг: 5/10
Јазик: англиски
Адреса: www.paperdollheaven.com

Кори Доктороу (блогер, писател, активист, Канаѓанец)

Симпатичниот Кори Доктороу е пример за ѕвезда на новото време, кој за разлика од нашите „ВИП“ не „е светски познат само во своето село“ (што би рекол Братислав Димитров) поради врски со локалниот медиумско-политички комплекс, туку има стекнато вистинска светска слава како писател, блогер и активист.

Кори е претставник на најновата генерација писатели на научна фантастика, наследници на визионерите на сајберпанкот од ранг на Вилијам Гибсон и Брус Стерлинг. Но, за разлика од нив, тој интернет не го перципира како нешто фантастично, туку како дел од секојдневниот живот.

Текстовите на повеќето од неговите најпознати книги може да се симнат од неговиот веб-сајт во дигитална форма под лиценцата Криејтив комонс. Како поука за писателите и издавачите, тој смета дека овој потег не само што не ја попречил продажбата на книгите, туку напротив, постојано ја поттикнува.

Во однос на блогерството, Доктороу е еден од уредниците на Боинг-боинг, веројатно највлијателниот блог на светот според бројот на линкови што водат кон него и над милион посети месечно.

Како активист, Доктороу работи со Криејтив комонс и Фондацијата за електронска граница, промовирајќи ги нивните мисии и цели низ светот, преку предавања и конференции.

Дополнителни информации: носи очила слични како оние на Тарик Филиповиќ од „Милијунаш“, има делумно потекло од источна Европа, роден од Торонто, живеел во Сан Франциско, а сега престојува во Лондон.

Дополнување: често
Брзина: брзо
Функционалност: добра
Код: ПХП, ЈС
Дизајн: текстуален
Навигација: прилагодлива
Пребарувач: нема
Клучни зборови: нема
Јавен бројач: понекаде
Гугл-ранг: 7/10
Јазици: англиски
Адреса: www.craphound.com
Датум на пишување: 11.06.2005.