Македонскиот пребарувач Набу

Набу е пребарувач специјализиран за пребарување на македонски содржини на Интернет. Изработен е од страна на Игор Трајковски кој неколку месеци има работено во Гугл како стажант.

Интерфејсот на главната страница е едноставен, прегледен и забавен. Кога посетителот ќе почне да го впишува текстот за кој сака да добие информации, под полето за пребарување се појавуваат сугестии како листа од зборови кои почнуваат на зададената буква. Како се продолжува со пишувањето, така листата со сугестии станува поконкретна. Поради тоа, испишувањето на зборовите може да се прекине штом се забележи дека се понудени во листата со сугестии. Ова важи и кога се пишува на латиница.

Втората добра работа во врска со овој пребарувач е што можете да го прецизирате времето на објавување на содржините за кои сакате да добиете информации. Како дополнително прецизирање на пребарувањето, може да се избере од листата категории: Македонија, Хардвер, Образование, Вести и сл. Од скоро, во рамките на Набу, може да се пребаруваат и слики објавени на македонски сајтови.

Како најдобро да ги искористите пребарувачките можности на Набу, можете да прочитате во делот Како до подобри резултати, што ќе го здогледате кога ќе започнете со пребарување. Доколку имате некакви предлози, упатете ги до креаторот на Набу.

Дополнување: редовно
Брзина: брзо
Функционалност: одлична
Дизајн: едноставен
Навигација: минимална
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 3/10
Јазик: македонски
Адреса: www.nabu.com.mk

Архива на слободен софтвер

Оупен сорс ливинг е спонтано настанат проект на еден блогер кој целата работа ја започнал од обична листа на линкови која подоцна прераснува во сајт со архива на најдобрите програми со отворен код.

Сајтот изгледа чисто и едноставно. Секој посетител може да се насочи кон некоја од десетте понудени категории и со тоа да ја започне потрагата по софтверот кој му е потребен. Имињата на програмите се придружени со краток опис за нивната намена, а во продолжение следуваат линкови кои носат до страниците од кои тие можат да се преземаат.

Во рамките на сајтот постои форум на кој посетителите разменуваат искуства и идеи, чија крајна цел е да се придонесе во збогатувањето на архивата.

Оупен сорс ливинг е еден од повеќето сајтови од овој тип, но со оглед на неговата отвореност и позитивна цел, вреди да стане дел од вашата листа на омилени веб локации.

Дополнување: ретко
Брзина: брзо
Функционалност: одлична
Дизајн: минималистички
Навигација: едноставна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 6/10
Јазик: англиски
Адреса: osliving.com

Попрактично и поубаво сурфање со Кулајрис

Кулајрис е веб-сајт кој нуди две убави и практични софтверски решенија кои ќе му дадат нова димензија на вашето сурферско доживување.

Првиот производ се вика Пикленс и овозможува поинаков начин на прегледување слики на веб. Поддржани се сите популарни пребарувачи за слики, галерии и сајтови за социјално вмрежување, а работи како додаток за прелистувачите Мозила фајрфокс, Интернет експлорер и Сафари. Откако ќе се инсталира, при секоја посета на некој од ваквите сајтови се добива можност за прегледување на сликите на модерен, тродимензионален начин, нивно зголемување или последователно прикажување како презентација. Пикленс е бесплатен софтверски додаток кој може да се користи при пребарување слики на Гугл и Јаху или при разгледување слики и фотографии на Хај фајв, Фејсбук, Мајспејс, Фликр, Пикаса, Девиантарт и други.

Вториот производ кој ќе му даде шмек и стил на вашето прелистување на Интернет се вика Кулајрис привјус. Се инсталира на истиот начин, а овозможува отворање на линковите од страниците кои ги посетувате во мало дополнително прозорче кое се појавува врз моментално активната страница. На тој начин се овозможува побрзо и поефикасно прелистување без потреба од напуштање на содржините кои ви се постојано неопходни. Овој софтверски додаток може да биде особено практичен кога се прегледуваат содржини на Интернет во чиј склоп се наоѓаат линкови до нивниот извор.

Дополнување: по потреба
Брзина: брзо
Функционалност: одлична
Дизајн: модерен
Навигација: едноставна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.cooliris.com

Фондација за експериментална уметност

Фондацијата за експериментална уметност (ЕАФ) од Аделаида, Австралија работи на проширување на претставување на нови дела и ширење на новите идеи за современа уметност и култура.

Преку галериски простор, книжарница и ателјеа за уметници, ЕАФ развива и презентира иновативен уметнички програм од висок калибар, и игра централна улога во развојот на експерименталната уметничка пракса во Австралија и во светот.

Фондацијата ја води Мелентие Пандиловски, уметнички директор и куратор кој изврши огромно влијание во оваа област во Македонија преку водење на Центарот за современи уметности во Скопје до март 2003 година.

Веб-сајтот е целосно во функција на дејноста на фондацијата и преку него може да се дознаат навремени информации во врска со галеријата, издавачката дејност, како и сите други активности.

Дополнување: повремено
Брзина: брзо
Функционалност: одлична
Дизајн: текстуален
Навигација: стандардна
Пребарувач: нема
Клучни зборови: има
Јавен бројач: нема
РСС/Атом: нема
Гугл-ранг: 4/10
Јазик: англиски
Адреса: www.eaf.asn.au

Блогот на Паблишер

Паблишер е личен блог на Гоце Митевски на кој се презентираат информации за слободен софтвер, веб и графички дизајн, музичка продукција, како и за сè друго што претставува личен интерес на авторот.

Блогот постои од почетокот на минатата година и претставува спонтан израз на интересите на неговиот автор. Презентирајќи теми кои се интересни за него самиот, блогот нуди содржини кои често се проследени со субјективно мислење, сепак засновано на разработена информација. Иако нема прецизен интервал на објавување на нови содржини, она што ќе се објави, секогаш претставува приказна за себе, понекогаш раскажана во неколку реда, а некогаш разработена во многу повеќе.

По точно една година од своето постоење, благодарение на Лугола - група на ГНУ/Линукс корисници од Битола, блогот, со сета своја содржина, мигрираше на нова локација: pablisher.lugola.net. Освежен, попрегледен и пожив од претходниот, новиот Паблишер уште појасно ја изразува идејата на авторот - следење на сопствените интереси и нивно споделување со сите кои ги имаат истите.

Блогот е лиценциран со Криејтив комонс лиценца, поточно со онаа која дозволува слободна употреба на неговите содржини за било какви цели се додека се наведува нивниот извор и додека тие не се користат за комерцијална употреба. Новиот Паблишер кон ова го додава и условот за споделување под исти услови во случаи на модификација на неговите содржини.

Дополнување: повремено
Брзина: брзо
Функционалност: одлична
Дизајн: модерен
Навигација: едноставна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 4/10
Јазик: македонски
Адреса: pablisher.blogspot.com
(pablisher.lugola.net)

Поинаков начин за цитирање на веб

Куоут е веб-сајт кој особено ќе им се допадне на блогерите и воопшто на луѓето кои се занимаваат со објавување информативни содржини на веб. Сајтот нуди едноставен начин за фаќање слики (screenshots) од страниците на кои онлајн ентузијастите се повикуваат при објавување на информациите. На тој начин се овозможува визуелно цитирање, наместо текстуално, при што авторот сам избира кој дел од страницата ќе го цитира. Резултатот е слика, односно мапа на која сите линкови се активни. Кога посетителите на одреден веб сајт или блог кој го користи овој метод на цитирање, ќе се насочат кон некоја содржина, веднаш ќе добијат и визуелна претстава за изворот на таа содржина со можност директно да пристапат до одреден дел од него.

Сајтот има минималистички дизајн, заради што се одликува со едноставност и функционалност. Корисниците на Куоут немаат потреба од претходна регистрација како услов за негово користење. Се што треба да се направи е да се избере саканата веб локација, да се внесе адресата во полето и да се вметне резултатот во рамките на саканата содржина на својот сајт или блог.

Куоут има оригинална идеја, но не е којзнае што. Со оглед на неговата намена, важно е дека си ја врши работата. Па доколку ви се допаѓа, можеби е одлична прилика да направите освежување на вашето веб катче.

Дополнување: еднократно
Брзина: брзо
Функционалност: солидна
Дизајн: минималистички
Навигација: едноставна
Пребарувач: нема
Клучни зборови: има
Јавен бројач: нема
РСС/Атом: има
Гугл-ранг: 4/10
Јазик: англиски
Адреса: http://kwout.com

Македонски правни ресурси на веб

www.pravo.org.mk претставува Правен ресурсен центар каде можат да се најдат нашите закони кои се во сила, како и оние кои повеќе не се, а се донесени од страна на Собранието на Р. Македонија. Тука се вклучени и нивните измени и дополнувања кои се во сила, потоа компаративните анализи за закони кои треба да се најдат на дневен ред на собраниските седници, како и судската пракса на Врховниот суд на Р. Македонија.

За секоја категорија на ресурси, постои посебен пребарувач и совети за пребарување, така што граѓаните без особени потешкотии можат да дојдат до бараната содржина. Тие исто така можат да оставаат коментари, предлози, иницијативи и размислувања кои потоа редовно им се доставуваат на пратениците, со цел подобрување на законодавството и одлуките донесени од страна на Собранието.

Единствена забелешка која ја имаме за овој веб-сајт е лошата навигација. Имено, секој посетител кој за првпат ќе ја отвори почетната страница од овој веб-сајт, ќе добие впечаток дека е неопходна негова регистрација за да може да се служи со содржините. За да се избегне оваа нелогичност, ве советуваме да се насочите најпрво кон адресата за контакт, со што станува активно копчето за отворање на домашната страница. Потоа, навигирањето низ содржините повеќе не претставува проблем. Или доколку ви е поедноставно, испишете ја следнава веб адреса во вашиот прелистувач: www.pravo.org.mk/main.asp.

Овој веб-сајт претставува одлична алатка која можат да ја користат сите граѓани и граѓански организации како извор на информации, но и заради нивно поактивно вклучување во процесите на донесување одлуки.

За натамошниот развој на веб-сајтот и прибирањето на пристигнатите коментари и предлози ќе се грижи тим на граѓанската асоцијација МОСТ.

Дополнување: редовно
Брзина: брзо
Функционалност: одлична
Дизајн: едноставен
Навигација: лоша
Пребарувач: има
Клучни зборови: има
Јавен бројач: има
РСС/Атом: нема
Гугл-ранг: 4/10
Јазик: македонски
Адреса: www.pravo.org.mk

Сајт кој ги поврзува луѓето со хендикеп

Дисабум е сајт основан од страна на д-р Глен Хаус кој специјализира во областа на физикалната медицина и рехабилитацијата, а инаку и самиот се соочува со квадриплегија што претставува состојба на инвалидитет на сите екстремитети, иако не секогаш подразбира нивна целосна парализа и дисфункционалност (од Wikipedia).

Сајтот има за цел континуирано да нуди информации за здравјето и животот на луѓето кои живеат со различни функционални ограничувања. За таа цел можат да придонесуваат самите тие, како и специјалисти во разни области кои сакаат да помагаат.

Покрај информативна компонента, сајтот нуди и повеќе начини за поврзување на инвалидизираните луѓе од целиот свет. Зачленувајќи се на овој сајт, посетителите можат да објавуваат свои фотографии, да се занимаваат со блогирање, како и да се поврзуваат со други членови преку активните форуми, групи и чет соби. На тој начин, Дисабум претставува многу повеќе од информативно ориентиран веб сајт кој им е наменет на луѓето со посебни потреби во животот. Тој претставува заедница отворена за сите кои сметаат дека овде можат да си го најдат своето место и да се чувствуваат убаво поради тоа.

Дополнување: често
Брзина: брзо
Функционалност: одлична
Дизајн: комбиниран
Навигација: нормална
Пребарувач: има
Клучни зборови: нема
Јавен бројач: нема
РСС/Атом: нема
Гугл-ранг: 5/10
Јазик: англиски
Адреса: www.disaboom.com

Блогот на „Мејк лав“

„Мејк лав“ овозможува „водење љубов“ во поширока смисла, како што е нагласено и во песната на „Леб и сол“, „Скопје“ - она со

...млади моми љубов водат,
душа вадат очи бодат...

Значи, не се однесува само на еуфемизам за сексуалниот чин, туку на сите аспекти на односот, особено запознавањето. Покрај функцијата за социјално вмрежување преку профили, овој веб-сајт нуди и можност неговите регистрирани членови да се искажуваат преку заеднички блог.

Содржините се најразновидни, најчесто забавни, а дел од нив прераснуваат и во дискусии со коментари. Ова е интересен пример на комбинирање на две актуелни области од развојот на интернет и како таков е веројатно прв во Македонија.

Дополнување: често
Брзина: брзо
Функционалност: одлична
Код: ПХП
Дизајн: текстуален
Навигација: стандардна
Пребарувач: има
Клучни зборови: има
Јавен бројач: нема
РСС/Атом: има
Гугл-ранг: 0/10
Јазик: македонски
Адреса: blog.makelove.com.mk
Напишано: 29.01.2008.

Последната крв

„Последната крв“ е веб-стрип од жанрот хорор/научна фантастика со едноставно постапокалиптично сиже: откако зомбија ја освојуваат земјата, група вампири се борат да ги заштитат последните преживеани луѓе за да може да се хранат со нивната крв.

Во основа, прародител на делата од овој жанр е книгата на британецот Ричард Матесон, „Јас сум легенда“ (1954), во која единствениот преживеан човек се бори против целосно вампиризирано човештво. Идејата има доживеано низа адаптации, директни како истоимениот филм со Вил Смит (2007), или варијации на тема како „Омега човекот“ (1971) и зомбифицираниот „28 дена подоцна“ (2002).

Стрипов има прилично свеж пристап, надополнет со одличен цртеж.


Дополнување: 2-3 пати неделно
Брзина: брзо
Функционалност: одлична
Код: комбиниран (вордпрес)
Дизајн: стриповски
Навигација: стандардна
Пребарувач: нема
Клучни зборови: статички
Јавен бројач: нема
РСС/Атом: има
Гугл-ранг: 5/10
Јазик: англиски
Адреса: www.lastblood.com
Напишано: 03.12.2007.